Verse 1کی تکدا دروازے اتے بیٹھے چالی بندے زینت زیور لگے سبھناں سونے موتی سندے
Verse 2صیف-ملوکے بندے تکّ کے ہوئی ذرا تسلی کہے سلام-علیکم اوہناں نوں نال عبارت بھلی
Verse 3کیہا علیک-سلام اوہناں نے مٹھیآں نال زباناں سن آواز شہزادے جاتا ہے آواز زنانہ
Verse 4مرد نہیں کوئی وچ اوہناں دے ہین ایہہ سبھو ناریں متّ کوئی مکر فریب نہ ہووے ربا خیر گزاریں
Verse 5ویکھ جوان رنگیلا سندر اوہناں بھی دل جھڑیا شہزادے تھیں پچھن لگیاں کون کوئی توں اڑیا
Verse 6آدم ہیں یا جناں وچوں یا کوئی نور فرشتہ بہت پسند اسانوں آیا تیری شکل سرشتا
Verse 7صیف-ملوک کیہا میں بندہ نسل آدم دی وچوں شہر مصر دا میں شاہزادہ پشت عاصم دی وچوں
Verse 8ہک مصیبت میں پر ورتی پیا قضیہ بھارا جنگل تے کوہ قاف سمندر اس تھیں پھراں بیچارا
Verse 9سن کے گلّ شہزادے والی ہوئی اوہناں نوں شادی صیف-ملوکے نوں لے گئیاں کول اپنی شہزادی
Verse 10صیف-ملوک جدوں جا پہتا ڈٹھوسُ تخت شہانہ موتیں لعلاں نال جڑاؤ عجب صفحہ سبھ خانا
Verse 11خدمتگار چو ترفیں ناریں ہر ہک پھلّ گلابی تخت اتے شہزادی بیٹھی چہرہ وانگ متابی
Verse 12جوڑا ابرو تاک بہشتی یا دو سخت کماناں پھمنیاں جیوں تیر خدنگی گھائل کرن جواناں
Verse 13ظالم نین کٹاراں وانگر وچ کجلے دی دھاری ویکھن والے نوں کر غمزا سانگ کلیجے ماری
Verse 14سوہنا قد سہیلی دیہی نازک شاخ چمبیلی چنن-بدن گلے وچ بشیئر زلفاں عطر پھلیلی
Verse 15زیور زیب شہانہ لگا کون شمار سناوے جت ولّ منہ کرے جھلکاروں کمب کلیجہ جاوے
Verse 16شوکت شان ڈٹھا شہزادے ہویا ترت سلامی اوہ بھی اٹھ کھلوتی تختوں کر تئزیم تمامی
Verse 17بیبی دا دل ویکھدیاں ہی ہو گیا بے-وسااٹھ ملی گل لگّ شہزادے جیوں شربت نوں تسا
Verse 18تختے اپر چاڑھ بہایا آپوں بیٹھی جڑ کے شہزادے نوں ویکھ نہ رجدی نظر کرے مڑ مڑ کے
Verse 19خدمتگاراں نوں فرمائیوسُ جلد طعام لیاؤ اس مہمان پیارے تائیں میرے نال کھلاؤ
Verse 20حاضر آن ہوئے اس ویلے کھانے بادشہانےکلیئے یخنی اتے متنجن ہور پلا زردانے
Verse 21مغز بادام منکا پستا میوے ہور بھلیرےخوب اچار مربعے مٹھے کھانے چنگ چنگیرے
Verse 22کھانے کھا ہوئے جد فارغ آیا جیؤ ٹکانے شہزادے تھیں پچھدی بیبی کر سخن من بھانے
Verse 23دسیں توں شاہزادہ کوئی ہوسیں بھی شاہزادہ سچ سنا کس پاسیوں آئؤں کدھر جان ارادہ
Verse 24صیف-ملوک کیہا سن بیبی سوہنی شاہ زناں دی غلط کیہا میں شاہ زناں دی حاکم ملک مناں دی
Verse 25شاہ عاصم سلطان وڈیرا مصر شہر دا والی میں ہاں بیٹا اس دا بیبی گلّ دساں سچ والی
Verse 26حالَ حقیقت جتنی آہی ساری کتھا سنائی آس ملن دی جھاگ قضیے آ پہتا اس جائی
Verse 27سن کے گلّ کہانی ساری بیبی نے دل لائی شہزادے دی خاتر کارن مجلس خوب سہائی
Verse 28ہر ہر جائی اد دھکھائے خوشبو گئی وچ کوہاں بھر پیالے مدھ پیالے ہکس دوئیے نوں دوہاں
Verse 29راگ سہاگ بیبی من بھاندے کڑیاں سوہلے گاون چٹکی تاڑی مانگھا پوندا ساز آواز سناون
Verse 30این شہانہ چین مچایا خوشی رین گزاریبیبی شہزادے سنگ کیتی الفت بے-شماری
Verse 31بہت محبت تے دلداری جاں کیتی اس بیبی صیف-ملوک ہویا دل کھلا ڈاہڈا سفر-غریبی
Verse 32بیبی کولوں پچھن لگا نال زبان کراری کی کجھ نام اس دیس دا ملکہ کس دی ہے سرداری
Verse 33بیبی کیہا سن شہزادے تیری جان سلامت حسن اقبال چڑھاوے ہوون تیکر روز قیامت
Verse 34نام ملک دا شہر-زناں دا وسن اس وچ ناریں میری ہے سرداری اتھے دھرتی شہر بازاریں
Verse 35صیف-ملوک کیہا ایہہ نگری دیس ملک ہک واری شیر کرن دی خواہش مینوں تکاں پھر کے ساری
Verse 36جو جو ایس زمیں وچ ہووے سیر اجائب کائی جاواں تکّ افسوس نہ لگے جاں کوئی گلّ سنائی
Verse 37بیبی ترت منگائے گھوڑے خاص سواری والے چوکڑیاں تھیں رجن ناہیں وانگوں ہرن غزالے
Verse 38پوئیے وچ نہ پہنچن دندے واؤ پرے دی تائیں پیراں نال نہ لگن دندے دھوڑ کھرے دے تائیں
Verse 39بیبی تے شاہزادہ دوئیے ہوئے سوار شتابی خدمتگاراں بنھ قطاراں کنج کے پھڑی رکابی
Verse 40شہر بازاراں جائ مکاناں ہر کوچے ہر پل وچ شہزادے نوں پھیرے بیبی باغ بہار جنگل وچ
Verse 41جت ولّ نظر کرے شاہزادہ دسن سندر کڑیاں ہر جھاکی ہر محل چوبارے واہ شکلاں دل پڑیاں
Verse 42ہر ہر گرپھے دے وچ تکدا ہر ہر قدم صنم نوں ہر کوچے سے سچے سوہنے تمّ کرن جو غم نوں
Verse 43ہر ہٹی ہر ویہڑے اندر ہر ہر گلی بنیرےحوراں جیسی صورتَ ناریں تکیاں شاہ چوپھیرے
Verse 44ناریں کھٹن ناریں کھاون ناریں سبھ کم چائے اوہو خریدن اوہو ویچن خوب بازار سہائے
Verse 45ہک نڈھیاں ہک وڈیاں ناریں ہکناں خوب جوانی ہک ہکاں دی صورتَ وافر تارے جیوں اسمانی
Verse 46ہر ہک عجب جمال شاہزادہ تکدا جاوے کھلھاثابت عشقَ پری دا آہا یار ولوں نہیں بھلا
Verse 47جس دل اندر عشقَ سمانا اس نہیں پھر جاناں توڑے سوہنے ملن ہزاراں ناہیں یار وٹاناں
Verse 48غزنی دے سلطان ہزاراں سوہنے آہے گولے وال ایاز نفر دے اتوں سبھناں تائیں گھولے
Verse 49چنوں روپ زیادہ دنہ تے ویکھ چکور نہ پھردا بھامبڑ بلدے ویکھ پتنگا دیوا چھوڑ نہ مردا
Verse 50لیلاں نالوں گوریاں کڑیاں مجنوں نوں دسّ چکے اس تے جان کرے قربانی اوہناں ولّ نہ تکے
Verse 51لوہا پتھر مکناتیسے اٹھ ملدا کر دھائی موتی ہیرے ویکھ نہ اٹھ دا قیمت رنگ صفائی
Verse 52پیلا منکا نیڑے کھڑیئے ککھّ اس نوں اڈّ ملدے لعلاں نال نہیں اڈّ چمڑن راہ نیارے دل دے
Verse 53یار-کمی نہ جس ول ٹریا چنگا ویکھ نہ بھلدا جسدا سبھ تھیں بہتر ہووے سو کیوں در در رلدا
Verse 54حرص مجازی شہوت بازی جس اندر وچ ہندی ہر ہک صورتَ اجلی تکّ کے پئی طبیعت بھوندی
Verse 55جس سر سر-عشقَ دا اوتھے شہوت مول نہ وسدی جس دل حب سجن دی اس وچ حب نہیں ہر کس دی
Verse 56اگّ نہ ساڑے ککھّ جنہاں تے رحمت بدلی وسدی ایویں صدق نہ ہار محمد ویکھ طبیعت ہسدی
Verse 57شہوت باز مجاز حرص دے ناز نیاز نہ جانن راز گواون باز نہ آون ہتھوں باز رنجانن
Verse 58کامل عشقَ خدایا بخشیں غیر ولوں مکھ موڑاں ہکو جاناں ہکو تکاں ہکو اکھیں لوڑاں
Verse 59آوے مستی جاوے ہستی بھلے شکل-پرستیپیر کسیرا کتھے ہوئِ سونا ایہہ کٹھالی جستی
Verse 60کدھر رہا گھاٹ محمد کدھر آئیؤں تر کے قصہ سدھا صاف سنائیں خوب سمبھالا کر کے
Verse 61صیف-ملوکے شہر ملک دا کیتا سیر بھلیرا ڈٹھا ہک وچکار شہر دے گمبد بہت اچیرا
Verse 62چوٹی اچی چنے توڑیں پیر زمیں پر پکے رنگ صفائی نظر نہ ٹھہرے سورج مثل چمکے
Verse 63شیشے پھلّ زوردوج تارے امبر جیسا گردا اوہ قایم سی دہاں راتیں امبر وانگ نہ پھردا
Verse 64جیوں کر امبر اتے کردے گردش برج ستارے کہن نجومی اس گردش تھیں ظاہر ہون پسارے
Verse 65اس وچ بھی ہک آہا یارو گجھا سر اجیہا اوہ بھی آکھ سناساں اگے جے دم زندہ رہا
Verse 66اس گمبد دے اندر آئے بیبی تے شاہزادہ صیف-ملوک ڈٹھا وچ چشمہ پانی بہت کشادہ
Verse 67نہ ٹھنڈا نہ تتا بہتا سیر گرم اوہ پانی چمکن ہارا جیونکر پارا صاف شکل من بھانی
Verse 68تھوڑی تھوڑی نظریں آوے گرم ہواڑ نکلدی ایوں معلوم ہووے جیوں مٹھی ہیٹھ ہندی اگّ بلدی
Verse 69صیف-ملوک بیبی تھیں پچھیا کیسا ہے ایہہ پانی کی کجھ صفت اوہدے وچ بیبی دسیں کھولھ کہانی
Verse 70بیبی کیہا سن شہزادے ایتھے مرد نہ ملدا جاں ایہہ کڑیاں بالغ ہوون مطلب لوڑن دل دا
Verse 71شہوت آن کرے جد غلبہ اس چشمے وچ نہاونلذت مرد زنانی والی پانی وچوں پاون
Verse 72نالے حمل ایہناں نوں ہوون پیدا ہوون دھیاں حکم ربے دے نال ایہہ صفتاں اس پانی وچ پئیاں
Verse 73سن کے گلّ اجائب منہ تھیں شاہزادہ فرمائے واہ واہ قادر قدرت والا جس ایہہ کھیل بنائے
Verse 74پھیر شاہزادہ بیبی تائیں کہندا کر تاکیداں بیبی ایہہ دن پاس تساڈے گزرن وانگو عیداں
Verse 75جس دے عشقَ رلایا مینوں کڈھ گھراں تھیں آندا لوڑاں اس نوں مطلب میرا وقت وہاندا جاندا
Verse 76عشقَ بدیع-جمال پری دے دسیاں جائیں سانوں دیہو پتا نشانی اس دی جے کجھ خبر تسانوں
Verse 77باغ-ارم کوئی دیس سنیندا اوتھے اس دا ڈیرہ کدھرے ہوئے تساں متّ مالم اوہ مکان بھلیرا
Verse 78بیبی کیہا صیف-ملوکا نام سنے ایہہ تیں تھیں باغ-ارم بدیع-جمالوں خبر پچھیں کی میں تھیں
Verse 79اس ولایت ساڈی اندر باغ-ارم دا نانواں نڈھی وڈی کوئی نہ جانے خبر کتھوں میں پاواں
Verse 80نام بدیع-جمال پری دا اوہ بھی تدھ سنایا اگے اتنی عمرے اندر سننے وچ نہ آیا
Verse 81نہیں سنی کوئی صفت اوہناں دی نہ کوئی گلّ کہانی ایویں آکھ خلاف شہادت دس کدھر دی پانی
Verse 82ستّ دہاڑے رہا شاہزادہ نال بیبی رنگ-رتاایہناں عیشاں موجاں اندر پھیر آہا دل تتا
Verse 83رو رو عرض کرے ربّ سائیاں میل میرے دلبر نوں اس بن عیش نہ بھاوے کوئی کراں قبول سفر نوں
Verse 84اٹھویں روز منگی پھر رخصت ٹور مینوں ہن رانی جتول قدم لکھے میں دیواں چگاں دانہ پانی
Verse 85جاں جاں ساس نہ آس گواواں پاس سجن دے لہساں یا ملساں یا مرساں تاہیں ہو نچلا بحثاں
Verse 86ترساں نیر سمند نہ ڈر ساں جاں جاں توڑی سرساں ہمت کرساں مول نہ حرصاں ملنے باجھ نہ جرساں
Verse 87بیبی کیہا صیف-ملوکا بہت تکی تدھّ سختی پھر ہن ربّ خوشی وچ آندوں کیوں لوڑیں بدبختی
Verse 88راج حکم کر بیٹھا ایتھے تیرے سبھ سلامی میں بھی نوکر ہوساں تیری دعویٰ پکڑ غلامی
Verse 89ہر ہک نعر اتھے جیوں پریاں چنے جیہی دیہی جہڑی چاہسیں حاضر ہوسی پھر ایہہ خواہش کیہی
Verse 90صیف-ملوک کیہا سن بیبی تدھ جاتا کی رکھا تخت ولایت چھوڑ بدیسیں پھراں رناں دا بھکھا
Verse 91حوراں پریاں ناریں تکّ کے یار ولوں نہیں ہٹساں دوئیے جہان لبھن بن یاروں موڑ پچھاہاں سٹساں
Verse 92بیبی جاتا سچا پکا عاشق ہے دلبر دا جھلے غم صنم دی خاتر عیشاں چتّ نہ دھردا
Verse 93لگی چھک اداسی ہویا مول نہیں اس رہنا رخصت کریئے جت ولّ جاندا کاہنوں مڑ مڑ کہنا
Verse 94خچر خوب سواری والی کر تیار منگائی زینت زین سنہری کرکے ہچھی طرحاں سہائی
Verse 95شیشہ اپنے ویکھن والا شہزادے نوں دتا کیہا جو کوئی ملسی دیسیں جائیں چلا کنڈ دتا
Verse 96گولی ہک جوان سندر تکّ نال شہزادے لائی ہو اسوار خچر تے ٹریا بیبی ٹورن آئی
Verse 97کیہا حد اساڈی توڑی خطرہ رکھ نہ کوئی جس ویلے ایہہ حد تسانوں تمّ تمامی ہوئی
Verse 98شیشہ خچر دے کے اوتھوں موڑیں گولی تائیں رکھ توکل ہک ہکلا پھر اگوں توں جائیں زنانے شہر دی سلطانہ دا مقولہ
Verse 99دے کے خرچ روانہ کیتا وسّ نہیں کجھ چلے آپ نہ رہندا نال نہ کھڑدا مشکل بنی اولے
Verse 100غیبوں ربّ ملایا بنا خوشیاں رہا نہ بنا چھڈّ ٹریا ہن رہندا ناہیں لکھ شیرینی مناں
Verse 101آپے آیا گھر سہایا مینوں ربّ ملایا سٹّ ٹریا ہن جھٹّ اسانوں جاں گھٹّ عشقَ سمایا
Verse 102نہ کوئی آس ملن دی مڑکے کون آئے اس پاسے چھوڑ گیا نہں تروڑ پیارا کرکے کوڑ دلاسے
Verse 103سوہنا متھا رجّ نہ ڈٹھا چٹھا میرا گلیا لئل پیارا اپر اپارا لا چمکارا چلیا
Verse 104ٹھگّ گیا لا اگّ کلیجے وگ تھکی نہیں اڑیا سکھاں کارن لائی آہی آن دکھاں لڑ پھڑیا
Verse 105صیف-ملوک بندوق لگاکے کوک نہیں ہن سندا پھٹّ نہ سیندا ظالم تھیندا رتّ پیندی نہیں پندا
Verse 106صبر کرانگی دکھ جرانگی یا مرانگی ہاوے کجھ نہ کہنا سر پر سہنا جو کجھ ربّ سہاوے
Verse 107کرد کلیجے مرد لگائی ظالم درد جدائی جاں شاہزادہ اہلے ہویا روندی مڑ گھر آئی
Verse 108ساقی سوہنا مدھ کھری دا دے پیالہ بھرکے پیواں تے پھر کھیوا تھیواں مڑ کے جیواں مرکے
Verse 109ماراں دشمن دیوے تائیں قید کیتا جس سوہنا اوہ چھٹے تاں دلبر میلے ہور علاج نہ پوہنا
Point at or tap a word to see its meaning. With a keyboard, Tab reaches the words and the arrow keys move between them.