ہاشم شاہ · دوہڑا

دوہڑے ہاشم شاہ

ہاشم شاہ · لگ بھگ ۱۷۳۵؟ – لگ بھگ ۱۸۴۳؟ · مجموعہ · ۲۰۸ حصے

پڑھنا شروع کروحوالہ تے نوٹ

۱

آدم روپ جہیا تن کیتا، کون بندا آپ دیوانہ ۔برہوں بھوت شودائی کرکے، اتے کردا خلق بیغانا ۔

رہیا عشقَ پہاڑ چریندا، اتے سی فرہاد نشانہ ۔سوئی شخص بولے وچ میرے، اویں ہاشم نام بہانہ ۔

۲

آدر بھاؤ جگت دا کریئے، اتے قصبی کہن رسیلا ۔جے کر دور ہٹائے لوکاں، اتے کہن سوان کتیلا ۔

دیس تیاگ فقیری پھڑیئے، نہیں چھٹدا کھیش قبیلہ ۔ہاشم خیال چھٹے نہیں راہیں، کوئی سو تدبیر ن حیلہ ۔

۳

عاشق آکھ دیکھاں کس خاطر، نت چربی ماس سکاون ۔چاہن حرف ہجر دا لکھیا، اوہ کاغذ صاف بناون ۔

رک رک سوت پئے مستر دا، اتے ثابت قلم چلاون ۔ہاشم عاشق ایس کتابوں، نت سمجھِ سلوک کماون ۔

۴

عاشق جیڈ بے عقل نہ کوئی، جن جان سمجھ نت کھپنا ۔بید قرآن پڑھے جگّ سارا، اوس نام جانی دا جپنا ۔

آتش لین بیگانے گھر دی، تے پھوک دیون گھر اپنا ۔ہاشم شاہ کی حاصل عشقوں، ایویں مفت برہوں دا کھپنا ۔

۵

آتش ہون برہوں دی آتش، وچ تیزی بہت پچھاتی ۔سوہنی روز ملے تر ندیاں. پر سرد ن ہووے چھاتی ۔

اوڑک ایس ہجر دے سوزے، اوہ بیٹھ لہو وچ نھاتی ۔ہاشم باجھ میاں نہیں ملدا، اساں خوب صحیح کر جاتی ۔

۶

اے دل ! دام حرص دے فسیوں، توں رہؤں خراب تداہیں ۔اپنا آپ پچھاتوئی ہرسوں، تے یار پچھاتوئی ناہیں ۔

کامل خون جگر دا کھا ہن، اتے درد اوہناں دا آہیں ۔ہاشم یار رہے جاں جائے، نہیں اک گھر لاکھ صلاحیں ۔

۷

اے دل ! درد نصیب تیرے وچ، تاں میں کی کراں بچارا ۔آپے درد سہیڑیں پائی(بھائی)، اتے چاہیں بھی چھٹکارا ۔

ایویں ہوگُ سعادت تیری، توں کر دکھ درد پیارا ۔ہاشم پیڑ ہٹاوے کدھروں، ہن بھائی ! پلید نکارا ۔

۸

اے دل ! ڈھونڈ پھرے جگ پایا، پر ڈھونڈن بہت اوکھیرا ۔بیجیں داخ ن ہوون کنڈے، توں نہ کر دیکھ اندھیرا ۔

کر کجھ درد بیگانے دردوں، مت درد کرے ربّ تیرا ۔ہاشم ڈھونڈ کویں دم ایویں، اجے ہن بھی وکھت بتیرا ۔

۹

اے دل ! توں دلبر دے بدلے، سو مہنا کر کر ماری ۔جاں منصور چڑھایا سولی، ایہہ گل لائی کر پیاری ۔

جیہی سمجھ گئے کر سودا، سبھ اپنی اپنی واری ۔ہاشم ہور نویں گل بوٹے، جد پھریاں ہور بہاریں ۔

۱۰

اے گل ! میت ن جان کسے نوں، جہڑا ویکھن آن کھلووے ۔اپنی غرض سبھی جگ پیاری، سبھ توڑ لیاں خوش ہووے ۔

ہے اک درد تیرا بلبل نوں، جہڑی ہجر تیرے بہہ رووے ۔ہاشم درد ہووے جس تن نوں، سوئی نال تیرے بہہ رووے ۔

۱۱

ایسے یار ملن سببیں، جہڑے کدی ن موڑن اکھیں ۔دیش بدیش ن لبھدے ڈھونڈھے، اتے ملّ ن آون لکھیں ۔

رلدے پھرن جنونّ لکائی، اوہ اگّ چھپائے ککھیں ۔پر اوہ بھیت پچھانن والا، توں ہاشم دل وچ رکھیں ۔

۱۲

اج اس رزق بھلے چھب بانکی، تینوں آکھن لوک اؤتاری ۔جے سر درد ہووے جگ سارا، تیری آن کرے دلداری ۔

اے دل جان نہیں بن اپنیوں، تیری ترسے کارگزاری ۔ہاشم ہوگُ خواری بھلکے، توں ن کر حرص پیاری ۔

۱۳

اپنی پیڑ سبھو جگ پھڑیا، کون جانے حالَ بیغانا ۔ڈوبو گھاٹ سنجوگیں میلہ، جہڑا دسدا سہج یارانہ ۔

ہجری سوز جنونی کردا، کون بچدا آپ دیوانہ ۔ہاشم خوب ستی جھبّ ملیا، وچ کرکے موت بہانہ ۔

۱۴

اؤکھدھ پیش ن جاوگُ لوکا ! بچ رہیو نیناں دیوں ڈنگوں ۔برہوں روگ کیہا ہتیارا، نہیں ہندا لاکھ ودنگوں ۔

ماس گیا جند رہی ن باقی، اجے نکلے آہ کرنگوں ۔ہاشم ایس حقیقت تائیں، جا پچھیئے بھور پتنگوں ۔

۱۵

بے بنیاد جہان پچھانے، اتاں جوش کرے دل میرا ۔چاہے ترک کیتی ہر طرفوں، اتے کرے گیان بتھیرا ۔

پر ایہہ حرص ہوائ جہانیں، بھیڑا توڑن بہت اوکھیرا ۔ہاشم نیند اکھاڑ سویرے، نہیں دسدا سول بکھیڑا ۔

۱۶

بے بنیاد کریں بنیاداں، توں کھولھ عقل دی طاقی ۔جس دن خرچ لہینگا سارے، ایہہ خرچی رہگُ ن باقی ۔

سو سمیان کریں کھڑِ فوزاں، اتے ذرا ن رہسیں عاقی ۔ہاشم سمجھ بہبود پیارے، توں خاکی ہیں بن خاکی ۔

۱۷

مائے بیٹھ اکّھیں وِچّ ویکھیں، مینوں چاک کیہا کجھ دِسدابیلے مگر تِنہاں دے چِیرے، جیندا نام نہیں پُت کسدا

کھیڑے چھوڑ ماہی دَر پائیو، کوئی شان لِباس نہ جسداہاشم پِیڑ تِسے تَن ہووے، کوئی گھا دکھاوے جسدا

۱۸

بیسازاں دا ساز ہے سوہنیاں، جنہاں تان ن تکیہ کوئی ۔توں کرتا تنھاں نوں پالیں، جنہاں کول ملے ن ڈھوئی ۔

سن فریاد آ گئے در تیرے، اسیں آزز ساتھ ستھوئی ۔ہاشم کوک کہے در کس دے، جیں دا تیں بن ہور ن کوئی ۔

۱۹

بھامبڑ درد ہدایت والا، جہڑا پل پل بل بل بجھدا ۔گھائل آپ ہویا دکھیارا، بھلا ہور بنے کد رجھدا ۔

مجنوں سوز لیلی دے جلیا، اوہنوں کھان گوشت کد سجھدا ۔ہاشم عشقَ کہے جگ جس نوں، بھلا کون کسے کول پجدا ۔

۲۰

بھلا عشقَ گیا جس ویہڑے، اوہدی سبھ جڑ مول گواوے ۔جیوں باغبان سٹے کٹّ بوٹا، اتے بھی سر وار لگاوے ۔

قسمت نال ہووے مڑ ہریا، نہیں مول سکے جڑ جاوے ۔ہاشم راہ عشقَ دا ایہو، کوئی بھاگ بھلے پھل پاوے ۔

۲۱

برہوں دور ازاری کیتے، اسیں پریم چکھا وچ پا کے ۔افلاطون ن سمجھے ویدن، جے نبض پھڑے ہتھ آ کے ۔

مجنوں دیکھ حوالت میری، اوہ روون بہہ گل لا کے ۔ہاشم حالَ سجن نوں ساڈا، بھلا کون کہے سمجھا کے ۔

۲۲

بولے کاگ سویر پچھاتی، اتے شور کیتا بن موراں ۔سورج شمع جگت دی ہویا، اتے پیا اندھیر چکوراں ۔

خوبی حسن اتے گل ناہی، وسّ ہور دلاں دیاں ڈوراں ۔سادھاں نال ن مطلب ہاشم، جنہاں غرض بنی سنگ چوراں ۔

۲۳

بوٹے سیب انار لگائے، کر منصف لوک گواہی ۔آئی جدن بہار پھلاں دی، تاں پھل ہوئے کاہیں ۔

رادھی داخ ڈٹھی کنڈیاری، جہدی ذرا امید ن آہی ۔ہاشم دیکھ خیال ربانی، اتے اس دی بے پرواہی ۔

۲۴

بدھ سدھ جن سمجھی کجھ تھوڑی، سو کھاندا خون جگر دا ۔جس نے لئی بہار وصل دی، سو ہویا اسیر ہجر دا ۔

طوطی حسن کلام ن سکھدی، کیوں پیندا نام پنجر دا ۔ہاشمشاہ رس مول دکھاں دا، جس رس بدلے دکھِ مردا ۔

۲۵

چاکا وے ! مت چاکاں والی، تیری دیکھ لئی چترائی ۔ایہو عشقَ کماون سکھیوں، توں انگ ببھوت لگائی ؟

آواورد نمرداں والی، تینوں کن ایہہ چال سکھائی ؟ہاشم آکھ رانجھن نوں مل کے، میں واری گھول گھمائی ۔

۲۶

چمک کروڑ مجنوناں والی، جے توں سمجھن لایق ہوویں ۔جس توں وار سٹے لکھ ہاسے، توں رون ایہا بہہ روویں ۔

وسلوں آن حضر دے پیارے، اساں ویکھ ڈٹھے رس دوویں ۔ہاشم توڑِ جنزیر مذہب دے، اتے ہو نرویر کھلوویں ۔

۲۷

چندا چمک وَکھال نہ سانوں، اَتے نہ کر مان ودھیراتیں جیہے لَکھ چڑھن اَسانوں، پر سجناں باجھ اندھیرا

جس ڈٹھیاں دِل روشن ہووے، اوہ حُسن نہیں اَج تیراہاشم باجھ تُساں دُکھ پایا، جَھب آ مِل ساجن میرا

۲۸

چندہ دیکھ چکور پکارے، تکّ حالت کھولھ دلاں نوں ۔توں سردار سبھی کجھ تیرا، ایس سوبھا، بھاؤ اسانوں ۔

جوڑی جوڑ دتی ربّ صاحب، اتے جیواں دیکھ تسانوں ۔ہاشم خرچ نہیں کچھ ہوندا، بھورا کر کجھ یاد متراں نوں ۔

۲۹

چڑھیا چا پپیہے سن کے، اتے ساون دی رت آئی ۔ترسن کھپن تے دکھ پاون، ان سکدیاں عمر گوائی ۔

نیڑے بھال پیا دلبر دی، انو چمکے چمک سوائی ۔ہاشم کی ایہہ مان ملن دا، جس دسدی پھیر جدائی ۔

۳۰

چور چرائ لیا دل میرا، ایس چیٹک چور طوفانی ۔در در پھراں دیوانی ڈھونڈاں، لوک آکھن 'پھرے دیوانی' ۔

جس نوں جا پچھیئے سوئی کہندی، بھیڑی پھرے خراب دیوانی ۔ہاشم خوب اساں نال کیتی، تیرے عشقَ اتوں قربانی ۔

۳۱

چوچک باپ الامبھیوں ڈر کے، اسیں شہروں مار کھدیڑے ۔بے اعتبار ہوئے جگ سارے، ہن کرن ویاہ ن کھیڑے ۔

ترسن نین رانجھنا ! تینوں، اسیں کیوں تدھ یار سہیڑے ۔ہاشم کون دلاں دیاں جانے، میرا صاحب نیاں نبیڑے ۔

۳۲

دام زلف وچ بیر موتی جد، الٹ الٹ وچ دھردے ۔ہنس ہاتھ چھئیاں کر پھسدے، اتے پٹک پٹک سر مردے ۔

کھنن زخم گھائل دل دردی، نت سہن سول دلبر دے ۔ویکھو لیکھ ہاشم مشتاقاں، سوہنے قدر نہیں پھر کردے ۔

۳۳

دولت مال جہان پیارا، اساں ڈھونڈ لدھا اک پیارا ۔سو بھی لوک ن دیکھن دیندے، جگ سڑدا ہینسیارا ۔

دل وچ شوق بخیل چپھیرے، میرا ہوگُ کویں چھٹکارا ۔ہاشم آؤ ملاؤ رانجھا، میرا سکھ دل دا دکھ سارا ۔

۳۴

دیپک دیکھ جلے پروانہ، ان ایہہ کی مذہب پچھاتا ۔عاشق دین ن مذہب رکھیندے، اوہناں ورد خدا کر جاتا ۔

جن ایہہ علم بھلایا دل توں، ان لدھا یار گواتا ۔ہاشم تنھاں ربّ پچھاتا، جنہاں اپنا آپ پچھاتا ۔

۳۵

دیکھن نین نیاز نیناں دی، جد نین نیناں وچ اٹکے ۔نین برے نت مارن چوکاں، جد نین نیناں وچ پٹکے ۔

کاری چوٹ نیناں نوں لگی، نین ہرگز رہن ن اٹکے ۔ہاشم دوش نیناں وچ ناہیں، نین دیکھِ ادائیں لٹکے ۔

۳۶

دیکھ چکور کہیا اک منصف، تینوں مورخ کہاں سیانا ؟اوہ چند پرتھویپتِ راجا، توں پنچھی لوک نمانا ۔

کہیا چکور، 'نہیں توں محرم، ایس رمزوں جاہ انجانا !ہاشم راج ن دسدا مینوں، میں یار جانی کر جانا' ۔

۳۷

دلبر دام وچھا زلف دی، وچ چوگ حسن دی پائی ۔دیکھ خوراک جناور دل دا، اوہ جا پیا وچ پھاہی ۔

ہے کت حالَ غریب بچارا، مڑ دل دی خبر ن آئی ۔ہاشم مڑن محال تنھاں نوں، جنہاں نو سر بازی لائی ۔

۳۸

دلبر ویکھ رہا وچ شیشے، اوہنوں صورتِ نظر ن آوے ۔پانی دے وچ صحیح ن ہووے، جد آئینہ عکس ملاوے ۔

دیپک کول چکھا دے دھریا، اوہدی چمک چمک مل جاوے ۔ہاشم آپ ہووے لکھ شیشہ، اوہنوں شیشہ کون دکھاوے ۔

۳۹

دلبر یار فراقَ دے میرے، وگدے نین پھہارے ۔دل دا خون وگے وچ رلیا، جہڑے چمکن سرخ ستارے ۔

آتشباز پریم بنائے، پھلجھڑیاں نین بچارے ۔ہاشم خوب تماشہ بنیا، ہن لایق یار پیارے ۔

۴۰

دلبر یار کیہا تدھ کیتا، میری پکڑی جان عذاباں ۔دارو درد تیرے دا نہ ہے، اساں پڑھیاں لاکھ کتاباں ۔

روون جوش لگے نت اکھیاں، جد بھڑکی بھاہ کباباں ۔ہاشم بہت سہے دکھ پیارے، کدی آ مل دیکھ خراباں ۔

۴۱

دلبر یار کیہی تدھ کیتی، مرے ساس لباں پر آئے ۔ظاہر کراں ہووے جگ رسوا، تے ہیا خاموش ن جائے ۔

میں کر شرم ڈراں وچ ویہڑے، اتے برہوں ڈھول وجائے ۔ہاشم فیل وڑے جس ویہڑے، بھلا کچرکُ کوئی لکائے ۔

۴۲

دلبر یار کیہے دن آہے، جد ہسّ ہسّ لے گلِ ملدے ۔جیوں جیوں بے پرواہی کردا، سانوں ڈاہ لگن تل تل دے ۔

تسبیح دیکھ ناہیں ہتھ ساڈے، اساں داغ رکھے گن دل دے ۔ہاشم دھوون بہت اوکھیرا، پر داغ ن دل توں ہلدے ۔

۴۳

دلبر یار مہورت کر لے، اج نالِ اساں مکھ ہسکے ۔بجلی روز نہیں جھڑ ہووے، اتے میگھ سمیں وچ لشکے ۔

جاں مڑِ پھیرِ جوانی آوے، اتے جیؤ لئے من وس کے ۔ہاشم جان غنیمت ملنا، مل نال اساں ہسّ رس کے ۔

۴۴

دلبر یار ندی دیاں لہریں، ایہہ سدا ن رہن اتھائیں ۔تینڈا عشقَ میری دلغیری، کوئی لاکھ ورھے تک ناہیں ۔

دو دن بھور گلاں دا میلہ، اتے آس امید سرائیں ۔ہاشم پر کی دوش متر وچ، لیکھ اساڈے ناہیں ۔

۴۵

دلبر یار ن دوش تسانوں، کی کریئے صفت تساڈی ۔ملے تنبیہ غناہاں موجب، ایہہ سبھ تقصیر اساڈی ۔

منصف دردمنداں دے ناہیں، ایہہ بان تساں وچ ڈاڈھی ۔غیرت تیغ جنہاں دی ہاشم، کیوں ڈھونڈن تیغ فولادی ۔

۴۶

دلبر یار ن کر الغرضی، ایہناں نال نمانیاں یاراں ۔اک جمدے اک میں تدھ جیہے، کئی رل گئے خاک ہزاراں ۔

کچرکُ کوک پپیہا کوکے، اتے کچرکُ پون پہاراں ۔ہاشم ہوش پکڑ، نہیں بندے ! کوئی نت نت چیت بہاراں ۔

۴۷

دلبر یار شنگار رنگیلا، مت باہر دیکھ اساڈے ۔دل بند ہویا نت ملن تمبیہاں، اتے برہوں مگر پیادے ۔

درد فراقَ تساڈے والا، ایہہ ہویا نصیب اساڈے ۔ہاشم دیکھ وظیفہ آہیں، پر خاطر یار تساڈے ۔

۴۸

دل دے کول اکھیں نہیں دسدے، دلبر میت کھڑے دل جانی ۔آ جانی پردیسی پیارے ! تیرے پل پل دے قربانی ۔

تیں بن دیس اجاڑا دسدا، جہڑا آہا نور نورانی ۔ہاشم آکھ سجن نوں مل کے، میں تدھ دے باجھ دیوانی ۔

۴۹

دِل دِلگیر ہویا تقدیروں، تینوں کون دیوے دم سُکھ دابُہتے یار بیدرد لباسی، کر گیان سُناون مُکھ دا

دَردی دَرد ونڈایا لوڑن، ہَتھوں آن دکھاون دُکھ داکامل یار ملے کوئی ہاشم ، تاں سرد ہووے دَم دُکھ دا

۵۰

دل گھائل دلبر نوں کہیا، توں سن جانی میرا ۔جے توں عیب ڈٹھا وچ ساڈے، اتے دھریا پیر پریرا ۔

تینڈے نال نہیں کجھ مطلب، سانوں شونق لوڑیندا تیرا ۔ہاشم رہگُ قیامت توڑیں، سانوں ایہو دان بتیرا ۔

۵۱

دل نوں بان پیا اک مائی ! مینوں ظاہر مول ن ہووے ۔آپے بال چکھا وچ جلدا، پر سیک لگے بہہ رووے ۔

چھڈدا بان ن جلبل مردہ، میری جان خلاصی ہووے ۔ہاشم حالَ تتی دا جانے، جہڑا نال لہو مکھ دھووے ۔

۵۲

دل سوئی جو سوز سجن دے، نت خون جگر دا پیوے ۔نین سوئی جو آس درس دی، نت رہن ہمیشہ کھیوے ۔

دل بے درد بیادھیں بھریا، شالہ!اوہ ہر کسے ن تھیوے ۔ہاشم سو دل جان رنگیلا، جہڑا دیکھ دلاں ول جیوے ۔

۵۳

دل توں ہی دلبر بھی توں ہی، اتے دید توں ہی دکھ تیرا ۔نیندر بھکھ آرام توں ہی توں، اتے تیں بن جگت اندھیرا ۔

نین پران حیاتی توں ہی، اک حرف نہیں وچ میرا ۔ہاشم سانجھ تساڈے دم دی، ہور وسدا ملک بتیرا ۔

۵۴

دل وچ صبر حیا ن مائی ! وننج کھڑیا ہوتاں چھل کے ۔بالن بدن دلیلاں آتش، اوہ ٹھانڈھ(ڈاڈھ) ڈٹھی بل بل کے ۔

متراں ویکھ کیتی مترائی، اج نال بلوچاں رل کے ۔ہاشم جھاگ سسی بھی بپتا، جو مرگُ تھلاں وچ جل کے ۔

۵۵

دن وچ لاکھ کروڑ چلاون، اوہناں ترکش تیر ن مکدے ۔خونی ذات محبوب سپاہی، جہڑے چوٹوں مول ن اکدے ۔

عاشق جان تلی پر دھر کے، پھیر(پیر) پچھانہ ن چکدے ۔ہاشم پھیر لحن پر عاشق، سوہنے رہن ہمیشاں لکدے ۔

۵۶

ڈٹھی قبر سکندر والی، اوہ خاک پئی چپ کیتی ۔اکھیں میٹ تانہی کجھ دسدا، تدھ کون صحیح کر جاتی ۔

ہسے ہوت نہ آہی سسی، اوہ خواب آہی ہو بیتی ۔ہاشم آکھ سجن کس بدلے، بھلا بن بدرد عنیتی ۔

۵۷

دو دن کوک پپیہا کوکے، اوہنوں بوند اکاشوں پیندی ۔میری عمر کوکیندیاں گزری، اتے جان سولی نت سہندی ۔

فرقہ ہور ن پھریا کوئی، رہی واؤ ایہو نت وہندی ۔ہاشم ساس چھٹن سکھ پائے، میری آس ایہو نت رہندی ۔

۵۸

دور نقاب کیتا دلبر نے، اتے چمکی تیغ میانوں ۔یا اوہ برق عبر سوں نکلی، یا حور ڈگی اسمانوں ۔

دیکھ شہید ہوئِ دل گھائل، اتے گزرے ایس جہانوں ۔ہاشم زاہداں زہد بھلایا، اتے رہی کلام زبانوں ۔

۵۹

دوزخ دے ول نال یاراں دے، خوش ہو کے پگ دھریئے ۔جمل بہشت ملے بن یاراں، تاں ذرا قبول ن کریئے ۔

جو دم دور یاراں تھیں ہووے، اوہ دوزخ دے دم بھریئے ۔ہاشم ساتھ یاراں دا کریئے، خواہ تریئے خواہ مریئے ۔

۶۰

ایت سرائ مسافرخانے، کئی آ مسافر رہندے ۔رات رہے کوئی اک پل ٹھہرے، پر ہوش آئی اٹھ بہندے ۔

آون نال ہلاس حسن دے، اتے جاندے نی دل دہندے ۔ہاشم سمجھِ وہار قدیمی، اسیں کاس پچھے دکھ سہندے ۔

۶۱

گئی بہار خزاں وی آئی، جھبّ آؤ کدی گھتّ پھورا(پھیرا) ۔چریں وچھنیاں دے گل مل کے، پر زور لگائیو تھوڑا ۔

کرسی پیڑ کلیجہ دکھسی، ہویا درد ترے وچ پھوڑا ۔ہاشم ہون پیارے دشمن، جہڑے گھتن درد وچھوڑا ۔

۶۲

گہری راتِ ہاتھ چھپ جاوے، اتے پون روپ جم سرکے ۔بجلی چمک چمک ڈر پاوے، برف سار-منھ کرکے ۔

خونی تیغ تیز جل ندیاں، اوتھے شینہ مرن ڈر ڈرکے ۔پریت ریتِ ایسی کر ہاشم، سوہنی پھیر جاوے نیں ترکے ۔

۶۳

غیرت پکڑ ناہیں جے دیکھیں، کوئی کر دسو بریائی ۔کچرکُ رہگُ غریب بیچارا، اتے کچرکُ کرے کمائی ۔

جتھے عقل گئی کر سودا، لکھ ایس شہر وچ آئی ۔اپنی خبر ناہیں کچھ ہاشم، کی مطلب نال پرائی ۔

۶۴

گھر وِچّ لَکھ دُشمن لکھ دوست، توں باہر پھریں ڈھوڈیندادعوا حِرص غرور جہانی، نہیں گھر وِچّ حُکم منیندا

ایہہ دُشمن گھر دے لکھ سُولاں، نہیں جب لگ صاف کرینداجیوندیاں وِچّ جان نہ ہاشم، جیندے گھر وِچّ شیر بوکیندا

۶۵

گل نے درد دتا بلبل نوں، اوہدی آن کیتی دلداری ۔توں محبوب کہیا بلبل نے، کیوں کرنا ہیں انتظاری ۔

مالی توڑ لوگُ گل کہیا، اساں جد ایہہ رات گزاری ۔ہاشم یاد کریسی بلبل، ایہہ الفت بات ہماری ۔

۶۶

گل تے خار پیدائش اکسے، اس باغ چمن دے دوویں ۔اک شب عمر گلاں دی اوڑک، اتے خار رہے نت اوویں ۔

تھوڑا رہن قبول پیارے، پر توں خار ن ہوویں ۔ہاشم آن ملیں گل ہسکے، بھاویں اک پل پاس کھلوویں ۔

۶۷

حاکم حکم نصیبوں کردا، پر لشکر پاس کھڑووے ۔گھائل عشقَ دلاں نوں کردا، پر نین وسیلہ ہووے ۔

ہے تقدیر ولوں سبھ لکھیا، پر بن اسباب ن ہووے ۔ہاشم باجھ تلہا نہیں بیڑی، اتے پاس ندی بہہ رووے ۔

۶۸

ہر ہر پوست دے وچ دوست، اوہ دوست روپ وٹاوے ۔دوست تیک نہ پہنچے کوئی، ایہہ پوست چائ بھلاوے ۔

دوست خاص پچھانے تانہی، جد پوست خاک رلاوے ۔ہاشم شاہ جد دوست پاوے، تد پوست ول کد جاوے ۔

۶۹

ہاشم نام رکھایا اس نے، اک دمڑی پاس ن جسدے ۔آزز حالَ حوال ن کوئی، کی وصف سنائے تسدے ۔

تن پنجر دل گھائل زخمی، اتے نین بھرے نت دسدے ۔پر ہاشم نوں حشمت ایہو، ہور کرم ونڈائے کس دے ۔

۷۰

ہیرے ! لاج سیالاں لاہیا، تدھ یار بنایا پالی ۔چوبر کرن مزاکھاں تینوں، 'اوہ ہیر چکیٹے والی' ۔

'ہیر قدیمی اوہی وے لوکا ! اتے میں کدوں لجّ والی ۔رانجھا عیب چھپاوے ہاشم، میرا دین دنی دا والی' ۔

۷۱

ہے گل ! میت نہیں ایہہ بوٹا، توں ن کر لاڈ اویہے ۔ایہہ کپٹی سکّ گیا ن مولے، کئی توڑ لئے تدھ جیہے ۔

رو پیاری بلبل گل مل کے، کد ملسن یار اجیہے ۔ہاشمشاہ اسراف کمینہ، کیوں ات بدھ آن دسیہے ۔

۷۲

ہن توں آؤ ن آ اساتھیں، کوئی آپے آن ملیسی ۔جس دن موت کھڑگُ وچ قبرے، سر سو من بھار پویسی ۔

تس دن کریں قبر ول پھیرا، تیرا راہ شہید تکیسی ۔ہاشمُ ہوگُ احسان تساڈا، میرا ہر دم شکر کریسی ۔

۷۳

ایہہ افسوس رہگُ دل میرے، تے جاگُ ن کدی کداہیں ۔دلبر دے ہتھ دل میرا لے، میری قدر پچھاتوسُ ناہیں ۔

بے پرواہ شناس ن اس نوں، یا میں کچھ ہوگُ غناہیں ۔ہاشم ایہہ گلّ کتء ن کیتی، بھرم رہیا من ماہیں ۔

۷۴

ایہہ اکھیں بن فوج حسن دی، ستی کلا جگاون ۔عقلمنداں نوں کر منصوبے، وس بدرداں پاون ۔

حاکم حکم کرن بن لشکر، بے تقصیر کہاون ۔ہاشم من ن آنیں اکھیں، مت سولی پکڑ چڑھاون ۔

۷۵

ایہہ دِل خوار کرے نِت مینوں، ایس ہوش گوایا میراجیوں دریا ہمیشہ ڈھاوے، نِت اپنا آپ چُوفیرا

اپنی خبر نہیں اس دِل نوں، جیوں دِیپک مگر اندھیراہاشم یار مِلے تد آکھاں اَساں خوب ڈٹّھا سُکھ تیرا

۷۶

اک بہہ کول خوشامد کردے، پر غرضی ہون کمینے ۔اک بے پرواہ ن پاس کھڑوون، پر ہوون یار نگینے ۔

کونجاں وانگُ ہزار کوہاں تے، اوہناں شوق وکھو وکھ سینے ۔ہاشم ساجن کول ہمیشاں، بھاویں وچھڑے ہون مہینے ۔

۷۷

اکنا کول حسن چترائی، اک گھائل یار دیوانے ۔اکنا پاس کوت نہ شب دا، اک بخشن روز خزانے ۔

اکنا درد ہمیشہ آہیں، اک گاون نال ترانے ۔ہاشم خواب چمن دی لہریں، گئے پھر پھر کئی زمانے ۔1

۷۸

اکنا روگ سریراں اپجے، اک دل دے وہم ازاری ۔وہم خیال دلیلاں کیتا، اوہنوں کامل روگ بیماری ۔

جو دل غرق دلیلیں ہویا، اوہنوں ساس نباہن بھاری ۔ہاشم دل بے درد وٹائے، کوئی گاہک ملے بیاپاری ۔1

۷۹

اک پل ہجر نہیں سہِ سکدا، تس آوے پیش جدائی ۔دل نوں صبر آرام ن آوے، دوجا در در کرے لکائی ۔

دل نوں صقل ہووے ہر طرفوں، تد پکڑے این صفائی ۔تاں کجھ بنے آئینہ ہاشم، اتے سمجھے بھیت الٰہی ۔1

۸۰

اکسے تار بہار نہ رہندی، نہیں اکسے طور زمانہ ۔ہر دن چال نہیں البیلی، نہیں ہر دم زور جوانا ۔

روون سوگ ہمیش نہ ہووے، نہیں نت نت راگ شہانہ ۔ہاشم بیٹھ گئیاں لکھ ڈاراں، ایہہ جگت مسافرکھانا ۔

۸۱

اکسے تھاؤں ن وگدیاں ندیاں، نہیں اکسے طور لکائی ۔اے دل ! پکڑ دلیری دل دی، کر سوچ وچار ن کائی ۔

رل مل بہن ہمیش ن دیندا، کیوں نت رہگُ جدائی ۔ہاشم فتح اسان تنھاں نوں، جنہاں ہمت یار بنائی ۔

۸۲

انہیں اکھیں ربّ نظر ن آوے، ربّ ہور اکھیں من ماہیں ۔دہسر بنست اکھیں ہتھ آیا، پر رام پچھاتوسُ ناہیں ۔

جت ول الٹ پوے رخ دل دا، ایہہ نین پران تداہیں ۔ہاشم دوش نیناں نوں کیہا، اس دل دیاں دور نگاہیں ۔

۸۳

عشقا بال چخا وِچّ پاویں، تاں میں ان٘گ نہ موڑاں ذرامُکھ موڑاں تاں کافر تھیواں، جے سِیس دھراویں ارا

شوق شراب پلائیو مینوں، ہُن ہویا مست مقراہاشم نہیں، رہو ہُن تُوں ہی، ہُن میں وِچّ میں نہ ذرا

۸۴

اشکا ! لکھ اوگن وچ تیرے، کوئی اک دو چار ن پائے ۔اک گن ہے ایسا وچ تیرے، جس سبھ ایہہ عیب چھپائے ۔

جت ول دھیان کریں نہیں ہٹدا، بن مطلب سر پہنچائے ۔ہاشم ایس پچھے دل گھائل، تیرے ہوئِ غلام وکائے ۔

۸۵

عشقَ اساں نال ایسی کیتی، جیوں رکھاں نال پالا ۔دھر دھر ہوئے غناہی کملے، مینوں ملدا دیس-نکالا ۔

ان برہوں چھلیئے ول لیتا، میں جاناں عشقَ سکھالا ۔ہاشم یار سجن دے کارن، اساں پیتا زہر پیالہ ۔

۸۶

جاں فرہاد وکھے توں آئؤں، اہتوں جا پہاڑ چرائیو ۔میرے پیر جنزیر حیا دا، اوہنوں مول نہ چائ تڑائیو ۔

اشکا ! زور نہیں وچ تیرے، سچ آکھ بڈھیپا آئیو ؟ہاشم لوک کرن غم ایویں، اساں بھیت تیرا ہن پائیو ۔

۸۷

جانی جیون چار دہاڑے، ایہہ سدا ن رہن بہاریں ۔ایس چمن وچ پھر پھر گئیاں، کوٹ بے انت شماریں ۔

میں توں کون وچارے کس دے، کس گنتی لاکھ ہزاریں ۔ہاشم خواب حیاتی بدلے، توں قول قرار ن ہاریں ۔

۸۸

جانی یار ن حاصل ہوندے، پھر لاکھ کروڑیں مل نوں ۔دیکھ دیدار کوئی دم لاہا، اتے جان غنیمت گل نوں ۔

اوڑک توڑ لیجاوگُ مالی، اتے سوگ پوگُ بلبل نوں ۔ہاشم یار ملے گل ہسکے، کوئی اج نہیں تدھ طول نوں ۔

۸۹

جان جہان دوویں دم کوئی، اتے حرص ہزار چپھیرے ۔مارن راہ سدھاون راتیں، اتے فوج رہے نت نیڑے ۔

ثابت جان جو مال دسیوے، اسیں آن مسافر گھیرے ۔ہاشم آپ کرگُ سوئی ہوسی، ہور وس نہیں کجھ میرے ۔

۹۰

جب لگ ملی ن تینوں جاگھا، میں ہیر آہی البیلی ۔ہن میں چور ہوئی جگ سارے، میرا تیں بن ہور ن بیلی ۔

چاکا ! چاک میرا دل کرکے، ہن مت جا چھوڑ اکیلی ۔ہاشم دین الانبھا ماپے، 'ہوئی ہیر رانجھن دی چیلی ۔

۹۱

جد ایہہ خاک رہا تن میرا، تدھ دکھ سکھ مول ن آہا ۔بھی مڑ خاک ہوئی سی اوویں، کوئی روز ملن دا لاہا ۔

آؤ جانی ! گل لگّ اساڈے، تیرا عشقَ پیا گلِ پھاہا ۔ہاشم ہوگُ سناش میاں دی، سن دلبر بیپرواہا ۔

۹۲

جیں دکھ، پریم تنھے ہتھِ آیا، اس دلبر دی سرکاروں ۔خوش دل ہو کر شکر خدا دا، ہن بچیوں لاکھ ازاروں ۔

اک دکھ توں دکھ جان ہزاراں، دیکھ حاصل ایس پیاروں ۔ہاشم شاہ دکھ ڈھونڈ عشقَ دا، اس کامل پاس ہزاروں ۔

۹۳

جس دا درد تسے ہتھ دارو، ہور کون طبیب گنواوے ۔کوک دلا ! کوئی کوک قہر دی، مت صاحب جے سن پاوے ۔

مدتاں گزر گئیاں مکھ ڈٹھیاں، میرا دلبر نظر ن آوے ۔ہاشمُ ہوگُ کوئی دن ایسا، میرا دلبر لئے کلاوے ۔

۹۴

جس دن شہر محبوباں والے، کوئی عاشق پیر دھریندا ۔جان خوراک بناوے غم دی، اتے پل پل سول سہیندا ۔

سیس اتار پیالہ کرکے، اتے لے ہتھِ بھیکھ منگیندا ۔ہاشم ترس محبوباں آوے، اتے تاں کجھ خیر پویندا ۔

۹۵

جس دن توڑ مراداں ٹرسیں، اوہ روز وسار ن بھائی ۔ستھر گھتّ میدانے بہسن، جد کھیش قبیلہ مائی ۔

ہن جتھے دکھ پھولیں اپنا، پھر سو دھر رہگُ ن کائی ۔ہاشم نوبت واری اپنی، پھر کن کن نہیں وجائی ۔

۹۶

جس گھر وچ ہووے دکھیارا، اوہدے سبھ گھر دے دکھ پاون ۔پلکُ وساہ کرین ن تسدا، اتے اؤکھدھِ وید پچھاون ۔

جس تن وچ ہووے دل گھائل، بھلا سو تن کی سکھ پاون ۔ہاشم درد عزیز عاشق نوں، جہڑے سو سکھ گھول گھماون ۔

۹۷

جس جانی بنیا جگ جانے، توں جان سوئی دل جانی ۔کس دے نال بنے انبنتی، چھڈ میت ! ایہہ پریتِ جہانی ۔

بھلکے واؤ خزاں دی وگسی، نہ رکھسی نام نشانی ۔دم-خود ہو کر جاہ دم پورے، توں ہاشم دی زندگانی !

۹۸

جس نے ایہہ گلّ پختہ جانیں، اوہ خام ہویا وچ خیشاں ۔لذت ہجر وصل دی دیکھی، اتے کیتا حالَ پریشاں ۔

برہوں زمبور چڑھے ہر طرفوں، اوہنوں لاکھ لگاون نیئشاں ۔ہاشم ہؤں قربان اوہناں دے، جہڑے صاحب درد ہمیشاں ۔

۹۹

جس نوں طلب ہووے جس دل دی، نہیں ہٹدا لاکھ ہٹائے ۔تس دے باجھ ن ہوسُ تسلی، بھاویں سو کر گیان سنائے ۔

مجنوں باجھ لیلی خوش ناہیں، بھاویں ربّ نوں جا ملائے ۔ہاشم جان مراد عشقَ دی، اوہنوں اکھیں یار دکھائے ۔

۱۰۰

جس وچ چنگ برہوں دی پئیا، تس نال لہو مکھ دھوتا ۔شمع جمال ڈٹھا پروانے، اتے آن شہید کھڑوتا ۔

جاں منصور ہویا مد ماتا، تد سولی نال پروتا ۔ہاشم عشقَ اجیہا ملیا، جس دین مذہب سبھ دھوتا ۔

۱۰۱

جتھے بیٹھ کہاں دکھ دل دا، مینوں گھائل ملے ن کوئی ۔جس نوں کوک کہاں سوئی آکھے، 'بھیڑی لاہ پرے مکھ لوئی' ۔

تیرا حسن میری دلغیری، سبھ جگ وچ ظاہر ہوئی ۔ہاشم ایہہ احسان جانی دا، سانوں کت ول ملے ن ڈھوئی ۔

۱۰۲

جت واس قدیم کمینہ کیتا، بھیڑا پھڑیا سوگ اداسی ۔قسمت آن ستی نہیں سمجھے، پھیر کت ول ٹور لے جاسی ۔

چاوڑ چا مسافر کہیا، 'جیہڑا آن لتا شب واسی ۔ہاشم سمجھ، ن کر توں دھاوا، مت ہور پوے گلِ پھاسی' ۔

۱۰۳

جیؤ جانی تن من وچ جانی، مینوں سبھ جانی دس آوے ۔ہردم درد زبان جانی دا، ہور سخن کلام ن بھاوے ۔

پر جانی ظاہر بن ملیاں، ایہناں اکھیاں چین ن آوے ۔ہاشم آکھ دماں دیاں رٹھیاں، پر کون گلیں پرچاوے ۔

۱۰۴

جیوں جیوں بخیل چپھیرے پھردے، اتے زور پیا جگ لاوے ۔تؤں تؤں درد ہووے نت پختہ، اوہنوں اؤکھدھ وانگُ سکھاوے ۔

تیرا درد میرے وچ سینے، میری جند جاوے تد جاوے ۔ہاشم ملن حرام تنھاں نوں، جہڑا دکھ تیرے دکھ پاوے ۔

۱۰۵

جیوں جیوں نفس موڑے تقدیروں، تؤں تؤں ایہہ من بھولے ۔جمدا اٹھ اڑاون لگدا، پھرِ بھار ن ٹلدا مولے ۔

ہونی ہوگُ سوئی کجھ ہوسی، کوئی لاکھ پیا سر جھولے ۔ہاشمشاہ کر صبر بتیرا، تینوں خیر پوگُ ات سولے ۔

۱۰۶

جو ہڈّ ددھ ملائیں پالے، توں کھوہ کھسّ مال بیغانا ۔اک دن لوک تماشے کارن، تیرے دھرسن ہاڈ نشانہ ۔

تونہی نال آئی کر ٹوٹے، وچ دھر کے عشقَ بہانہ ۔ہاشم جان کہے تدھ کیتا، ایہہ جگت مسافرخانا ۔

۱۰۷

کاری روگ بیماری بھاری، میری کوئی ن کردا کاری ۔ہاری عمر جوانی ساری، تیری صورتَ توں بلہاری ۔

ڈاری لوگ کہن بریاری، بھیڑی کونج پھرے بن ڈاریں ۔واری گھول گھمائی ہاشم، میری بات پچھیں اک واری ۔

۱۰۸

قابل قدر معشوق جے ہووے، تاں دِلبر نوں لے تَرداثابت چشم رہے دِلبر دی، تاں ویکھو عاشق مَردا

اِک چاہے اِک مُول نہ چاہے، اوہ ہرگز نہیوں سَرداہاشم مول مرے نہ سپاہی، جِتھے قدر نہیں کوئی کردا

۱۰۹

کافر قہر نزول وچھوڑا، اس دلبر یار سجن دا ۔ترسن نین نہیں وس چلدا، اتے دل وچ شوق ملن دا ۔

زحمت ایس نہیں بھرواسا، مینوں اک دن ہور بچن دا ۔ہاشم باجھ عمل مر جاندا، بھیڑا عملی ایس ملن دا ۔

۱۱۰

کافر نین بھرے دل ڈنگن، جہڑے دسن بال ایانے ۔چامل چڑھن کرن نت شوخی، اتے سودا کرن دھنانے ۔

ہاسی پا دتی گل پھانسی، ہن روندی وکھت وہانے ۔ہاشم دیکھ اوہناں نیناں نوں، کوئی جانے بہت نمانے ۔

۱۱۱

کر افسوس کہیا دل گھائل، جد ڈٹھو سو چند اجالا ۔سن چندہ ! بلبل دے وچھڑے، تینوں داغ پیا گللالا ۔

لاکھ چکور گئے مر عاشق، توں اجے ن ہوئیوں کالا ۔ہاشم ملن درست تنھاں نوں، جنہاں وچھڑن زہر پیالہ ۔

۱۱۲

کردی خاک تہاڈے در دی، سبھ دور اکھیں دے پردے ۔کت بدھ خاک اساں ہتھ آوے، بھلا آکھ دتے بن سر دے ۔

کی سنیار پہاریوں کوڑا، بھیڑے دین نہیں ایہہ زر دے ۔ہاشم پہنچ ہووے در توڑیں، اتے عاشق کیوں جل مردے ۔

۱۱۳

کرے خراب فقیری تائیں، ایہہ دانش دورندیشی ۔چشم پر آب جگر پر آتش، ایہہ حرف دویں درویشی ۔

نیند حرم خوشی وچ سفنے، ایہہ رہے طریق ہمیشی ۔بنے فقیر تاں سمجھے ہاشم، ایہہ رسم قلندر کیسی ۔

۱۱۴

کرِ کرِ سمجھ رہیا وچ حیرت، مینوں دل دا بھیت ن آوے ۔کدی تاں تخت بہے بن حاکم، اتے کدی کنگال کہاوے ۔

(کدی)سخت بزار ہووے خود جسموں، سبھ کچھ خاک ملاوے ۔دیگر کون کہے میں ہاشم، جہڑا روز دوکان چلاوے ۔

۱۱۵

کون جنونّ سسی وچ وڑیا، اٹھ نٹھی شہر بھمبوروں ۔پنچھی روح سسی دا بھڑکے، اوہ باز گیا چھٹ ڈوروں ۔

تپدی خاک اتے تھل چیرے، اتے سانجھ ٹٹی دل ہوروں ۔ہاشم یار ملے مل بیٹھی، ان لال لدھا اس گوروں ۔

۱۱۶

کون قبول خرابی کردا، پر لیکھ خراب کراوے ۔کس دا جیؤ ن راج کرن دا، پر قسمت بھیکھ منگاوے ۔

اپنے ہاتھ ن سول صحیح دی، پر سولی لیکھ سہاوے ۔خوش ہو دیکھ صبر کر ہاشم، تینوں جو کجھ لیکھ دکھاوے ۔

۱۱۷

کیہی بان پئی اس دل نوں، بھیڑا ڈٹھیاں باجھ ن جیوے ۔جیوں کر مگس شکر دے پیڑے، اوہ وس کر جدا ن تھیوے ۔

آکھ دیکھاں کی حاصل دل نوں، بھیڑا تپیا روز دسیوے ۔ہاشم عشقَ کیتا دل دشمن، بھلا کون علاج کجیوے ۔

۱۱۸

کیتی پریم جَڑی سِر پائی، میرا دِل جانی کھیس لِیتانیناں نوک سُوئی دے وانگوں، میرا دل سوہنے نال سِیتا

مائے بھوت بِرہوں دا مینوں، جن مُجھ نوں مجنُوں کِیتاہاشم جیون بچن اوکھیرا، جِن زہر پیالہ پِیتا

۱۱۹

خدی گمان نفس دیاں فوجاں، نت دودھ اوہناں مکھ چووے ۔لکھ برساں تک جیوے کوئی، اتے لکھ فوجاں کھڑِ ڈھووے ۔

کرے مہم لڑے دن راتیں، تاں رعیت ن ہووے ۔کرڑی قید نفس دی ہاشم، ایتھے ہر اک اٹک کھلووے ۔

۱۲۰

کس کس طرف نہیں دل پھردا، اتے کی کجھ زور ن لاوے ۔پل وچ لاکھ کروڑ دلیلاں، اک ڈھاہوے ہور لیاوے ۔

پر تقدیر ہووے جد الٹی، اتے پیش کوئی ن جاوے ۔ہاشم نال حمایت ازلی، ہر اک چتر کہاوے ۔

۱۲۱

کتھے شاہ سکندر دارا، اتے جام گیا کت جم دا ۔تھڑکن دیؤ جنہاں دی تیغوں، اتے دھول پیا نت کمبدا ۔

ڈھونڈیاں خاک تنھاں نہیں لبھدی، ایہہ جگت برا گھر غم دا ۔ہاشم جان غنیمت دم نوں، بھلا کیا بھرواسا دم دا ۔

۱۲۲

کتھے تخت ہزارا مائی ! اتے جھنگ سیال کتھاہیں ۔رانجھا لیکھ ہیرے دے لکھیا، تاں آن ملایا سائیں ۔

متیں دین ن مڑسن مائی ! جہڑے لیکھ تتی دے آہیں ۔ہاشم ڈور پھڑے ہتھ کوئی، دوش اساں وچ ناہیں ۔

۱۲۳

کت ول یار گئے دل جانی، جہڑے روون دور گیاں نوں ۔جیوندیاں دی بات ن پچھدے، کی کرسن یاد میاں نوں ۔

سجن یاد پون دکھ بنیاں، وچ بپتا وکھت پیاں نوں ۔ایسے یار ملن سببیں، پر ہاشم اساں جہیاں نوں ۔

۱۲۴

کیوں جمیؤں کیوں پھیر ویاہیؤں، جمدی مار ن سٹی ۔دیکھ ہن حالَ سسی دا مائی ! میں پھراں پلاں(تھلاں) وچ لٹی ۔

بے تقصیر بیدوشی آزج، میں آن بلوچاں لٹی ۔ہاشم جان گوائیا سسی، پر آس امید ن ٹٹی ۔

۱۲۵

کیوں تلوار وچھوڑے والی، توں ہردم سان چڑھاویں ۔تیتھے زور نہیں، بن تیغوں، توں ایویں مارِ گواویں ۔

عاشق نال نہیں سر رکھدے، توں کس پر تیغ اٹھاویں ۔ہاشم بول نہیں، مت بولیں، کوئی ہور نصیحت پاویں ۔

۱۲۶

کوئی مل نہیں بن پارکھ، لکھ پارس اچّ کہاوے ۔ہووے ملّ معلوم لیلی دا، پر جے مجنوں مل پاوے ۔

قیمت قدر شناش گلاں دی، کوئی بھوروں جائ پچھاوے ۔ہاشم باجھ پچھانن والے، کوئی کی گن کڈھ دکھاوے ۔

۱۲۷

کجھ تقصیر اساتھوں ہوئی، جو یار سجن چت لایا ۔یا کچھ واؤ وگی کلیگ دی، کوئی جھلک متر دل آیا ۔

دل بے درد طبیباں کیتا، جو گھائل چائ بھلایا ۔ہاشم جان سعادت ایویں، جو یار سجن من بھایا ۔

۱۲۸

کل لاج قبیلہ تے ماں پیو، اساں دتا چھوڑ تنھاں نوں ۔کرنگ سریر ہویا غم تیرے، اساں منی جان تساں نوں ۔

کیوں اشکا ! کی منگنائی میتھوں، ہن سچ کہہ آکھ اساں نوں ۔ہاشم ساس ہوئے کم تیرے، کی کرسیں یاد میاں نوں ؟

۱۲۹

لب خشکی منہ زردی ورتی، اتے خون دسے وچ نیناں ۔گل نے دیکھ کیہا بلبل نوں، 'سچ حالَ اساتھیں کہنا' ۔

بلبل رو کیہا، 'دکھ تیرے، سانوں سول پوگُ ہن سہنا' ۔ہاشم پھیر کہیا گل ہسکے، 'بھلا آکھ سدا تدھ رہنا' ۔

۱۳۰

لوکاں بھانے وسطی وسدی، اتے سبھ جگ آکھے وسدی ۔آ وسطی تن من دی وسطی، اتے دل میرے دی وسدی ۔

جس وسطی نال ن وسطی سانوں، اس وسطی نال ن وسدی ۔ہاشم یار ملے وچ بیلے، اوہ باغ بہاریں وسدی ۔

۱۳۱

مائی ! درد فراقَ ماہی دے، اج بال چکھا وچ پائی ۔سوز فراقَ دیوانی کیتی، میری جان لباں پر آئی ۔

غرضی یار دکھاں توں ڈریا، مڑ وات ن پچھیا کائی ۔ہاشم باجھ لگے تن اپنے، کون جانے پیڑ پرائی ۔

۱۳۲

مینوں خبر نہیں دِل میرا، ایس جاگھ وِچّ وس دااچرج دیکھ عشق نُوں یارو، بھلا کون کوئی جا دس دا

نہ اوہ دام وچھائی وس دی، جت جا میرا دِل پھس داہاشم بہت دیوے دُکھ پیارا، دِل پھیر اُتے ول نس دا

۱۳۳

میں وچ دوش نہیں کجھ مولوں، مینوں لکھیا لیکھ بھلاوے ۔جس نوں نفر کیتا تقدیروں، اوہنوں صاحب کون بناوے ۔

میں گڈی آں ہتھ ڈور کھڈاری، مینوں کھواہش نال پھراوے ۔ہاشم نرد ہووے وس پاسے، اوہنوں پرط پوے وس آوے ۔

۱۳۴

میں وچ تیں وچ صاحب میرے، مینوں فرق ایہو دس آوے ۔کراں گناہ کروڑ ہمیشاں، مینوں ذرا حیا ن آوے ۔

بھی درکار ن سٹدا در توں، اتے پالے، عیب چھپاوے ۔ہاشم دیکھ چھنار سوہاگنِ، اوہدا پاپ سبھے چھپ جاوے ۔

۱۳۵

مجنوں ہوئِ بہاں دن اکسے، جے یار لیلی ہتھ آوے ۔کامل یار بے صدق عاشق نوں، اوہ صادق چا بناوے ۔

ناقص تبء محبوب جے ہووے، کی عاشق عشقَ کماوے ۔ہاشم عاشق ہون سکھالا، پر ہویا محبوب ن جاوے ۔

۱۳۶

مجنوں کوک کونجاں دی سن کے، اس کہیا، 'دکھ ن پھولو ۔دکھ جر کے مر مر کے ڈر کے، تسیں یار سجن نوں ٹولو ۔

جھبّ دے کوک تساڈی سنسی، پر جے کجھ مونہوں ن بولو ۔ہاشم یار چڑھاوگُ سولی، تسیں کہن پریم ن کھولہو' ۔

۱۳۷

مجنوں ویکھ لہو بھر رویا، جد مویا پتنگ سپاہی ۔شاباش ! یار ملیوں اک واری، مڑ صحیح ن پیڑ جدائی ۔

اسیں خراب ہوئے مل وچھڑے، ہن پھراں خراب جدائی ۔ہاشم ویکھ مویا دل جلیا، ایہناں کی سر پوت اٹھائی ۔

۱۳۸

ماؤ بیٹھ سسی نوں آکھے، 'کیوں کملی پھریں دیوانی' ؟'مائی روگ لگے تاں جاننے، کی جانیں پیڑ بیغانی ۔

جس دے نال میری جند اٹکی، سوئی چھوڑ گیا دل جانی ۔ہاشم صبر ن آوے دل نوں، میری وسری ہوش جہانیں' ۔

۱۳۹

مر مر لاکھ گئے نہیں سمجھے، وچ جھنگ سیال سلیٹی ۔ہیر جہان ستی جگ جانے، جد بنی اناتھ چکیٹی ۔

پارس عشقَ جنہاں نوں ملیا، اوہدی جات شکل سبھ میٹی ۔ہاشم ہیر بنی جگ-ماتا، بھلا کون کنگال جٹیٹی ۔

۱۴۰

میگھلیا وسّ بھاگیں بھریا، تدھ اوجھڑ دیس وسائے ۔بھلکے پھیر کریں جھڑ ایویں، میرا پیا پردیس نہ جائے ۔

کد اسباب اجیہے ملسن، کوئی قسمت آن ملائے ۔ہاشم جان ملن دا لاہا، پھیر وچھڑے کون ملائے ۔

۱۴۱

محنت پھیرِ مڑے کجھ ساڈی، جے آن دیکھے جن لائی ۔جیوں جیوں زرد ہویا رنگ میرا، مینوں ہسدی دیکھ لکائی ۔

روشن وانگُ محبوباں ناہیں، جو قسمت ہوسُ سوائی ۔ہاشم شاہ پر سیرت پاوے، جس صورتَ خاک رلائی ۔

۱۴۲

میویدار درخت میوے دے، جس دل نوں حرص ن کائی ۔خاطر اوس پیا اس جھکنا، سر بھاری پوت اٹھائی ۔

سرو قبول ن کیتا میوہ، انوں حرج مرض نہیں کائی ۔ہاشم حرص لگا ن کائی، اتے سرو ہویا اوہ بھائی ۔

۱۴۳

مورکھ لوک سدا سکھ سوندے اتے کماون پیسہ ۔نہ کچھ اوچ نہ نیچ پچھانن اتے پریم نہ جانن کیسا ۔

شالہ! نج ہووے چترائی، سانوں خوار کیتا تدھ ایسا ۔ہاشم کاٹ پریم کریندا، جس ہوش ہووے وچ جیسا ۔

۱۴۴

مدت حرص جہانے والا، میں دل وچ باغ لگایا ۔اوڑک باغ ہویا پروردا، اتے نال گلاں سبھ چھایا ۔

جا میں مشک لیا ہر گل تھوں، اتے بھیت چمن دا آیا ۔ہاشم بیبنیادی والا، مینوں مشک گلاں تھوں آیا ۔

۱۴۵

مشکل نیہُ لگاون ہویا، مینوں دھر دھر لاکھ نہورا ۔سر گٹھڑی لکھ کوس ٹکانا، اتے تن وچ تنک ن زورا ۔

دلبر یار بنی گلّ اوکھی، مینوں بہن ن ملدا بھورا ۔'ہاشم نیہں ن لائیؤ کوئی'، کوئی دیوے شہر ڈھنڈورا ۔

۱۴۶

ن بن شیخ مشائکھ پیارے، ن پہن لباس فقر دا ۔بن گھائل مر دل دی پیڑے، ایہہ تؤں تؤں دام مکر دا ۔

توڑ خدی خدبینی نفسوں، اتے چاکر رہِ دلبر دا ۔ہاشم درد جگر وچ بوٹا، کر گریا نال پروردا ۔

۱۴۷

ندیاں نیر رہن نت تارو، ایہہ کدی ن ہوون ہلکے ۔جو جل اج گیا اس راہیں، سو پھیر ن آوے بھلکے ۔

ایویں رہگُ جہان وسیندا، پر اسیں ن رہساں رلکے ۔ہاشم کون کرگُ دلبریاں، اس خاک مٹی وچ رلکے ۔

۱۴۸

نہیں قبول عبادت تیری، توں جب لگ پاک ن ہوویں ۔آمل خاک پوے مل تیرا، پر جب لگ خاک ن ہوویں ۔

نہیں بے باک کدی ہر طرفوں، جد بے اتفاق ن ہوویں ۔ہاشم کی مشتاق عشقَ دا، بھلا جاں سر تاک ن ہوویں ۔

۱۴۹

نہ کر ہور علاج طبیبا، مینُوں فرق نہیں اِک تِل دادارو سیک لگے جَل جائے، جد بَھڑک اُٹھے دُکھ دِل دا

مائے مگر ہر ول عشق دا، مینُوں پَلک ٹکاو نہ مِل داہاشم شوق بتیرا دِل نوں، پر ہرگز رزق نہ ہِل دا

۱۵۰

ن کجھ متھی ن متھ کے ٹریا، اسیں ٹور دتے ٹر آئے ۔بیتن جوگ ن متھکے بیتے، ان آپے چا بہائے ۔

کچھ معلوم نہیں ایہہ حکمتِ، پھر کت ول توڑ لجائے ۔ہاشم آپ کرے سبھ کاراں، وچ حکمت اسیں بنائے ۔

۱۵۱

اوس گلی دلبر دی جائیے، پر اسپ جنونی چڑھ کے ۔دکھاں نال کھڑاں ہم راہی، اتے نال سکھاں دے لڑ کے ۔

آکھن لوک دیوانہ آیا، اتے ڈھول وجاون رل کے ۔ہاشم خوب ہوئے دل راضی، بھائی اوس گلی وچ وڑ کے ۔

۱۵۲

پل پل شوق زیادہ ہووے، دل رکھدا پیر اگاہاں ۔دن دن عمر نکھٹدی جاوے، اوہدی مڑدی واگ پچھاہاں ۔

دوویں تھوک نہیں وس میرے، ایہو بنی لچار اساہاں ۔کی سر کاج ہووے کہہ ہاشم، جتھے اک گھر لاکھ صلاحاں ۔

۱۵۳

پاندھی ! منّ سوال اساڈا، جھبّ گھنّ سنیہا جائیں ۔میہیں چارے تے چاک سداوے، وچ بیلے بربر کاہیں ۔

تتی ہیر اڈیکے تینوں، اوہ وال کھلے وچ راہیں ۔ہاشم آؤ ن آؤ اساتھے، پر منوں وساریں ناہیں ۔

۱۵۴

پارس نال ملے رنگ بدلے، کرن عاشق صاف نگاہوں ۔جس جا سیر کرن نت عاشق، اوہ دور مکان پھناہوں ۔

دلبر لکھ تصویر عاشق دی، ہوویں محکم کوٹ پناہوں ۔ہاشم پاک گھنے لکھ دفتر، کرن عاشق پاک غناہوں ۔

۱۵۵

پھلیا باغ لگے ٹر آون، کئی پنچھی لاکھ ہزاراں ۔اک بولن اک کھاون میوے، اک بنھ بنھ بہن قطاراں ۔

ہاکر مار اڑا ن مالی ! بن عاشق ویکھ دیداراں ۔ہاشم باغ سمبھالیں اپنا، جد پھرسن ہور بہاراں ۔

۱۵۶

پچھِ پچھِ پوے ن بپتا مولے، اتے پچھِ پچھِ ہون ن روگی ۔لکھیا لیکھ کرے سرگرداں، کیا جوگی کیا بھوگی ۔

سو کس طور بنے سکھیارا، جس لیکھ لکھایا سوگی ۔ہاشم لیکھ بناوے جوگی، اتے لیکھ بناوے سوگی ۔

۱۵۷

ربّ دا عاشق ہون سکھالا، ایہہ بہت سکھالی بازی ۔گوشہ پکڑ رہے ہو صابر، پھڑ تسبیح بنے نمازی ۔

سکھ آرام جگت وچ شوبھا، اتے دیکھ ہووے جگ راضی ۔ہاشم خاک رلاوے گلیاں، ایہہ کافر عشقَ مزاجی ۔

۱۵۸

رہے بجھائِ ن بجھی مولوں، خبر لکائی اکھیں ۔اوڑک بھڑک اٹھی نہیں رہیا، ایہہ اگّ چھپائی ککھیں ۔

ہن بھڑکے مڑ دیکھاں بجھے، تاں دوزخ پیسن اکھیں ۔ہاشم ہون شہید شہادت، جنہاں زہر عشقَ دی چکھی ۔

۱۵۹

راہی ! یار رانجھن نوں آکھیں، کوئی حالَ اساڈے دردوں ۔جچرگُ جوگ کماویں جے توں، جان تلی پر دھردوں ۔

مرزے یار وانگوں دن اکسے، یا ملدوں یا مردوں ۔ہاشم شاہ اج جان بچاویں، جاں توں نیہں ن کردوں ۔

۱۶۰

رکھیں لاج نلاج ن ہوویں، اتھے پیر پچھانہ ن دھرنا ۔زہر خوراک بنائی آپے، اتے مرن کولوں کیوں ڈرنا ۔

چمکی چکھا عشقَ دی پیارے، اتھے ثابت ہو جلِ مرنا ۔ہاشم ایہو کمال عشقَ دا، جو سیس اگانہاں دھرنا ۔

۱۶۱

رانجھا ہیر نے ربّ کر جاتا، لوک دیئ نصیحت تھکے ۔آوازرد چکیٹے آکھن، مینوں کھیش قبیلہ سکے ۔

کعبہ تخت ہزارا مائی ! لوک ٹر ٹر جاون مکے ۔ہاشم آکھ ہٹاؤ ن سانوں، اگے ملن چپھیریوں دھکے ۔

۱۶۲

رانجھا یار غریب ہیرے دا، اون کنّ پڑوائے تاہیں ۔صاحب زور ن آجز ہندے، اوہ زور کرن سبھ تھائیں ۔

اوہو عشقَ کمایا مرزے، پر آجز نویو ناہیں ۔ہاشم عشقَ کنگالاں والا، نت روون مارن آہیں ۔

۱۶۳

رو رو نال پھہار نیناں دی، میں نت رکھاں جھڑ لائیں ۔جاتو مول نہیں کت پانی، ہتھوں غم دی ویل ودھائی ۔

آتش سوز ہجر دے والی، میں چاہاں چا بجھائی ۔ہاشم خبر نہیں پھل کیہا، اس ویل پوے رت آئی ۔

۱۶۴

راوت فیل نشاناں والے، لکھ وسدے کوئی ن تکے ۔چاک چگاوے مجھیں سوئی، ویکھ جہان ن سکے ۔

ماؤ روز دیوے لکھ طعنے، اتے باپ دواوے دھکے ۔رانجھا مان نمانی ہاشم، اوہنوں ربّ سلامت رکھے ۔

۱۶۵

روون نین جنہاں دے کارن، سو سکدیاں ملن کداہیں ۔جنہاں نال ن مطلب کوئی، سو دسن سنجھ سباہیں ۔

ترسن نین ن چلدے زورے، میرے دل وچ بھڑکن بھاہیں ۔ہاشم آکھ لچار کی کریئے، ایہو ورد اساڈا آہیں ۔

۱۶۶

رکھاں پون پرنداں ڈٹھی، جو نال یوسف دے بیتی ۔پاس یکوب یوسف دی برتھا، پر کسے بے درد ن کیتی ۔

ہوت بہوش سسی دے ہالوں، ان زہر تھلاں وچ پیتی ۔ہاشم کس کس نال ن کیتی، اس برہوں بدرد عنیتی ۔

۱۶۷

رخصت ہو گل گئے چمن تھوں، اتے سہن سمبھالے کھاراں ۔کؤآ نظر ن آوے کوئی، جتھے بلبل ساہن ہزاراں ۔

کر لے یاد سگوفا سبزی، اتے اوہ خوش-روز بہاراں ۔ہاشم سوز اکھیں وچ آوے، دیکھو برسن عبر بہاراں ۔

۱۶۸

ساجن طوق زنجیراں باجھوں، جند کردے قید سوائی ۔جس دے بھاگ نصیبوں جاہن، سو پیندا نیند پرائی ۔

لکھ لکھ عیب ملن وچ اٹھدے، سر تہمت ویر جدائی ۔ہاشم عشقَ خراب کریندا، اتے وسدی لاکھ لکائی ۔

۱۶۹

ثابت ہو جس درس عشقَ دے، لیا حرف حقیقت والا ۔ہو بے زار گیا سبھ علموں، اتے تسبیح رہی ن مالا ۔

ن اوہ سگھڑ ن مورکھ ہویا، ان پھڑیا پنتھ نرالا ۔ہاشم زہد عبادت کولوں، ان مطلب لیا سکھالا ۔

۱۷۰

صاحب درد ہمیشہ دردی، جنہاں درد رہے نت مگرے ۔ساجن ہون طبیب دکھاں دے، جہڑے روگ گواون سگرے ۔

پر ایہہ نین جویں جیوں دیکھن، بھیڑے تؤں تؤں ہون بسبرے ۔ہاشم نین ہمیش ازاری، جہڑے جا پئے وچ قبرے ۔

۱۷۱

صاحب حُسن ڈٹھے سب کھوٹے، اَتے کھوٹ کماون پیسہنہ کچھ اوچ نیچ پچھانن، اَتے پریم نہ جانن کیسا

شالا نَج ہووے چترائی، سانوں خوار کیتا تُدھ ایساہاشم کاٹ پریم کریندا، جس ہوش ہووے وِچّ دا

۱۷۲

سئیؤ نی ! مغرور ن ہوئیؤ، تساں کیوں گھر بار بھلائے ۔ماپے لاڈ لڈاون سانوں، پر کارن دین پرائے ۔

ایہو چھوڑ گئیاں کل ویہڑا، جنہاں جا گھر ہور بنائے ۔ہاشم جان ڈھونڈاؤ ساڈی، کوئی اج آئے کلّ آئے ۔

۱۷۳

سمبھل کھیت میاں ! عشقے دا، ہن نکلی تیغ میانوں ۔کھا مر زہر پیاری کرکے، جے لئی حئی ایس دکانوں ۔

سر دیون دا ساک عشقَ دا، ہور نفع ن عقل گیانوں ۔ہاشم باجھ میاں نہیں بندی، اساں ڈٹھا وید کرانوں ۔

۱۷۴

سردی مار رکھی پر سوہنی، باجھ میاں نہیں سردی ۔دردی درد فراقَ رننجانی، میں خاک تساڈے در دی ۔

جردی جان جگر وچ پیڑاں، میں وانن چکھا دے جلدی ۔بھردی نین تتی نت ہاشم، میں باجھ تساں دکھ بھردی ۔

۱۷۵

سسی پلک ن ہسی دسی، جہڑی کٹھی تیغ نظر دی ۔سن لوکا ! کوئی میرا ہوکا، میں مٹھی نیند فظر دی ۔

ہائے ! میں مر جاندی جمدی، کیوں سہندی سول ہجر دی ۔ہاشم لیکھ سسی دے آہے، ایہو قسمت قلم قہر دی ۔

۱۷۶

سو آفت لکھ گھمنوانی، اس پریم ندی وچ وڑیاں ۔خاصے یار ن اترے کوئی، بن صادق صدق ن تریا ۔

دلبر یار وساریں ناہیں، اساں دردمنداں دکھ بھریاں ۔ہاشم تانگھ ن جاوگُ تینڈی، میرے ایس دلوں بن مریاں ۔1

۱۷۷

سَو دُکھ تیری جِند نِت جردی، جیہڑا پَلگ نہ جاوے جَریابھاری زخم جِگر دا ہویا، دیکھ خُون اکھیں وِچّ بھریا

میرا حال پِچھانے مَجنُوں، جس دُکھ لیلیٰ دا جَریاہاشم یار ملگ کے ناہیں ،میرا ہِجر ولوں دِل ڈریا

۱۷۸

ساون دی گھٹ دیکھ پپیہا، اوہ روئِ کہے دکھ بینوں ۔'سن توں یار ! پٹن کرلاون، ایہہ بھا پیا نت میں نوں ۔

پر گرجن برسن اج والا، مڑ ہاتھ ن آوگُ تیں نوں ۔ہاشم کر احسان متراں سر، اتے کر سکنا پھیر کیں نوں' ۔

۱۷۹

شیریں نام دھرایا شیریں، پر کوڑی زہر ہمیشہ ۔دیندی زہر پیالہ بھر کے، نت خون کرن دا پیشہ ۔

اک گھٹّ لے فرہاد وچارا، اوہ مار مویا سر تیسا ۔ہاشم پیار محبوباں والا، اتے گلّ گلّ دا رگ ریسا ۔

۱۸۰

صدق ملاح سمندر تارے، جتھے پنچھی پار ن ہووے ۔جس دا تھاؤں مکان ن ربّ دا، تس جا حضور کھلووے ۔

اوڑک مل پوے جیہڑا موتی، نت مزغاں نال پرووے ۔ہاشم تانگھ ہووے جس دل دی، اوہی جد کد حاصل ہووے ۔

۱۸۱

سر سر رزق جنہاں دا لکھیا، سوئی سر سر عمر لکھائے ۔نہ اوہ گھٹے گھٹائے مولوں، ن اوہ ودھے ودھائے ۔

کر گزران اتے ول جاسی، مڑ پھیر اتے چت جائے ۔کی سر بھار پیا متراں دے، اوہناں من توں چا بھلائے ۔

۱۸۲

سو بھلوان بہادر ناہیں، جیہڑے ڈھاہ لین کجھ مستاں ۔صاحب زور ہووے جگ جانے، جیہڑے دل نوں دین شکشتاں ۔

مول گوا لیا میں جیہیاں، اساں شہوت حرص-پرستاں ۔صاحب مغز رسیلے ہاشم، جہڑے کر کر بہن نشستاں ۔

۱۸۳

سولاں صلی تے درداں ملی، میں پھراں دیوانی جھلی ۔برہوں لٹی تے ساتھوں ٹٹی، میں کملی پھراں اکلی ۔

مجنوں جا مویا جس ویہڑے، میں موت وہاجن چلی ۔ہاشم یار ملے لکھ پاواں، میری محنت پوے سولی ۔

۱۸۴

سوز فراقَ نصیب اساڈے، اسیں بھا پیا دکھ بھرساں ۔جے دن رات رہاں وچ جل دے، اتے وانگ پپیہے ترساں ۔

کر تکبیر ہووے چھٹکارا، مت موت حرام ن مرساں ۔ہاشم طلب رہے جند جائے، تاں میں شکر ہزاراں کرساں ۔

۱۸۵

سندر سگھڑ رسیلے رسیے، کئی کوٹ جگت وچ آئے ۔لکھ ہاتھی لکھ لشکر گھوڑے، وچ ایس زمین سمائے ۔

پل چھل خواب خیال وسیرا، کوئی کاس پچھے بھل جائے ۔ہاشم کس جیون بھرواسے، اسیں متراں چا بھلائے ۔

۱۸۶

سن جانی ! تینوں لکھ جانی، پر جان نہیں ول جانی ۔کس نوں ہوگُ شناس اجیہا، جیہڑی ہوگُ خراب دیوانی ۔

تیرے شوق پچھے دل میرے، سبھ جانی خلق بیگانی ۔ہاشم وار سٹی جند میری، تیرے عشقَ اتوں قربانی ۔

۱۸۷

سن اشکا ! جیہی تدھ نے کیتی، توں روز ستاویں مینوں ۔اک واری نت آویں میرے، میں خوب رلاواں تینوں ۔

تیرے جیڈ بے وفا ن کوئی، میں کوک سناواں کیں نوں ۔ہاشم خوار کریں جگ سارے، توں یار بناویں جیں نوں ۔

۱۸۸

سٹاں وار بہشتاں لوکاں، جے ریس کرن دلبر دی ۔دوزخ کون کرین برابر، اس آتش سوز ہجر دی ۔

دوویں تھوک نہیں وس میرے، میں گرد تساڈے در دی ۔ہاشم راہ اجیہے پائی، میں عشقَ تیرے دی بردی ۔

۱۸۹

تاں جانے دل ہووے جانی، جد جان جانی ول ہارے ۔حکمتِ جان سپاہی والی، جو آپ مرے سوئی مارے ۔

کس نوں پار کرے منتارو، جہڑا آپ ترے سوئی تارے ۔ہاشم ویل قدیم کمینہ، اساں جاچ ڈٹھا دن چارے ۔

۱۹۰

تَیندا عِشق قصائی وڑیا، جِن نال سولاں دِل بھریااِک دِن برس جیہا ہو بِیتے، میں عُمر ولوں بہت ڈریا

دِلبر یار ڈِٹھے مُکھ تیرے، میرا تَن مَن تھیوے ہریاہاشم راہ اُڈیکے تیرا، کدی آ پِل بھاگی بھریا

۱۹۱

تینوں حسن خراب کریندا اتے مینوں سمجھ ستایا ۔جیوں جیوں آن حسن دی سمجھاں، مینوں اٹھدا سول سوایا ۔

سبھے درد ڈٹھے سبھ دکھیئے، جنہاں سمجھ سمجھ دکھ لایا ۔آتش سمجھ جنہاں وچ ہاشم، اوہناں اپنا آپ جلایا ۔

۱۹۲

تن دی چکھا بناوے دیپک، تاں آن جلن پروانے ۔بھامبڑ ہور ہزاراں دسدے، پر اوس پتنگ دیوانے ۔

اپنا آپ بناوے کولے، سو کرے کباب بغانے ۔ہاشم راہ دلاں دے دل وچ، ہور جادو سحر بہانے ۔1

۱۹۳

تانہی رہی کچجی کملی، میں جائ کراہیں وتی ۔کیوں کر کہے ن ساس اسانوں، 'نج آویں اؤت نکھتی' ۔

کڑیاں داج بنا لیو ای، میں چرخے تند ن گھتی ۔ہاشم کونت وساون پیسی، میں ہوواں لاکھ کپتی ۔

۱۹۴

تن پنجر دل گھائل قیدی، مینوں ثابت دیکھ ن پھردی ۔بے پرواہی تے ظالم پھاہی، مینوں رڑکے سانگ نظر دی ۔

جھڑکن لوک ن تھمن ماپے، میں کملی کسے ن دھر دی ۔صاحب درد ملے کوئی ہاشم، میری سمجھے پیڑ ہجر دی ۔

۱۹۵

تن ٹٹدا من تپدا مائی ! مینوں اکھیں پیڑ ویکھن دی ۔اک پل سہن وچھوڑا بھاری، کیہی پئیا بان ملن دی ۔

ایہیؤ ورد عبادت میری، ترسن جلن بلن دی ۔ہاشمُ ہوگُ قبول تداہیں، جد پھرگُ دلیل سجن دی ۔

۱۹۶

تسبیح بہت بھواون کسبی، جنہاں دام فریب بچھایاکر کر گیان سناون سیانیں، نہ اَت بدھ شیخ کہایا

مطلب جو اسرار الٰہی، اوہناں ہرگز مُول نہ پایاہاشم سمجھ رسائین والے، کدی اپنا آپ لکھایا

۱۹۷

توں ہیں یار توں ہیں دکھدائی، اتے درد دھکھے نت تیرا ۔پرسوں آکھ لگائیؤئی برسوں، اتے بیٹھ رہؤں گھت ڈیرہ ۔

قول قرار سنبھال پیارے، اتے آؤ کدی گھتّ پھیرا ۔ہاشم باجھ تساں سکھ ناہیں، ہور وسدا ملکھ بتیرا ۔

۱۹۸

توڑِ جنزیر شریعت نسدا، جد رچدا عشقَ مجازی ۔دل نوں چوٹ لگی جس دن دی، اساں خوب سکھی رندبازی ۔

بھجّ بھجّ روح وڑے بتخانے، اتے ظاہر جسم نمازی ۔ہاشم خوب پڑھایا دل نوں، اس بیٹھ عشقَ دے قاضی ۔

۱۹۹

ٹٹا مان پئے پر-ملکیں، ربّ سٹے دور دراڈے ۔قسمت خیال پئی بن دشمن، ہن کی وسّ یار اساڈے ۔

دلبر یار وساریں ناہیں، اسیں جت کت حالَ تساڈے ۔آزز لوک نمانے ہاشم، نہیں شرکت نال خدا دے ۔

۲۰۰

وار سٹاں میں 'میں' ہن لوکا ! جنہاں رانجھن کھڑیا بیلے ۔ندیاں نالے تے بسیئر کالے، اتے بیلے شیر بگھیلے ۔

اکھیں یار دسے گھر آوے، بھیڑی رات پوگُ کس ویلے ۔ہاشم مان حیاتی میری، ربّ چاک سلامت میلے ۔

۲۰۱

وگ وائے ! پر سارتھ بھریئے، توں جائیں تخت ہزارے ۔آکھیں یار رانجھن نوں ملکے، اسیں توں کیوں منو وسارے ۔

بسّ ہن نیہں کما لئیوئی، ایہو چا آہا دن چارے ۔ہاشم ایس محبت بدلے، سانوں خوار کیتا جگّ سارے ۔

۲۰۲

وگ وائے ! وننج تخت ہزارے، ول جائیں برا خدائی ۔ہیر نلاج نمانی ول دا، کوئی دئیں سنیہا جائی ۔

دو دن چار مہیں میاں رانجھا، تدھ کیتی بہت کمائی ۔ہاشم سار دکھاں دی جانے، جنہاں دن دن چوٹ سوائی ۔

۲۰۳

وید کتیب پڑھن چترائی، اتے جپ تپ سادھ بناوے ۔بھگویں بھیس کرن کس کارن، اوہ مندا کھوٹ لکاوے ۔

مورکھ جا وڑے اس ویہڑے، اتے اؤکھدھ جنم گواوے ۔ہاشم مکت نصیب جنہاں دے، سوئی دردمنداں ول آوے ۔

۲۰۴

وچھڑے یار ن ہوسُ اندیشہ، بھیڑا کھوٹا یار عنیتی ۔مورکھ یار پچھے جل مرنا، کن عاشق ایہہ گلّ کیتی ۔

جن ہتھ نال بمنسپھ جوڑے، ان جد کد کھیل ن جیتی ۔ہاشم نیہں ٹٹے تس یاروں، ایہو لاکھ وٹی سکھ بیتی ۔

۲۰۵

وارث بن بیٹھی جو آہی، اتے ایس سہاوے گھر دی ۔اوڑک دیس نکالا ملیا، گئی ہاتھ متھے پر دھردی ۔

سمبھل سیس گنداویں مئیے ! کوئی پرتیت نہیں اس در دی ۔ہاشم ہوئی سوہاگنِ ورلی، اتے تان رہے سبھ کردی ۔

۲۰۶

یا کر ہار شنگار پیارے، سکھ ناز نیاز زنانیں ۔یا بن مرد فتح کر دشمن، گھتّ سر وچ خاک میدانیں ۔

یا کر صبر فقیری پھڑکے، چھڈ حرص ہوائ جہانیں ۔ہاشم کی خوش ہون پیارے، بھلا ہمت دیکھ بیغانی ۔

۲۰۷

زحمت تاپ سراپوں بچدے، اتے ظالم ڈاہ متراں دے ۔دارو باجھ دیدار جانی دے، اساں بہت ڈٹھے مر جاندے ۔

پلکُ دیدار ن حاصل ہووے، تاں پئے مردے مریاں دے ۔ہاشم شاہ شہید نیناں دے، سوئی ہون نصیب جنہاں دے ۔

۲۰۸

زہد عبادت چاہے دیکھے، نہیں ہرگز دھیان ن کردا ۔شاہ منصور چڑھایا سولی، اتے یوسف کیتو سو بردا ۔

کس گلّ دے وچ راضی ہووے، کوئی بھیت نہیں اس در دا ۔ہاشم بے پرواہی کولوں، میرا ہر ویلے جی ڈردا ۔

کسے لفظ تے کرسر لے جاؤ یا دباؤ تے اوہدے معنی ویکھو۔