Verse 1واہ واہ گھڑی مبارک والی سائت نیک حسابوں آوے واء سجن دے پاسوں ہووے کرم جنابوں
Verse 2جھبدے ملدا یار پیارا نکلے فعال کتابوں آیا یار محمد بخشا چھٹسی جان عذابوں
Verse 3سن گلاں دل مستی پاوے پیتے باجھ شرابوں ناڑیں تاراں گاون باراں بدن مثال ربابوں
Verse 4ڈبا بیڑا باہر آوے بری ہجر دی ڈابوں بادشہانا ملے خزانہ اچنچیت خرابوں
Verse 5رڑہدے جاندے نوں کوئی لاوے ندی کنارے پھڑکے حاجی اوجھڑ بھلے تائیں حج رلاوے کھڑ کے
Verse 6دوزخ اگّ غماں دی اندر خاک ہوئے جو سڑ کے بخشش دا اوازا آوے بُ بہشتی چڑھ کے
Verse 7بھارا بھار پریت لگی دا سائیں توڑ پچاوے واؤ فجر دی باغ-ارم دی بو-بہار لیاوے
Verse 8کیچم دا کروان سسی دے پتن باغ سہاوے سوہنا یار محمد بخشا گھٹ وچ نظریں آوے
Verse 9کنانوں سوداگر آوے مصر زلیخاں والے جلوا روپ الٰہی والا یوسف آن دسالے
Verse 10لڈن ملاہ ہیرے دی سیجے رانجھا یار سوالے ستا عزت بیگ محمد سوہنی جا اٹھالے
Verse 11شطر سوار کچاوے پے کے ہوئی ولوں کوئی آوے چڑھ کے نجد پہاڑی اتے واگ وراگ اٹھاوے
Verse 12سپاں شیراں دے سر گاہ کے وانگ دلیراں جاوے نال پیار محمد لیلیٰ مجنوں نوں گلّ لاوے
Verse 13جاں معشوق پیارا بھائی عاشق دے گھٹ آیا ظاہر باطن غیر نہ رہا اسے دا سبھ سایہ
Verse 14'لی مئّ اﷲ وکتن' یارو سچ نبی فرمایا چپّ محمد جس کس پایا اسے بھیت چھپایا
Verse 15وحدت دے دریاوے اندر چبھی مار ہٹھاہاںمتّ ایتھوں سر باہر کڈھیں سٹے دھکّ پچھاہاں
Verse 16ایہہ اصرار نہ پھولیں اتھے متّ کوئی مار گوائی شاہ شمس نے ہکسے سخنوں آہی کھلّ لہائی
Verse 17منہ نکا تے گلّ وڈیری نہ کر متّ کوئی ہسے اعظم شافی مالک حنبل ایہہ مصلے نہیں دسے
Verse 18وحدت دے دریا وچ پینا کم نہیں ہر ہر دا لکھ جہاز ڈبے پھر مڑکے تختہ باہر نہ تردا
Verse 19کاہنوں باطن اندر وڑیوں ظاہر دی چھڈّ بازی رمز ہکانی دسدا چلیں پردہ پا مجازی
Verse 20آئی گلّ شہزادے والی سن توں بھائی میرے سراندیپ اندر آ لتھے شاہ-پری دے ڈیرے
Verse 21شاہزادہ سن خبر پری دی ہک تھیں چار ہویا سی بھاہ بھاہ کردا رنگ گلابی وانگ انار ہویا سی
Verse 22جنہاں دی دسّ پوندی ناہیں نہ کوئی گلّ سناندا لطفَ کیتا ربّ پاک اوہناں نوں کول اساڈے آندا
Verse 23نالے ایہہ اندیشہ کردا گلّ نہیں ٹل جائے مشکل وقت ایہو ربّ میرا مہر پری دل پائے
Verse 24جنہاں کارن گھر در سٹے راج حکومت شاہی چوداں برس مصیبت جھاگی جو کجھ لکھی آہی
Verse 25جاں جاں دسّ نہ پوندی آہی شوق آہا دس پچھ دا دس پئی تاں فکر ایہو سی کویں اتے ولّ پجدا
Verse 26جاں پجا تاں کجھ نہ سوجھا نت نواں غم کھاواں ترت بدیع-جمال پری دا کویں درشن پاواں
Verse 27جاں ہن آئی پری پیاری فکر پیا دل بھارا خبر نہیں کس طرحاں ہووےگا نال میرے ایہہ کارا
Verse 28آس امید میری دی کشتی بنے لگسی تر کے یا گرداب غماں دے ڈبسی رتّ سکی ڈر ڈر کے
Verse 29اوہ بدیع-جمال پری ہے پریاں دی شہزادی حسن جمال کمال جہانوں ہوگ اس خدی زیادی
Verse 30پریاں دیوَ آدم دے دشمن ہوسن کئی فسادی میں آزز پردیسی بندہ ہکو آس خدا دی
Verse 31چوداں برس گزارے سکدیاں دکھ جھلے اس آسوں خبر نہیں ہن پل جھلّ اندر کی ہندا ات پاسوں
Verse 32بابل نے شاہ-مہرے دتے نال خوشی دے تکے تکن سائت گئیاں بھجّ خوشیاں عشقَ چلا ئے دھکے
Verse 33دلبر غیبی دا نہں لایا سولی تے جند چاڑھی آس فضل دی کر کے دتا چھٹا لمی باڑی
Verse 34وچ ہوائے پھاہیاں لائیاں اچے نکے چڑھ کے بھکھا تے ترہایا سکوسُ غم دی کوٹھی وڑکے
Verse 35شہر گراواں یار اشناواں ہوئیوسُ چھوڑ اکلا متے ہما پنکھیرو لبھے ہو جاوے سبھ بھلا
Verse 36سیمرغے نوں جال لگایا ہتھ لگن دی آسے کچیاں تنداں وچ محمد کد اوہ پنکھی پھاسے
Verse 37گھر در چھوڑ جنگل وچ وڑیوسُ میر شکاری بن کے شاہبازے نوں پٹی لائی کچے دھاگے تن کے
Verse 38ہن شاہباز آیا کر تاری توڑ جائیگا پٹی جے آیا اٹھ گیا نہ لدھا چوڑ ہوئی تد ترٹی
Verse 39جے شاہباز میرے ہتھ آیا مولٰی کرم جگائے ہور ہزار شکار زمیں دے سبھ پھڑے گھر آئے
Verse 40مشکل وقت ایہو ربّ سچا کرم کرے اس ویلے دلبر دے دل پا محبت پھیر میرے سنگ میلے
Verse 41روح شاہزادہ منزل پہتا کر کر بہتے حیلے دلبر ٹور لیاندا اگوں کامل پیر وسیلے
Verse 42وقت لقا سجن دا آیا چنتا پئی گھنیری بے پرواہ پیا متّ ردے گھٹ محبت میری
Verse 43مومن تلخی ویکھ نزع دی تنگی ہور قبر دی مشکل پندھ صراط-پلیت دا گرمی سخت حشر دی
Verse 44ہور حساب عذابِ بتیرے جھلّ بہشتیں آیا مہر محبت نال شتابی دس لکائ خدایا
Verse 45سراندیپ بہشت شاہزادہ روح تیرا سن بھائی اوتھے یار دیدار دئیگا جسدی تیری کمائی
Verse 46ہر ہک نوں دیدار ہووےگا کافر مومن تائیں کافر ویکھ لکائ قہر دا لیسن سخت سزائیں
Verse 47مومن نوں دیدار ملیگا نال اخلاص پیاراں باغ-ارم وچ کول سجن دے کرسن بیٹھ بہاراں
Verse 48ہر بینتے وچ رمز فقر دی جے تدھ سمجھ اندر دی گلّ سنا محمد بخشا عاشق تے دلبر دی
Verse 49بہت ہوئیاں خوش وقت شاہزادہ شاید کول بلایا اس بن ہور آہا جو کوئی کولوں دور کرایا
Verse 50شاید تائیں دے مبارک کیہا شہزادے بھائی اج بدیع-جمال پری ہے اس نگر وچ آئی
Verse 51آن شراب کباب تمامی چنگ رباب ستاراں عطر گلاب خوشی دے ساجے جو لایق سرداراں
Verse 52لے کے نال دوئیے دل جانی شاید تے شاہزادہ باغ اندر آ بیٹھے کر کے ڈیرہ خوب آمادا
Verse 53صیف-ملوک کیہا سن بھائی جانی یار سفر دا ہوروں ہور ہویا ہن میرا حالَ احوال اندر دا
Verse 54خوشی کمال میرے دل آئی ہویا چین ہزاراں سکا باغ دلے دا کھڑیا ساوا وانگ بہاراں
Verse 55پہتی آن دماغ میرے وچ خشبوئی دلبر دی میٹی کلی گلاباں والی کھولی واؤ فجر دی
Verse 56چوداں برساں دی سردردی تروٹک سخت عمل دی آن نشے دا ویلا ہویا ڈھلّ رہی پل چھل دی
Verse 57دلبر دا مکھ لال پیالہ مدھ حسن دا بھریا ساقی قدرت والے مینوں آن تلی پر دھریا
Verse 58آیا مساں لباں دے نیڑے ہور سبھو غم بھلے تفوں تفوں جند کرے محمد متّ ہتھوں چھٹّ ڈلہے
Verse 59پریاں نوری لوک کہاون جسے جامے پاکی دھکے دیئ کھدیڑے ناہیں میں بیچارا خاکی
Verse 60اوہ بیٹی شاہپال شاہے دی ایس ولایت مانی میں ایتھے پردیسی توڑے مصر اندر ساں ثانی
Verse 61خبر نہیں کی ہندا بھائی باب اساڈے اتھے شان اوہدی دے لایق ناہیں میں کتھے اوہ کتھے
Verse 62پر جے مہر پیا دل پاوے مالک آپ دلاں دا 'لا تکنتو من الرہمت' قول سچا فرماندا
Verse 63ایہہ گلاں فرما شاہزادہ غسل وضو کر پاکی بن تن سیج اتے چڑھ بیٹھا زیور پہن پشاکی
Verse 64اعظم اسم مبارک پڑھدا سورے نبی خلیلےشاہ-مہرے سلیمانی کھولے صیف-ملوک اسیلے
Verse 65مورت ویکھ پری دی اول قدم شکل دے چمے پھر اکھیں منہ متھے ملدا مڑمڑ جاندا گھمے
Verse 66پھر لپیٹ اندر تاویزے بازوبند کر بدھا کہندا برکت تیری پچھے میں ایہہ ویلا لدھا
Verse 67شاید باجھ نہ رکھیا اوتھے خدمتگار نہ گولہ پین شراب ہکلے بیٹھے نہ کوئی شور نہ رولا
Verse 68بھر بھر پین شراب پیالے پی پی تھیون کھیوے چہرے روشن مثل متابی نین بلن جیوں دیوے
Verse 69جاں کوئی سائت ایویں گزری ہویا کرم خدائی ہور نویں خشبو شہزادے دلبر ولوں آئی
Verse 70ملکہ-خاتوں تے ماں اس دی امبر عود جلائے ملکاں وچ گئی خشبوئی عطر مہلیں لائے
Verse 71پریاں ایس مہمانی تائیں بہت پسند لیاونلے خشبو ہوون دل راضی ہسن کھیڈن گاون
Verse 72ایسے طرحاں دہاڑ گزاری شام پئی دن لتھا شمس بدیع-جمال پری دے کجّ لیا منہ متھا
Verse 73صفاں قطاراں بنھ کھلوتے آدم وانگو تارے شاہ-پری اسمانی چھپی پردے وچ کنارے
Verse 74دن ڈبا تے پئیاں شاماں شاہ-پری پھر آئی پیا گھنکار ولایت اندر رہا شمار نہ کائی
Verse 75باغ محلّ تلا کنارے سارے سہن چوبارے ہر ڈالی ہر پتر اتے پریاں ڈیرے مارے
Verse 76چمکو چمک پوشاکاں سچیاں ہک تھیں ہک چڑھاوےہر ہک بدر منیر حسن دی نجم-نسا کہاوے
Verse 77کڑیاں پھرن ترننجن جڑیاں بنیاں بن ٹھن پریاں ہسن گاون مانہگے پاون اپر باراں دریاں
Verse 78چمکن سالو لمکن واگاں چھنکن چوڑے سچے جوڑ مروڑ کڈھن لکّ پتلے لٹک ٹرن قد اچے
Verse 79معشوقاں دی صفتیں آئؤں تاں گلّ دور رہیگی تھاں کتھاں پچھان محمد خلقت کی کہیگی
Verse 80ہر ہر جائی کر تکلیفاں زور تبء دا دسدا درد فراقَ فقیر دسیندے جو اندر وچ وسدا
Verse 81جو ہر ویلے درد پکاراں سنیئر دکھیئے ہوندے رنگارنگ کلام بھلیری بہتر ہسدے روندے
Verse 82بدرا دے گھر شاہ-پری دا ہویا آن اتارا موتی لئل جڑاؤ تنبو سونے دا سی سارا
Verse 83ملکہ بدرا ماں اوہناں دی ہور تمامی سئیاں چامل چاء محبت کولوں ملن پری نوں گئیاں
Verse 84شاہ-پری نے ملکہ-خاتوں مل اول گلّ لائی بعد اس تھیں پھر بدرا-خاتوں پھیر اوہناں دی مائی
Verse 85مائی اگے سیس نوایا متھے تے ہتھ دھرکے اس نے اگوں سر منہ چمے بہت محبت کر کے
Verse 86وارو وار ملن سبھ سئیاں آکھن صدقے گئیاں جیوں دیوے تے ڈھہن پتنگے تویں ڈھیہہ ڈھیہہ پئیاں
Verse 87پریاں نال سئیاں دا میلا خوب طرحاں دا ہویا سراندیپ بہشت برابر ہوریں بھریا گوئیا
Verse 88ساوریاں رنگ گورے سئیاں کنک ونے رنگ پکے شرم حضور کوئی کوئی کردی ہسّ ہسّ اکھ مٹکے
Verse 89ہکناں دے گل سوہے کڑتے سر تے بھوچھن بگے دھڑی سندھور لگے وچ شیشے چمک پری نوں لگے
Verse 90ہکناں دے سر سبز دپٹے سوسن رنگی انگی گھیریدار ستھن چن لائی سرمئی کر رنگی
Verse 91ہکناں سرخ پوشاک تمامی پیراں تھیں لگّ چوٹی باغ-ارم جیوں گھاہ ہرے وچ ساون چیز بہوٹی
Verse 92ہکناں چھاپیدار پوشاکاں جوڑے نال بناتی پبّ اٹھاون چال وکھاون کڈھ کڈھ چلن چھاتی
Verse 93ہکناں دے سر ساوی چادر گلّ وچ کڑتے کالے ستھن جٹکی سرپر مٹکی ٹرن کبوتر چالے
Verse 94موڈھے مارن باہاں الارن گردن لکّ مروڑن حسن مروڑاں کرن اجوڑاں تروڑاں دیئ تروڑن
Verse 95نین کٹاراں بھواں کماناں نکّ خنجر بیدستےنال سئیاں دے کھوہ گئیاں دے کوٹھے ملن چورستے
Verse 96کنڈلدار دو زلفاں لٹکن بھنیاں نال پھلیلاں چلن بنکے جھانجر چھنکے منکے ہار ہمیلاں
Verse 97کجلے پاون تے مٹکاون لاون داغ تلاں دے اہلے بہہ بہہ گاون سوہلے ڈھولے گیت دلاں دے
Verse 98کی نکمی گلّ محمد چل اگیرے چلاں پر جس ایہہ فرمائش کیتی اس بھاون ایہہ گلاں
Verse 99جسدی خاتر رکھ ارادہ کیتا ایڈ تگادا ایہناں گلاں تھیں اس جنے نوں ہوندی خوشی زیادہ
Verse 100دل میرا پر چاہندا ناہیں بن درداں دی باتوں نال ضرورت تھوڑی تھوڑی گلّ کراں اس ذاتوں
Verse 101بدر نوں گلّ لا پری نے بہت محبت کیتی سر منہ چمے نال پیاراں میل دوہاں جند سیتی
Verse 102ملکہ دے ولّ ویکھ پری نوں بہت ہوئی خوش حالی شکر کرے جے پھیر لیاندی بھین میری ربّ والی
Verse 103جیوندیاں منہ اس دا ڈٹھا لدھی گئی گواتیاس بن جیون ساڈے بھانے آہی بری ہیاتی
Verse 104مولٰی سنگ ملائے مڑ کے کرم جگائے ستے ہو دلثاد پری چڑھ بیٹھی تخت سنہری اتے
Verse 105مائی نے پھر کول پری دے آن چوگردے دھوئیاں عود اگر تے امبر اسہب مشک ازخر خشبوئیاں
Verse 106مشکاں دی کجھ حاجت ناہیں عجب جمال پری نوں تازی شاخ گلابی ساوی پھلاں نال بھری نوں
Verse 107اسدے قدر موافک آہی ایہہ ہر چیز کمینیہر ہر وال اوہدے سنگ آہا لکھ لکھ نافا چینی
Verse 108صفت اوہدی دی گلّ محمد کس منہ نال الاواں منہ نکا گلّ بہت وڈیری کیکر آکھ سناواں
Point at or tap a word to see its meaning. With a keyboard, Tab reaches the words and the arrow keys move between them.