Verse 1راوی ایس قصے دے مینوں ہور صلاحَ دسالیپھر پچھوں چل پکڑ محمد گلّ شہزادے والی
Verse 2قلزم دا شاہزادہ جس دن کٹھا صیف-ملوکےچالی روز گزشتہ ہوئے بن فریادی کوکے
Verse 3بعد اس تھیں ماں باپ دیوَ دے خبر ہوئی اس گلّ دی اسفند باش قلعے وچ کٹھا بیٹا تیغ اجل دی
Verse 4ماتم بہت کیتا بیہدا سوگ وڈا وچ دھرتی اوہ مہینہ قلزم اندر روز قیامت ورتی
Verse 5بوہے بوہے ہوئے سیاپے ہائے شیرا اے شیرا مائی باپ پٹن سر داڑھی منہ نہ ڈٹھا تیرا
Verse 6کون بجگ پئی اسمانوں کر گئی ایہہ کارا دیوَ پری کوئی مار نہ سکدا ساڈا لال پیارا
Verse 7روندے دھوندے تے کرلاندے لٹے اسیں جہاناکوئی نہ سجھدا مارن والا ایڈ دلیر جوانا
Verse 8جاں اس سوگوں باہر آیا کہندا شاہ دیواں نہ کر کے دغا دیواں نوں مارن ہے ایہہ کم انساناں
Verse 9آدمیاں بن کسے نہ کٹھا میرا شیر رنگیلا مشرک مغرب توڑی لوڑو کر کے وڈا حیلہ
Verse 10ایسا دیو زوراور مارے آدم دی کی طاقت ؟عرض کیتی عمراواں شاہا پئی اسمانی آفت
Verse 11اسفند باش قلعے وچ کیکر آدم ہے جا سکدا سو افریت بہادر ات ولّ جاون کولوں جھکدا
Verse 12پھر بہرام تساڈا بیٹا جو مویا اس جائی اس دا ثانی ہور زوراور کہڑا وچ لوکائی
Verse 13آدم شہدے دی کی طاقت نہ کوئی دیو اجالا اس بہرام بہادر اگے ہتھ اٹھاون والا
Verse 14ایویں نال غمی دے تیرا فکر ہویا سودائی آدم آزز مٹھ مٹی دی کرسی کی کمائی
Verse 15ہاشم آہا نام اس دیوے قلزم دی جس شاہی عمراواں نوں آکھن لگا خبر مینوں ایہہ آہی
Verse 16پکا پتہ کتابوں آہا لکھیا وچ کلامےآدمیاں دے ہتھوں ہوسی موت میرے بہرامے
Verse 17آدمیئیں بن کسے نہ کٹھا لوڑو چا جگّ سارا سخت سزا دیاں جد لبھے اوہ دشمن ہتیارا
Verse 18پریاں دیو اکابر دانے عاقل سگھڑ سیانے چھ ہزار روانے کیتے ہر پاسے ہر تھانے
Verse 19اس آدم نوں لوڑ لیاؤ خون کیتا جن میرا لیہندے چڑھدے دکھن پربت لوڑن چڑھے چوفیرا
Verse 20ٹاپو تے کوہ قاف سمندر جنگل بار اجاڑاں ندیاں بیلے خیبر غاراں وچ پنجال پہاڑاں
Verse 21لوڑ رہے ویرانے سبھے خونی ہتھ نہ آیا پھیر آبادی بھالن لگے ملکیں پھیراں پایا
Verse 22شہر ولایت جوہ چوپھیرے چشمے حوض سرائیں رکھ بغیچے کھوہ بنھڑے ڈھوکاں کھیت گرائیں
Verse 23جس جس جائی سجھدا آہا آدمیاں دا واسا پریاں دیو لگے سبھ لوڑن ملّ لیا ہر پاسہ
Verse 24کوئی کدھرے کوئی کدھرے لوڑے کرک دیواں نوں بھاری اس دہاڑے چالی پریاں آئیاں وچ اڈاری
Verse 25باغ-ارم دے اتوں لنگھیاں نال قضاع الٰہی ہیٹھ درخت ڈٹھو نے ستا آدم زاد سپاہی
Verse 26اس درخت اتے لہہ آئیاں گو-مگو مچائی ویہہ وسوے ایہہ خونی ساڈا ہور نہ ہوسی کائی
Verse 27کنّ آواز اوہناں دی آئی جاگ پیا اوہ راہی سبھو پریاں دبکا دے کے پچھن اوئے سپاہی
Verse 28کون کوئی توں کتھوں آئؤں تدھ مالم نہ ہویا پریاں دیواں دے ایہہ تھانے کیوں اس جائی سویا
Verse 29احمق ہیں یا جھلا خفتی یا مغرور جوانی کہڑی جائی آ کے ستوں مار کرے کوئی فانی
Verse 30صیف-ملوک دلیر جوانے خوب جواب سنایا باجھ رضا ربے دی کہڑا مارن والا جایا
Verse 31جدوں قضاع الٰہی عاصی مول نہ رہسی ڈکی حکمے باجھ نہ مراں کسے تھیں مالم ہے گلّ پکی
Verse 32بے گناہ میرے ولّ جہڑے بریاں اکھیں کرسن ہتھوں ہوگ جنہاں دی آئی میرے ہتھوں مر سن
Verse 33پریاں نے تد مالم کیتا ایڈ دلیری جسدی قلزم رنڈی اسے کیتی سچ ایہو گلّ دسدی
Verse 34شہزادے تھیں پچھن لگیاں بن کے وانگ حلیماں اسفند باش ززیرے تدھے کیتیاں سر مہیماں
Verse 35قلزم دا شاہزادہ اوتھے تدھ ہی مار گوایا سراندیپے دی شاہزادی نوں توں چھڑا کے لیایا
Verse 36جے اوہ شیر بہادر توں ہیں سندر شکل سپاہی تاں سو شکر اساں بھی ڈٹھوں چاہ تکن دی آہی
Verse 37صیف-ملوکے ایہہ گل سمجھی ہین ایہہ پریاں اتھوں سراندیپوں سنیاں گلاں رہِ رہِ آئیاں جتھوں
Verse 38جے کوئی دور ملک تھیں ہوون کد واقف دستانوں باغ-ارم وچ آئیاں ہوسن زریں شارستانوں
Verse 39آہو میں ہی کٹھا آہا شہزادے فرمایا ملکہ-خاتوں قیدوں کڈھی جاں ربّ کرم کمایا
Verse 40اسے دل نوں ہمت دتی اسے یاری کیتی نہیں تاں ایویں کد مریندا ایسا دیو جمئیتی
Verse 41پریاں کیہا دسّ اسانوں کیکر کٹھا آہی جیوں جیوں گزری سبھ دسالی صیف-ملوک سپاہی
Verse 42ویکھ اقبال دلیری اس دی ہتھ نہ پاون پریاں ایڈ بہادر دیواں مارے زور اوہدا سن ڈریاں
Verse 43حکمت مکر فریباں کر کے قلزم کھڑیا لوڑنصیف-ملوک بھلاون کارن جھوٹھ مسودا جوڑن
Verse 44شرستان سنہری وچوں کہن اسیں ہن آئیاں شاہ شاہپال تیرے ولّ گھلیاں خوشی خشائیں دھائیاں
Verse 45شہزادے نوں چائ لیاؤ حکم دتا شاہ پالے جے آکھیں تاں چائ لے چلیئے کول بدیع-جمالے
Verse 46شہزادے شکرانہ پڑھیا بہت دلوں خوش ہویا پہن لئے ہتھیار پشاکی اول منہ ہتھ دھویا
Verse 47پریاں نوں فرمائیوسُ جھبدے چا لے چلو مینوں نال شتابی چایا پریاں ایہہ ہن کھڑساں تینوں
Verse 48ستّ دن تے ستّ راتیں اڈیاں کر کے تیز اڈاریاکس پہاڑ اچے تے لتھیاں کلک اوہناں نے ماری
Verse 49آن ہجوم اکٹھے ہوئے پریاں دیو مریلے آکھن نسّ ڈٹھوئی شخسا اگے ہی بہں ویلے
Verse 50ہن جاسیں تاں پچھساں ایتھوں آئی شامت تیری مدت ہوئی اساں بھی چڑھیاں کیتی لوڑ بتیری
Verse 51قلزم دے درباروں آئے اسیں لوڑاؤ تیرے اس سلطانے گھلیا سانوں پکڑو دشمن میرے
Verse 52ڈھونڈ تھکے کل عالم تینوں مساں مساں ہتھ آئؤںچڑھیا خون اکھیں وچ تینوں اسے آن پھہائیوں
Verse 53بے گناہ شاہزادہ ساڈا کیوں تدھ مار گوایا مار ازائیں کرساں تینوں اج بدلہ ہتھ آیا
Verse 54سن گلاں شہزادے تائیں بہت آئی غمناکیکہندا ہے کی مارن میرا آزز بندہ خاکی
Verse 55کی مویا مر ویساں شہدا کی جیون دا جھورا دو افسوس رہے دل اندر ڈاڈھے نال نہ زورا
Verse 56اک تے مائی بابل سنگیاں مردیاں منہ نہ ڈٹھا دوجا چھیکڑ وار نہ ملیا یار پیارا مٹھا
Verse 57اوڑک اک دن مرنا بندے کیا پچھے کیا اگے نیت پریت تیری وچ مویا پتہ سجن نوں لگے
Verse 58جان ہووے قربان سجن توں عشقَ ایمان نہ ہاراں اپنی توڑ نباہ محمد کجھ پرواہ نہ یاراں
Verse 59صیف-ملوک اوہناں بنھ کھڑیا سنگلدیپ شہر وچ پریاں دیو افریت بتیرے ویکھن آئے در وچ
Verse 60جو ویکھن سو ہائے ہائے کردے ہتھ مروڑن سارے ایہہ جوان نہ مارن جوگا کی کرسن ہتیارے
Verse 61اوڑک کوٹ اندر پھڑ کھڑیا وچ حضور شہانے صیف-ملوکے ڈٹھے اگے بادشاہی سمیانے
Verse 62سچے فرش فروش وچھائے کرسی سے سنہری تخت جڑاؤ تے شاہ بیٹھا دیواں بھری کچہری
Verse 63صیف-ملوکے نظریں آیا تخت اتے اک تودا سٹھّ گز لما قد دیوے دا چہرہ غضب آلودہ
Verse 64صیف-ملوک سلام پچایا جیوں کر رسم شہانی جھلّ سلام تخت پر گجیا کہندا اے نکسانی
Verse 65تونہیں میرا بیٹا کٹھا اسفند باش جزیرے گھائل کریں جوان اجیہے چایا سیں تکسیرے
Verse 66تینوں کجھ نہ سجھدا آہا اس دا بھی کوئی ہوسی جیوں کر میں اوہدے غم رنا باپ تیرا ہن روسی
Verse 67صیف-ملوکے جھڑکاں سنکے رتّ گئی سکّ ساری نال دلیری اٹھ سلامی کردا دوجی واری
Verse 68دیئ دوائیں کرے سنائیں دل وچ اوٹ اﷲ دی نال فساہت عقل بلاغت صفت کیتی اس شاہ دی
Verse 69پھیر اس اگے چھوہیا قصہ اپنے حالَ اہوالوںاس جائی اس مورت والا عشقَ بدیع-جمالوں
Verse 70سفر سمندر فوج ڈبن دا ذکر زنگی دا آندا بوزنیاں تے سنگساراں دا قصہ شہر زناں دا
Verse 71ہور قضیے جانواراں دے بھی گلّ تتے تھل دی اسفند باش جزیرے والی گلّ دسی پل پل دی
Verse 72ملکہ دی بے ہوشی والی ساری گلّ سنائی موت دسی بہرام دیوے دی جیوں مویا سنگ آئی
Verse 73واست سراندیپ وڑن دا سارا حالَ سنایا ہور بدیع-جمال پری دا جیوں جیوں درشن پایا
Verse 74شفقت الفت شاہ-پری دی کلّ قرار زبانی مہر-افروزے دے گھر در دی دسی کلّ نشانی
Verse 75مہر-افروزے دا نال لے جانا باغ-ارم وچ جانا پھر پریاں دا نال بہانے سنگلادیپ پچانا
Verse 76سچو سچ سنائیوسُ سارا جھوٹھ نہ کہیوسُ ماسہ سچے ناہیں آنچ محمد کیہا سچ بیوسواسا
Verse 77شہزادے تھیں پچھن لگا ہاشم شاہ غم بھریا متھے وٹّ اکھیں پر لالی ڈھیر بے چارہ جریا
Verse 78بھیڈاں وانگ حلیم دکھاویں نیت دے بگھیاڑا مثل فرشتے صورتَ دسے باطن دیو اڈارا
Verse 79ناہک خون کیتا تدھ کاہنوں بے گناہاں ماریں روز قیامت پچھ ہوویگی من وچ خوف نہ دھاریں
Verse 80صیف-ملوکے کیہا اگوں آکھ سلام دبارے لکھن ہار اضل دے شاہا جو جو نقش اتارے
Verse 81متھے میرے جو اس لکھے عیب گناہ خطائی کد تدبیروں دھوون ہندے پکے لیکھ خدائی
Verse 82ایہہ منہ کالکھ لگنی آہی لکھی دھر درگاہوں دوش دیو کی مینوں شاہا وڑھی قضاع الاہوں
Verse 83توڑے لکھ افسوس بندے نوں لگے کم وہایاں ترٹا لئل نہ جڑیا مڑکے ہرگز پچھوتایاں
Verse 84صورتَ شیر جوان تیرے دی ویکھ لگا غم مینوں ہونی ہوئی نہ مڑدی آہی کی ہن آکھاں تینوں
Verse 85ہتھوں چھٹا باز نہ مڑیا نال افسوساں گھنیاں کجھ نہ حاصل ہویا شاہا پٹ پٹ منہ سر بھنیاں
Verse 86کیتے اپنے دا دل اندر بہت افسوس کیتا میں ظلم برا ایہہ متھے لگا ہتھیں زہر پیتا میں
Verse 87ہائے ہائے ڈبّ مراں وچ ندیاں نجّ آیا اس رستے ٹٹا شیشہ پھیر نہ جڑیا نال کچے بندبستے
Verse 88ڈاڈھی ہے تقدیر الٰہی منہ مارے تدبیراں کس سر دوش محمد پھڑیوسُ اپنیاں تقصیراں
Verse 89کیتا عذر خطائی منی صیف-ملوک شہزادے ہاشم دا کجھ غصہ گھٹیا رہا کمے زیادے
Verse 90گنتریاں وچ آیا کہندا مار سٹاں کہ چھڈاں اوڑک ورم پتر دا آکھے بہتر جے سر وڈھاں
Verse 91کدی کہے چا قید کرائیے کدی کہے جے ماراں کدی کہے بہرام نہ مڑدا نال اجیہیاں کاراں
Verse 92للا خون پتر دا بخشاں متّ میں بھی بخشیواں گرم پیالہ غصے والا اندرو اندر پیواں
Verse 93رہِ رہِ کی پھر رہِ نہ سکیا کیتوسُ حکم قتل دا گچّ بجھاوے کون غصے دا اچا بھامبڑ بلدا
Verse 94ہاشم شاہ فرمایا اوڑک مالم ہویا مینوں توں دلبند اساڈا کٹھا قتل کراواں تینوں
Verse 95جلادے ولّ شارت کیتی ترت اوہ حاضر ہویا جیوں بدکاراں دے سر آ کے ملک-ال-موت کھلویا
Verse 96بلیاں اکھیں تے منہ کالا ککیاں داڑھی مچھاں چٹے دند لباں تھیں باہر وال مونہیں پر لچھاں
Verse 97فکی خو ترش رو دسے تلخ زبان رننجانی کپوں کھاؤں کردا سجھے چہرہ مثل سوہانی
Verse 98رنگ دمدار زہلے والا وانگ مریخ صلابت ویکھن سائت دلیری بھجے کھاون آئی آفت
Verse 99خونی سرخ پوشاک لگائی باہر تیغ میانوں تیز اتے خوں ریز زیادہ باشک ناگ زبانوں
Verse 100مریخے دل ہوئے شکستہ تیغ اوہدی تھیں ڈر کے زوزا برج کرے دو پھاڑاں سر نیزے تے دھر کے
Verse 101دہشت دس البرز کمباوے پئے پہاڑ تریلیلرزا پوے زمیناں تائیں جاں اس نوں شاہ بیلی
Verse 102توبرہ ریتے بھریا گل وچ خونی نتئّ بغل وچ سینکڑیاں نوں زبھا کریندا وانگ قصائیاں پل وچ
Verse 103رتی رحم تے سہم دلے نوں ترس نہ وچ سرشتے خونی کم ہمیشہ وانگر ملک-ال-موت فرشتے
Verse 104اول نتئّ زمیں پر دھریا اپر ریت کھلاری پریاں دیو وڈیرے نٹھے ویکھ اوہدی ہتیاری
Verse 105شہزادے نوں باہوں پھڑکے ریتے وچ بہایا اگر تیغ سرے تے آندی مارن اتے آیا
Verse 106قدرت ویکھ خداوند والی کردا کیڈ تماشے پنجے وچوں تتر چھڈے رحم کرے جد باشے
Verse 107مارن لگے شیر دمبے نوں گرگ کرے اپرالا بہے چڑی دا راکھا بن کے باشک ناگ ڈنگالا
Verse 108کھاون لگا باز کبوتر پنجہ مار غضب دا لگڑ اس تھیں چھڑا کے رکھے فضل پچھانوں ربّ دا
Verse 109ہاشم شاہ اگے جلادے اس دم عرض گزاری شاہا تیز تیرے اکبالوں واڈھ میری تلواری
Verse 110ہمت تیری نال نرویا زور مینوں وچ باہاں دوجا دم نہ لیندے مڑ کے تیغ جہناں تے واہاں
Verse 111اج دن تیک نہ بچیا کوئی جو میرے تکّ پہتےکرگ شفاعت کون بندے دی پاپ کمائے بہتے
Verse 112شالہ خیر تساڈی دائم مانوں خوشیاں لاکھاں دو تنّ سخن میرے دل آئے جند بخشو تاں آکھاں
Verse 113ہاشم کیہا کہہ توں بے شکّ جو تیرے دل آئی نیک صلاحَ سبھس دی سنیئے کھائیے نہیں خطائی
Verse 114نیک نصیحت ہر دی منیئے آر نہ کریئے ماسہ جو آمنا دے گھر آیا ہویا بیوسواسا
Verse 115ہاشم شاہ اگے جلادے عرض بنا سنائی شاہ وڈا شاہپال اچیرا نبی سلیماں جائی
Verse 116خیش قبیلے اس دے سارے میر وزیر تمامی بھیناں بھائی ساک اشنائیاں کیا خاصی کیا عامی
Verse 117سبھناں رل صلاحَ پکائی ایہہ شاہزادہ کائی شاہ پالے دی بیٹی دے کے کرنا خاص جمائی
Verse 118سرو-بانو ہم شیرہ شاہ دی مائی مہر-افروزے ویکھ پسند کیتا ایہہ لڑکا اندر پہلے روضے
Verse 119ناطہ کرن اوہدا اوہ گئیاں شاہپالے دے گھر نوں نبی سلیماں ایہہ کڑمائی کیتی ویکھ امر نوں
Verse 120ڈر خاں روح نبی دے کولوں متّ کوئی غیرت آوے اٹھے فتنہ شر اجیہا ایہہ کم مشکل پاوے
Verse 121تیرے تے شاہپالے اندر ویر پویگا بھارا ایہناں معاملیاں تھیں پچھوں ڈھکدا مندا کارا
Verse 122خون ایہدا لے کیکر پچدے ایڈ جنہاں اپرالے شہر ولایت اندر شاہا بحثوں نہیں سکھالے
Verse 123تدھ جمائی اس دا کٹھا کد اوہ کرسی تھوڑی ایہہ کم کر کے چھپسیں کتھے ہے کوئی جاگا لوڑی
Verse 124آدمیاں دے ملکے اندر باپ اوہدے دی شاہی چار کو سے شاہزادہ اس دا خدمتگار سپاہی
Verse 125دیوَ پریاں دے ملکے اندر کد بچسیں شاہپالوںادھر نٹھوں اوہ مریسی ڈاڈھا اے تیرے نالوں
Verse 126ایس جوانے خون تساڈا کیتا نال نادانیعشقے سی متّ ماری اس دی کر بیٹھا دیوانی
Verse 127زوری خون کرایا اس تھیں چا چکا زنانی موت اوہدی سی اس دے ہتھوں لکھی قلم ربانی
Verse 128جٹّ فقیر مکدم مویا موزء وچ بلاکے کہندے بھینوں قتل کرایا ویرے چا چکا کے
Verse 129ویرے کولوں ویر کوہاون برے رناں دے کارے ہتھیں زہر پلائ کھپاون خاوند یار پیارے
Verse 130کد کسے دی سکی ہوئی جس نے نعر سدایا سے برساں اگّ پوجے کوئی پھر ساڑے ہتھ لایا
Verse 131نور حیا ہدایت والا برقع گرد جنہاں دے سو کیوں ناریں گنیئے بھائی مرد ایمان تنھاں دے
Verse 132کی ہویا جے چہرہ ساڈا ہو گیا مرداواں جسدی نیت مرداں والی سوئیؤ مرد سچاواں
Verse 133ناریں سو جو شہوت بھریاں تاڑن ڈنڈ جواناں اک چکھن پھر دوجا رکھن لکھن برا پرانا
Verse 134کھیکھن تھیں کر خوف محمد باہر نکل اس گلیوں بریاں تھیں بریائی نکلے ہے بھلیائی بھلیوں
Verse 135ایہناں گلاں تھیں ہے کی لبھدا عیب کسے دا کرنا اپنا آپ سمبھال محمد جو کرنا سو بھرنا
Verse 136عرض کرے جلاد بیچارا مڑ مڑ نال تاکیداں نام جلاد تے کم شفاعت راہ دسے بے-دیداں
Verse 137کہندا آہی خبر تسانوں بھی بہرام جوانے آدمیئیں دے ہتھوں مرنا اوڑک اکس زمانے
Verse 138جیوں کر توڑوں لکھی آہی سر پر اوہو ہوئی نہیں تاں اس بہادر دیوے مار نہ سکدا کوئی
Verse 139ایسا رستم دسدا آہا دیو پریاں وچ نادر جیوں اجڑ وچ شیر تویں سی لشکر وچ بہادر
Verse 140دس ہزار نرا دیو جنگی چہل ہزار افریتےاکسے حملے نال ہلائے مار گیا پڑ جیتے
Verse 141ایہہ کمزور جوان بیچارا کی آہا اس اگے پر جاں گھڑی برابر ہووے سائت ڈھلّ نہ لگے
Verse 142کرو قیاس دلے وچ آپے کی کجھ اس دا بادر نال اوہدے کی قدرت دھردا توڑے لکھ بہادر
Verse 143جو کجھ وچ کتاباں لکھی ہونی سی سو ہوئی سر پر منّ رضا ربے دی دوش نہیں اس کوئی
Verse 144دوجا ہور سنو گلّ میری ترکھے کم شیطانی اگے بھی تدھ نالوں وڈے ہوئے شاہ جہانی
Verse 145جیوں جیوں دنیاں تے اوہ ورتے سو ورتب بھلیرےجے چلیں پھڑ چال اوہناں دی ایہہ بہتر ہک تیرے
Verse 146طوق سنگل جمشید بنا کے چھوڑ گیا اس غلے بند خانا اسکندر کیتا تکسیری دکھ جھلے
Verse 147زندہ مارن پھر بھی سوکھا جاں چاہیئے مروایا مویا گیا مڑ کیکر لبھسی جس دن دینا آیا
Verse 148ہاشم شاہ جلادوں سن کی گلّ پسند لیاندی کہندا اس نوں توں ہی دسیں ایہہ صلاحَ اماندی
Verse 149جو توں دسیں سوئیؤ کریئے گلّ کہی تدھ خاصی پر اک بھاوے ناہیں اس دی مڈھوں کرن خلاصی
Verse 150عرض کیتی جلادے شاہا اس نوں قید کراؤشاہپالے دی جاں جاں توڑی مرضی نہ ازماؤ
Verse 151جے اس کجھ اپاؤ نہ کیتا بانہہ اسدی نہ لوڑی اس ویلے بہرامے بابت مار سٹن گلّ تھوڑی
Verse 152جے اوہ زورا کرکے منگے دے جمائی میرا قیدوں کڈھ کریسیں حاضر تاں کم چنگا تیرا
Verse 153ہاشم شاہ جلادے تائیں آفرین پکاری ایہہ صلاحَ پسند لیاندی نالے مجلس ساری
Verse 154جلادے نوں خلعت دے کے کیتا وچ امیراں خونی قید کراون کارن کرن لگے تدبیراں
Verse 155قلزم کوٹ اندر سی کھوہا ڈونگھا ودھ شماروں بہت لما تے باطن وچوں کالا تار زناروں
Verse 156یا اوہ روز حشر دے والی آہی رات ہنیری ویکھن ساتھ کنارہ اس دا جاندی بھجّ دلیری
Verse 157کی کجھ آکھاں تھلا اس دا دھول مچھے تکّ پہتاپیروں سرا نہ نظریں آوے جے سو تکیئے بہتا
Verse 158جے کر پتھر اتوں سٹیئے رہے برس تکّ راہی جیا جون اوہدے وچ مر کے گندگی ترقی آہی
Verse 159جے سورج وچ جھاتی پاوے ویکھ ہنیرا نسدا کالکھ بری اوہدی وچ آیاں نور دہوں دا کھسدا
Verse 160برا درگ دیواں دا آہا دوزخ دنیاں اتے سپّ اٹھوئیں ہور خزندے وانگر کالے کتے
Verse 161پیریں سنگل طوق گلے وچ شہزادے نوں پاکے اس درگے وچ وگایا بیٹھا تھلے جا کے
Verse 162صورتَ سیرت ولوں آہا مہتر یوسف ثانی تاہیں ملی میراس اوہناں دی کھوہ پایا زندانی
Verse 163بے نظیر شاہزادہ آہا عشقَ پری دے پھڑیا تاہیں قید دیواں دی اندر جا بیچارا جھڑیا
Verse 164پٹّ پہاڑ دتا چائ اتے منہ کھوہے دا کجیا دیکھ عاشق دی بھکھ محمد اجے نہ عشقوں رجیا
Verse 165دیواں قتل کرن تھیں چھڈیا قید بری وچ پایا بھکھا تے ترہایا مرسی سہم اوہناں کجھ آیا
Verse 166اس پڑے وچ موری کیتی وانگ چکی دے گالے انّ پانی لمکاون اوتھوں پاکے وچ پیالے
Verse 167کدی کدی کجھ روٹی پانی تھوڑا بہتا کھانا صیف-ملوکے ولّ پہنچاون کر کے خوف ربانا
Verse 168جاں شاہ-مہرے باہر کڈھے روشن وانگر اگی اعظم اسم زبانوں پڑھیا لو کھوہے وچ لگی
Verse 169سپّ اٹھوئیں ہور خزندے نسّ چھپے وچ دھرتی مہتر یوسف والی حالت سبھ اوتھے ونجھ ورتی
Verse 170پیریں سنگل بیڑی بدھے گن جاپے گلّ گولے ہتھ متھڑی سنگل نالے کجھ بھارے کجھ ہولے
Verse 171آب حیات کھرے دا چشمہ صیف-ملوک شاہزادہ وچ ہنیر کھوہے دے بیٹھا ربّ دا ویکھ ارادہ
Verse 172نال افسوس اوہدے کر بیٹھا امبر بانا نیلا سورج دا غمناکی کولوں ہو گیا رنگ پیلا
Verse 173سینے داغ چنے نوں لگا تکّ کے شاہ دا رولا نت دہاڑے گھٹدا جاندا کہندا ہائے مکبولا
Verse 174کت ولّ نسّ ونجھاں اسمانوں دھاڑا لوکو دھاڑا دند تیرے کیہے تیز اساں تے ہے بڈھیا بگھیاڑا
Verse 175یوسف ثانی ویکھ جوانی ترس نہ آوے تینوں خوب جوان اجیہا پکڑیں عالم دیکھے جینوں
Verse 176پیا خیال اساڈے ویری کس نوں کوک سنائیئےظالم ستم ہمیشہ کردا کت پاسے نس جائیے
Verse 177اول لا امید بھلے دی قید بری وچ پاندا کھڑ خرشید دپہراں اتے دھرتی وتّ تپاندا
Verse 178دن دن ودھ گھٹّ چنے دا کر چودیں نوں کر پورا پھیر اٹھائییں راتیں توڑی کر چھڈدا بینورا
Verse 179کوک دہائی کرے لوکائی دولابی اسمانوں نت کھوہے وچ سٹدا پھڑکے روشن چن جہانوں
Verse 180باغ دلاں دے اندر چردا ہکّ لڈکا پھڑ کے بگھیاڑاں دے ہتھ پھڑاندا ونڈ ونڈ کھاؤ کھڑ کے
Verse 181ننگے سر پہاڑ چکائے جنہاں پھلّ نہ چایاویکھو پھلّ گلاب چوترفوں سیخاں دے منہ آیا
Verse 182باغیں سیر کریندی بلبل پکڑ پنجر وچ پاوے صیف-ملوک جیہے تن نازک ایسے دکھ سہاوے
Verse 183جاں اس بڈھے باز اسمانے سٹیا درگ شاہزادہ ترٹے فٹّ پرانے مڑ کے ہویا درد زیادہ
Verse 184زارو زار روئے وچ درگے رتو نیر اچھلے بھارے سنگل کاٹھ پئے سن کجھ ہتھ پیر نہ ہلے
Verse 185رین دناں کجھ چین نہ رہا وین کرے دکھیارے فکر دھیان نہ جان اپنی دا دل وچ سان پیارے
Verse 186ایہہ کی سخت زمانہ آیا ہائے ہائے وے اسماناں قدر بکدری موجاں مانے ہر کوئی وچ جہاناں
Verse 187مینوں دن دن دکھ زیادہ ہوروں ہور سیاپے کتھے وطن کتھے سنگ ساتھی کتھے دکھیئے ماپے
Verse 188کتھے شاید کتھے ملکہ کتھے باغ-ارم دا کون کرے اج بھال محمد ہووے بھنجال اس غم دا
Verse 189نال میرے کی نالش تیری ہے اسمان بلندا میں کی شرکت سادھن جوگا آزز خاکی بندہ
Verse 190میں شہدے پردیسی بندے کی گوایا تیرا نہ کوئی تیرا تارہ لاہیا نہ چن چایا تیرا
Verse 191ملکوں دیسوں باہر کڈھ کے مگر میرے کیوں لگوں اجے میرے پر تھوڑی ہوئی کی کجھ کرسیں اگوں
Verse 192شوق سجن دے والی مینوں مشکل آہی تھوڑی بیدادی انیائیں راجا بھلی عدالت توڑی
Verse 193اگے بھار غماں دے میرے چور کیتے ہڈّ سارے ہور اتوں دس حصے پائیؤ ای ہے ظالم ہتیارے
Verse 194ایسے پاپ کماون وچوں کی تینوں ہتھ لگدا کی لجاسیں دنیاں اتوں پھریں غریباں ٹھگدا
Verse 195لسے اتے زور لگاون کم نہ زوراور دا مویاں ہویاں نوں پھر کی ماریں بیئنسافا مردا
Verse 196میں تے اگے عشقَ پری دے مار کیتا نترانامردے تے کی زور لگاویں ہوئِ ایسا سترانا
Verse 197اگے ہی میں درداں والا سانگاں سار پروتا اٹھدا بہندا روندا رہندا روندا پیا کھلوتا
Verse 198جمدڑیاں بھا پئے قضیے سکھ نہ ڈٹھا کائی عمراں دے دکھیارے تائیں نجّ جنیندی مائی
Verse 199یا پھر زہر آلودہ گڑھتی اس دم دندی دائی میرے تھاں کٹے دکھ کہڑا متھے دی لکھوائی
Verse 200وقت جوانی عیش جہانی پنج ستّ روز عمر دے ایویں دکھاں وچ لنگھائے رو رو آہیں بھردے
Verse 201پل-صراط جیہے سے پینڈے جھلّ جھلّ روز حشر دے باغ-ارم وچ پہتا ہیساں کول اپنے دلبر دے
Verse 202موج غماں دی اندر آئی رڑھدی جان نمانی نہ کنڈھی نہ پل بریتے جل تھل دسدا پانی
Verse 203دوروں نظر پئی اک بیڑی پانی اتے تردی پکی آس لگی وچ دل دے ہوئی مہر خضر دی
Verse 204نیڑے آئی کھاون دھائی بن سنسار مریلا یار ملن دی ہکھی ہویا دشمن دے سنگ میلہ
Verse 205تتی ریت دکھاں دی اندر میں ترہایا سڑدا پانی دا ڈل نظریں آیا ٹریوسُ اٹھدا جھڑدا
Verse 206نیڑے جا ڈٹھا جس ویلے اوہ آہے بھٹھّ بلدے ترٹی آس پیاس تپایا ہڈّ کلیجہ جلدے
Verse 207سراندیپوں آندوئی پریئے ہکھی لا وصل دی راہے قید کرائیوئی مینوں خبر نہ سی اس گلّ دی
Verse 208شاہ بدیع-جمال پری دی صورتَ حاضر کر کے غم دے گلے الاہمے کردا رو رو آہیں بھرکے
Verse 209بھلّ گیا تدھ اوہ رل بہنا قول قرار زبانی اول لاء امید وصل دی ہن ہوئیؤں بیگانی
Verse 210یاری لاء پریت پکائی باوفا نہ رہیئیںہن کیوں ڈٹھے باجھ گناہوں چھپ کتے ولّ گئییں
Verse 211گیا وفا تساڈے دل تھیں بھلی محبت گھولی کار میری جند واراں تدھ توں کم تیرا بد-کولی
Verse 212میری جان محبت تیری تدھ نہ وچ دلیلاں ایسے کم نہ لایق پریئے تیرے جیہا اسیلاں
Verse 213کھوہ پیاں میں تیرے پچھے ہتھ دھوتے ہن جانوں شاید یاد نہیں تدھ کیتا مینوں کدی زبانوں
Verse 214غم تیرے وچ گئی جوانی جان چلی ہن اتھے سی تکرار ملن دا پریئے دسّ ہن ملسیں کتھے
Verse 215یاری لاکے چائیوئی اول سٹیوئی وچ خواری ایہہ بدزن نہ آہا تدھ تے جد میں لائی یاری
Verse 216ویکھاں کیڈ سوگنداں چائیاں کیسے نہں لگائے ہن تدھ منوں بھلایا مینوں اوہ دن یاد نہ آئے
Verse 217توڑے عاشق کجھ نہ کہسی تینوں عیب نہ لاسی ہور بھی خلقت دنیاں اتے کد ایہہ گلّ پچاسی
Verse 218تئنے لوک دیویگا سارا کچرک اندر وڑسیں بے وفا کہیگی خلقت کس کس دا منہ پھڑسیں
Verse 219کہسن واہ یارانہ تیرا یاد نہ کیتو ای جانی یار بنا مڑ سار نہ لئیؤئی مار کرائیوئی فانی
Verse 220توڑے میں نہ تکساں جا کے خلقت ہور تکیسیجگّ بدنام کریگا تینوں بولی لوک مریسی
Verse 221کس مذہب وچ زائز آہا بھجن قول قراروں 'افو بئہدی' پڑھ پڑھ پریئے مکھ نہ موڑیں یاروں
Verse 222ویکھاں یار قرار چمن دا کی گلاں پھل پائے نازک بدن اتے اٹھ خاراں نیزے آن لگائے
Verse 223ویکھ شراب شرابی تائیں سٹ سٹ کے منہ بھندا تاہیں نام حرام دھرائیوسُ پاک سئیں دا بندا
Verse 224ویکھاں رات پیالہ چن دا جس ویلے بھنّ سٹدی عالم تے منہ کالکھ لیندی رشنائی وی گھٹدی
Verse 225کی امید تیرے سنگ رکھاں کس ہکھی خوش ہوواں عمر چلی تدھ قول نہ پالے پیا نصیبے روواں
Verse 226ایسا مرد نہیں میں کچا تیری بیپرواہیوںیاد تیری تھیں غافل ہوواں نساں تیغوں واہیؤں
Verse 227عشقَ تیرے دے رستے اندر جے لکھ سختی سہساں رنج ہو کے اک قدم نہ ہٹساں پھیر اتے ولّ ڈھہساں
Verse 228کون تکے اس ویلے آ کے حالت میری مندی اک فراقَ دوآ تن گھائل قید ہویا وچ بندی
Verse 229نہ منہ یار وکھاون جوگا کراں شنگار جے لاکھاں نہ دل ایہہ گواہی دیندا بے وفا تدھ آکھاں
Verse 230آزز کیتا خو تیری نے نام تیرا کی دھریئے نہ جانی نہ دشمن جانی دوئیے کہندے ڈریئے
Verse 231جے لکھ ظلم کرو پھر رکھساں جانی نال تسانوں نام بدیع-جمال جنہاں دا خون حلال تنھاں نوں
Verse 232خوب شکل محبوب اجیہا مشکل تروڑن یاری سو سو واری راہ اوہدے تے بہتر ہے جند واری
Verse 233گلے الاہمے آکھ شاہزادہ مڑ کے پچھوتاوےنال خیال جمال پری دے حالَ احوال سناوے
Verse 234کہندا ہے بدیع-جمالے میں تدھ پیا وچھوڑامیں رنجور تیرے غم اندر تدھ بھی نہ غم تھوڑا
Verse 235پیر شہید کرے کوئی مدد لاوے تیر نشانے اس قیدوں تے درد فراکوں کڈھے کسے بہانے
Verse 236ٹھنڈی واء تساڈے ولّ دی اس کھوہ وچ نہ لگدی جس واؤ وچ بو نہ تیری ساڑے وانگر اگّ دی
Verse 237متھا مار زمیں پر پٹکے ڈھہندا کھلا کھلوتاکہندا یار وچھنا تدھ تھیں درداں وچ پروتا
Verse 238کجھ گناہ بے ادبی ہوئی قید ہوئیوسُ اس راہوں چاہ تیری دی بھاہ قبولی کون کڈھے ہن چاہوں
Verse 239ہتھیں پیریں سنگل بیڑی آئِ ویکھاں میں قیدی دکھ جھلاں تے مکھ نہ موڑاں تیر دل امیدی
Verse 240جے میں لکھ بے ادبی کیتی کیتا اپنا بھرنا توں حاکم میں رعیت تیری کر لے جو کجھ کرنا
Verse 241ہرگز چتّ نہ لیا پیارے کیتا سخن دلیری رحم کریں ہن آزز ہویا قید بری تکّ میری
Verse 242جے میں سو گستاخی کیتی ظلم تیرے کجھ جھلے اجے نہیں گستاخی کیتی نہ کر ستم اولے
Verse 243ایسے طرحاں نہ رکھ ہمیشہ مار اکے کر یاری یا تلواری دا منہ دیکھاں یا منہ دس اک واری
Verse 244جے میں نال تساڈے مندا جانے ربّ دلیلاں بے دوسے سر دوش قبولے اگوں شرم اسیلاں
Verse 245جیوندیاں تدھ یاد نہ کیتا مویاں دلاسہ دیسیں ہے امید تیرے تے سجنا ! متّ سر ہتھ دھریسیں
Verse 246ہتھیں مار ہوواں قربانی دم تیرے سر لگے کھوہ پیا ایہہ جیون میرا مرن بھلا تدھ اگے
Verse 247پاس تیرے ہن پہنچن اوکھا گلساں وچ درگاں درد میرا سردردی تینوں کیونکر نیڑے پگاں
Verse 248نموجھان بکل وچ بیٹھا ڈردا سیس نہ چاواں دور بھلا متّ کول ہوواں تاں تینوں حرج پچاواں
Verse 249خوشی رہو توں یار پیارے دور اسیں دکھیارے سکھ نصیب تیرے میں چائے بھر دکھاں دے کھارے
Verse 250دکھ سدا سکھ گاہ-ب-گاہ دکھاں توں سکھ وارے دکھ قبول محمد بخشا راضی رہن پیارے
Verse 251ہے سجنا ! ہن پہنچ شتابی واگ چلی چھٹ ہتھوں ایہو خوف آہا دل میرے ایس بیگانی ستھوں
Verse 252تدھ کیہا سی نہ ڈر مولے کرساں میں اپرالا ہن اس سخت مصیبت اندر ہوئیوسُ مرنے والا
Verse 253حسن جمال تیرا کس کاری عاشق سکدا مرسی جاں دیدے نابینے ہوئے پھر سرمہ کی کرسی
Verse 254دمبا جد بگھیاڑاں کھادھا آجڑیاں کی کرنا کانگے نیہہ گھراں دی پٹی کس اتے چھت دھرنا
Verse 255جاں کھیتی دا ککھّ نہ رہا نہ سکا نہ ہریا کس کم دھپ پکاون والی کس کم بدل ورھیا
Verse 256سجنا ! سار نہ لئیا میری آ ویکھاں کی رولا نکّ وچ آئے ساس محمد درشن دس مکبولا
Verse 257دکھ میرے کی آکھن جوگے کد آون وچ لیکھے تد پتیجے یار محمد جیکر اکھیں ویکھے
Verse 258کتھے یار کتھے میں قیدی کتھے شاید بھائی کون ونڈے اج دکھ محمد حالَ نہ تکدا کائی
Verse 259صیف-ملوک درگے اندر بہت ہویا دکھیارا اگّ فراقَ کیتا دل پرزے نہ سجھدا چھٹکارا
Verse 260پل پل سال مثال گزارے اک اک روز حشر دا رین لنگھائے وین کریندا نہ جیوے نہ مردا
Verse 261انت حساب دکھاں دا ناہیں لوں لوں ہویا شکستہ دل بستا تن خستہ بستا نالے بستا رستہ
Verse 262نال تیمم کرے عبادت پڑھدا نفل نمازاں مکن کد غماں دیاں راتاں ہویا دور درازاں
Verse 263کالی رات وچھوڑے والی ڈھکی وچ درگے ہتھیں پیریں سنگل بیڑی کیکن عاشق پگے
Verse 264کون سنے تے کہڑا پچھے جے سو کرے ککاراصبروں باجھ علاج نہ کوئی صبر کرے بیچارا
Verse 265کوکے موت نہیں میں جوگی کس دی آئی لے لاںجاگدیاں نت کٹی لیلاں جیوں مجنوں بن لیلاں
Verse 266آئی رات اک رحمت والی وانگر لیل قدر دے امبر سبز بغیچا کیتا تازہ نور بدر دے
Verse 267نیلے چھتر اسمان کھلارے چھتے لائِ سنہری فرش فلک دے اتے تارے نچن وچ کچہری
Verse 268نسدا پھرے شیطان دراڈا کھاوے خوف شہابے'لا ہول وا لا کوتا ' پکارن چوکیدار جنابے
Verse 269رات کیتی کستوری ہلے سبھ ہوائ جہانی لعلاں وانگر چن چمکدا صاف زمین نورانی
Verse 270باغاں اندر چھاں رکھاں دی نقش نگار بنائے کالی چھاں چٹا وچ چانن خوش میگان وچھائے
Verse 271ماہی مرغ آسودے ہوئے وحشی شیر آرامی خوش ہوا سکھائی سبھناں ستے سکھ تمامی
Verse 272باراں اندر بستر کیتے رل شیراں تے ہرناں شاہ کتے رل ستے آہے ویر نہیں اج کرنا
Verse 273کچھڑ وچ سوالے چوہے بلی جیوں مشتاقاں باز تتر اک اڈے اتے بیٹھے نال اتفاکاں
Verse 274نیندر کٹھے کر سواندی چوراں چوکیداراں غفلت نشہ رقیباں چڑھیا یار ستے سنگ یاراں
Verse 275صیف-ملوک درگے اندر بیٹھ اکلا جاگے ربّ دی دتی سخت مصیبت پیا سرے تے جھاگے
Verse 276مورت دے چمکارے کولوں کھوہ اندر رشنائیطرف اسمان تکے شاہزادہ دسدا تارہ کائی
Verse 277روٹی پانی آون والا منگھ آہا جو اتے اوتھوں زہرا تارہ ڈٹھوسُ طالع جاگے ستے
Verse 278صیف-ملوک ڈٹھا جد زہرا کہندا اس نوں رو کے عرض کراں تدھ اگے زہرا سن خاں گھڑی کھلو کے
Verse 279تینوں ربّ بھلیائی دتی مندے روز ہٹاویںبخت بخیل کسے دے ہوون طالع نیک وٹاویں
Verse 280چانن تیرا رات اندھاروں کردا خوب اجالے فتہمند تیرے تھیں ہندے طالع دولت والے
Verse 281تونہیں نور مثال حضوری خوشی کریندیاں یاراں سبھ کوئی چاکر تیرا ای ہے توں وانگر سرداراں
Verse 282لطفَ سخاوت کم ہمیشہ سرداراں دی خوبی کر خاں لطفَ میری ہن بیڑی لا بنے کڈھ ڈبی
Verse 283سنئیں ہتھ تیرے وچ کنجی ہر مشکل دے در دی بارھیں گھریں تیرا ہے پھیرا مختاری ہر گھر دی
Verse 284سبت سراں خوش گاون والے تیرے ناں تھیں پاندے خلقت عطر امبیر تیرے تھیں منگ ہمیشہ لاندے
Verse 285چھاپ شہانی دا توں تھیوا عیشاں دے گھر رانی توں ساجن جند میری دا دارو خبر اوہدی اج آنی
Verse 286زہرا لنگھ رہی پھر لگا مشتریؤں چمکارا اس اگے اٹھ عرض کریندا صیف-ملوک بیچارا
Verse 287مشتری سئدِ اکبر تینوں آکھے سبھ لوکائیسچے سبھو وعدے تیرے نہ وچ کجھ خطائی
Verse 288نظر کریں تاں جان ودھاویں جگّ پر سکہ تیرا ہوون بخت بلند تیرے تھیں زور پھڑے دل میرا
Verse 289منشی خوش خط لکھن والا لکھیں خط عنایت ہر میدان تیری ہے فتہا والی خوب ولایت
Verse 290تدھ کولوں ہے راس براسا امن قرار جگت دا مائل نال صلاحَ تیری دے کاروبار جگت دا
Verse 291نال وفا تے مہر اپنی دے میں ولّ کریں نظارہ جے کوئی چارہ چلدا تیرا کردے خاں کوئی چارہ
Verse 292موڑ کویں بدبختی میری کردے بخت سولے نال میرے کر نیکی جیسی مرد کریندے بھلے
Verse 293اوہ تارہ بھی اہلے ہویا نٹھا گلّ گھسا کے صیف-ملوکے ڈٹھا اوہ بھی آپ پیا کھوہ جا کے
Verse 294دل وچ کرے دلیل شاہزادہ کی کم کرسن تارے آپ تخت توں ڈھہندے جاندے ہو غریب بیچارے
Verse 295جاتوسُ ایہہ خیال نہ پکا کی تارے میں سیواں ایہناں کولوں کم نہ ہندا سو وڈیائی دیواں
Verse 296ایہہ آپوں وچ قید حکم دے ٹردے اٹھ نکیلے رات دنے آرام نہ کردے سر-گرداں ہر ویلے
Verse 297رنا پھیر نمانا ہو کے خاص ربے دے در تے دائم جس دی لطفَ کریمی بے پرواہی ورتے
Verse 298عرض کرے شاہزادہ ربا تدھ بن نہیں پناہاں زہرے مشتریاں سبھ گولے توں شہنشاہ شاہاں
Verse 299ناموراں دیاں نعماں اتے نام تیرا سرنامہ کنہّ تیری وچ راہ نہ پایا کیا خاصاں کیا عاماں
Verse 300علم تیرا ہے پڑھنوں اگے کسے نہ پڑھیا سارا بھی دریا احسان تیرے دا بے حدّ انت شمارا
Verse 301توں مکسوداں دے بند کھولیں دیویں آپ مراداں اچے تدھ ہی اچے کیتے شاد کریں ناشاداں
Verse 302بند آزاد تیرے سبھ بندے ہور نہ ربّ کسے دا لوح-قلم تے امبر دھرتی توں ربّ سبھ کسے دا
Verse 303لہندا چڑھدا دکھن پربت ہور نمان اچاناں زور تیرے دے اگے ربا ہر اک ہے نترانا
Verse 304جو دانشور اکھیں والا ونجھ تیرے تکّ پہتاانھاں ڈورا ہویا شتابی حسن ڈٹھوسُ جاں بہتا
Verse 305جو کتے در تیرے اتے اوہناں ذاتاں پاکاں تینوں جس پچھاتا ناہیں سر اس دے تے خاکاں
Verse 306خاکی بدن میرا ربّ سائیاں ! گل کے آب ہویا ہے ویکھ حالَ غریب بندے دا کیڈ خراب ہویا ہے
Verse 307سٹّ نہ مینوں آزز ہوئیوسُ تدھ بن کون غریباں رحمت کنوں وانجھ نہ مولے چائ مہمان نواز نصیباں
Verse 308مینہہ وسا عنایت والا کالکھ ساری دھووے کالی رات ہجر دی میری جھبدے روشن ہووے
Verse 309آوے نیک دہاڑا میرا چھڈن بخت بہانے جس دم نظر کرم دی ہووے آون بھلے زمانے
Verse 310پئی دعا قبول حضوروں رحم ہویا سرکاری اسروں یسر کرن تے آیا چلی مصیبت ساری
Verse 311دکھیئے نین ہوئے نندرائے خواب مبارک ڈٹھی بند خلاص ملیگا جانی کھل پئی آ ہن چٹھی
Verse 312صبر کریں نہ-امید نہ ہوویں لیسیں اجر جنابوں مٹھے کم ہوون رہمانی بہتر کار شتابوں
Verse 313شدھ ہویا اے برج ستارہ گئی نحوست راسوں زاری سنی خداوند ساری فضل ہویا اس پاسوں
Verse 314صیف-ملوک شاہزادہ اٹھ کے پڑھن لگا شکرانے سو سو شکر زبانوں آکھے کرے ادا دو-گانے
Verse 315اٹھے پہر عبادت اندر رہندا نت کھلوتاعشقَ حقیقی ہویا مجازوں ہر میلوں دل دھوتا
Verse 316ایہہ مشغول عبادت اندر گلاں کول نہ کریئےتوڑے قید سنگل وچ ہوون پھیر شہاں تھیں ڈریئے
Verse 317عاشق قید محمد بخشا پیر نہ بدھے تیرے کر کجھ آہر چھڈاون والا کریں اتھے کی زیرے
Verse 318خدمتگار وفائی تائیں ہاں وہلا کر دھائی خبر قضیے دی کس کھڑنی کول تونہیں اس جائی
Verse 319شرستان اندر چل جلدی شاہپالے دے گھر نوں عاشق دی اس حالت والی خبر ہووے دلبر نوں
Verse 320صیف-ملوکے کول اکلا رہِ کے کی کماواں فوجاں چاڑھ لیاواں توڑوں تاں قیدوں چھڑکاواں
Verse 321مہر-افروز گئی جس ویلے کول شاہے شاہپالے گوشے گلّ سناون کارن جا کر وکھ بحالِ
Verse 322صیف-ملوکے دی گلّ ساری اول آخر توڑی کھولھ دسی شاہپالے اگے صفت کیتی بیؤڑی
Verse 323سن گلاں شاہپال شاہزادہ بہت تئجب ہویا آدمیئیں نوں عشقَ پری دا کیکر اٹھ کھلویا
Verse 324متھے وٹّ اکھیں وچ لالی چڑھیؤسُ غضب ہنیری تتا بول مائی نوں کہندا کی متّ ماری تیری
Verse 325اس آدم نے جادو پائے یا کوئی جڑی کھلائی یا کوئی منتر جنتر کیتا تیری ہوش بھلائی
Verse 326یا کوئی پڑھی ازیمت اس نے یا کوئی سیفی ڈالی یا سر تیرے اتوں پھیری لکڑ چائ بنگالی
Verse 327توں جے ایہہ منصوبہ کر کے آدم نال لیائی ایںنہ کجھ عقل قیاس کیتو ای ایویں ہی ٹر آئی ایں
Verse 328جو گلّ تدھ فرمائی مینوں باہر علم حسابوں دس مائی ایہہ مصلیٰ پٹھا پڑھیوئی کس کتابوں
Verse 329آدمیاں تے پریاں اندر ساک اگے کد ہوئے موتی تے گل ڈوڈے مائی کس نے جوڑ پروئے
Verse 330دوئیے زاتیں وکھو وکھی مولٰی آپ بنائیاں اول دے دن رلیاں ناہیں کس تھیں جان رلائیاں
Verse 331وڈے وڈیرے وڈکے ساڈے دیو ہور ہر تھاویںکسے نہیں ایہہ رسم قبولی شرع نویں توں پاویں
Verse 332ایہہ گل مول نہیں دل لگدی رسم نویں کد بھاوے قوم دیواں دی مندا چنگا آکھن جو دل آوے
Verse 333کلّ میری نوں وٹا لگے نیچ بناں ہر اک تھیں کلّ دیواں وچ پھکا ہوواں کی حاصل اس گلّ تھیں
Verse 334بھلی صلاحَ دسالیں مائی کریں خراب اسانوں ہور کوئی آکھ بچے تاں جاناں آکھاں کی تسانوں
Verse 335ربّ پناہ دیوے اس کموں ننگ ناموس نہ لاہے پتّ بھلا توں مائی اچھی ٹوریں اوجھڑ راہے
Verse 336جے کسمت نے ایہو کرنی زور نہیں کجھ میرا اکھیں ویکھ ازماساں تاں بھی اوہ کوئی آندا تیرا
Verse 337اوہ آدم ازمائیں باجھوں عقل نہیں گلّ مندا کفّ اپنی چھڈّ غیر کفاں دا کہڑا سوہرا بندا
Verse 338شہرت تے بدنامی جوگا مینوں کریں نشانہ تاڑی مار تماشہ ویکھو مارو تیر جماناں
Verse 339بے وفا ہمیشہ لکھن آدمیاں نوں پریاں بھلّ خطائیاں خاکی لوکاں بنھ پنڈاں سر دھریاں
Verse 340دوجا توں جو آکھیں اس نوں سچا اچا ذاتوں رستم اسفند باش بناویں زوراوری صفاتوں
Verse 341ہور اوہدی جو کہی آ ساری سفر مصیبت بھاری اسفند باش قلعے دی فتہا ملکہ دی غمخاری
Verse 342صورتَ تے تدھ ڈٹھی اکھیں ایہہ گلاں سبھ سنیاں سنیاں تے کی باور مائی کوڑ بہں وچ دنیاں
Verse 343ہر کوئی شیر کہاوے آپوں کہڑا پاء سداندا رستم بہت کہاون مونہوں پر ہتھ کون دکھاندا
Verse 344جو رستم سدواندا مونہوں کد اوہ ایسا ہوسی جدوں کسے آزمایش کیتی پیا سرو سر روسی
Verse 345کس گواہی دتی تینوں ہے ایہہ مرد اجیہا یا توں ڈھل پئییں سن مونہوں جو کجھ اس نے کیہا
Verse 346چھڈّ خیال نکما مائی نہ کر کھہڑا میرا نہ ایہہ گلّ پیسندی آوے حکم نہ مڑدا تیرا
Verse 347مہر-افروز کیہا شاہپالا کیوں تدھ چڑھن سرنڈے لاہ دلے دے چشمے اتوں غصے دے ککھّ کنڈے
Verse 348کنّ دلے دے دھرکے سن خاں تاں آکھاں گلّ سچی مینوں بھی ایہہ گلاں سن کے پیندیاں ہی اگّ مچی
Verse 349غصے ہو افریتے تائیں جھڑکاں دے دبکایا مارن لگی ساں اس دیوے جہڑا چائ لیایا
Verse 350جاں اس صفت سنا سنائی دتی عقل گواہی ویکھ لیئیے اوہ آدمزادا کیسا مرد سپاہی
Verse 351مجلس سنے اسانوں لگی ویکھدیاں حیرانی ودھ ڈٹھی سو حصہ صورتَ جو سی سنی زبانی
Verse 352سیرت عقل آواز ہدایت بھنی زور جوانی آدم کی اک نظریں آیا مظہر روپ ہکانی
Verse 353آدم پری فرشتہ کوئی ایسا نظر نہ آیا مجلس تے اقبال اوہدے دا پھریا سارے سایہ
Verse 354صفتاں عمر تکاں تدبیراں تکّ تکّ جیوڑا لوبھے ایہہ بدیع-جمال میری دا کنت ہوئے تد سوبھے
Verse 355ہر دا قابل نظریں آیا ایڈے ملّ تاں پائے متّ یاری لا ہور کسے دی اٹھ پیش ارے جائے
Verse 356اس جیہا کوئی تارہ کڈھے مول نہ امبر سردا کد جموں کوئی بیٹا ایسا ثانی ہار گہر دا
Verse 357اسے نال ویاہیے بیٹی لایق ایہہ اس گلّ دے تول برابر کیتے موتی کنڈے چاڑھ عقل دے
Verse 358میں ہن اپنی عقلوں جوڑی ایہناں دوہاں دی جوڑی اکھیں ویکھ آزماؤ اول بہتر ہے گلّ لوڑی
Verse 359ذات صفات پچھانو اس دی ویکھو صورتَ سیرت چلدے راہ منکھ پرکھیں تینوں ایڈ بصیرت
Verse 360اکھیں ویکھ پرکھ شاہزادہ متّ تیرا دل جمے کر ناطہ تدھ نظریں آوے جے لایق اس کمے
Verse 361ایہہ گلاں کر مہر-افروزے ظاہر کڈھ وکھائی خط بدیع-جمال پری دے جو اس ولّ سن آئے
Verse 362واچ رکے شاہپال بہادر چپّ کیتا شرمایا جھٹّ گھڑی کوئی فکر دلیلاں کر کے قید بہایا
Verse 363نال فکر دے پیلے ہوئے دیدے غضبوں رتے گرمی چھوڑ پیا وچ نرمی بھلّ گئے سبھ چتے
Verse 364بیٹی میری عاشق ہوئی اکھیں ڈٹھے ور دی پیش نہیں ہن جاندی مولے غیرت غصہ مردی
Verse 365جے میں ایہہ صلاحَ نہ منی خالی نہیں فسادوں مائی بھی دلگیر ہوئےگی نہیں وساہ اؤلادوں
Verse 366جچّ ہویا شاہپال بیچارا راہ نہ لبھدا کائی مہر-افروزے کولوں پچھدا دس کوئی ڈھبّ مائی
Verse 367دانشمند وڈیری تونہیں ماں پیو دی جائی نہیں خطا نصیحت تیری کئی واری ازمائی
Verse 368مہر افروز کیہا میں بڈھی عمر میری سے برساں ٹھنڈیوں تتیوں پے پے نکلی پڑھ چکی کئی درساں
Verse 369نیکی بدی زمانے اندر تکّ تکّ وقت لنگھایا مٹھا کوڑا پھل جگت دا چکھّ چکھّ کے ازمایا
Verse 370ویکھدیاں سر چٹا ہویا بازی گری فلک دی اک تقدیر الٰہی اگے کوئی تدبیر نہ پکدی
Verse 371علم قیافے اندر ڈٹھا رمل نجوم حسابوں ایہہ جوان شاہزادہ سچا پرکھی ذات شرابوں
Verse 372دسدا ہے ایہہ لئل بدخشاں گوہر شاہنشاہی دوروں آکھ دہائیاں دندے سبھ عنوان گواہی
Verse 373صورتَ سیرت علم ہدایت عقل ادب اکبالوںظاہر پیا شاہزادہ دسدا ہر نکشوں ہر چالوں
Verse 374صورتَ ڈٹھی مجلس کیتی پرکھ لیا تدبیروں دانشمند منکھ پچھانن صورتَ دی تصویروں
Verse 375شرف اصیل پچھاتا اصلوں ہے تحقیق شاہزادہ ایڈ دلیری ہمت جسدی شیروں زور زیادہ
Verse 376غیر کفاں تے کف دی لالا نہیں سیانپ کائی اربہ عناصر تھیں سبھ ہوئی آدم جنّ لوکائی
Verse 377نہ ایہہ پریاں خاکوں خالی آدم پاک نہ ناروں مڈھوں اکو جنس محمد فرق پئے وچکاروں
Verse 378اگّ جنہاں وچ پئی زیادہ ناری اوہناں کہایا خاک جنہاں وچ وافر آئی خاکی نام دھرایا
Verse 379ایہناں دوہاں وچ ناطہ ہووے جے قسمت دے زوروں آدم اچ نہیں کجھ وٹا عیب ٹھگوں یا چوروں
Verse 380ساک بدیع-جمال پری دا دہ شہزادے تائیں نہیں تاں بہت افسوس کرینگا جاسی وقت ازائیں
Verse 381صیف-ملوک بدیع-جمالے جے تدھ نہ پرنایا پچھوتاسیں پھیر نہ پاسیں ویلا وقت وہایا
Verse 382خاتر جمع جمیعت کر کے لاہ اندیشہ لایا اوہ مہمان خدا دا گھلیا جو در تیرے آیا
Verse 383اپنے کول بلاکے اس نوں کر کے غور دلاسہمدھ پلا پرکھ شرافت کیا تولا کیا ماسہ
Verse 384جے معلوم اصیل کیتو ای ناطہ دے نوازیں دوہاں دلاں سکندیاں تائیں میل موافک سازیں
Verse 385متّ انکار کریں اس کموں دونا دینا آوے ڈاڈھا ہے سلطان عشقَ دا سخت سزا سہاوے
Verse 386پیش آوے کوئی ہور خرابی بھا پوے بدنامی شہرت ہوئی جہانے اندر ہسن خاصی عامی
Verse 387عشقَ زوراور شیر شکاری اس دا ہاڑ نہ خالی چھیڑ کھہیڑ نہ کریئے مارے انگل جس دسالی
Verse 388کوئی ہتھیار نہ پونہدا اس نوں نہ پھٹ لگدا کاری مار اپنا چھڈّ جاندا ناہیں چڑھیا کرے خواری
Verse 389مہر-افروز صلاحَ دسالی شاہپالے دل لگی متّ موڑاں تاں مڑے نہ مڑکے الٹی سیفی وگی
Verse 390حکم دتوسُ شہزادے تائیں وچ حضور لیاؤمجلس خاص میری وچ بیٹھے رل دانے ازماؤ
Verse 391محرم کرو کچہری اندر مول نہ رہے بیگانہ ذات صفات ازمائ پچھانو سچ یا کوڑ بہانہ
Verse 392جاں کوئی روز اساں وچ رہسی ہر کاروں ہر گلوں تانا پیٹا مالم ہوسی دریافت ہر ولوں
Verse 393اس ویلے چا کم کراںگے جو عقلے وچ آیا کوئی زبان نہ دیواں اگوں جب لگ نہ ازمایا
Verse 394شاہ پالے حیرانی آہی ایس تئجب باتوں اگے نہیں پری دا عاشق سنیا آدم ذاتوں
Verse 395جنس اپنی دا عشقَ محبت لگدا کسے کسے نوں نہ جنسے دا شوق اجیہا سنیا مرد اسے نوں
Verse 396گلّ نہیں ایہہ ایویں کیویں ہے امداد ربانی ایسے کم مجازی کتھوں خاصہ سر-ہکانی
Verse 397مائی کولوں پچھن لگا کتھے ہے اوہ بندہ جے اس چھوڑ اکلا آئییں کم کیتوئی مندا
Verse 398مائی کیہا نال لیاندا باغ-ارم وچ رہا ہے فلانے چشمے اتے ہن چھپوہدا کیہا
Verse 399شاہپالے فرمایا جھلیئے ایہہ کی برا کیتوئی چنگی بھلی سیانی بن کے ہتھیں زہر پیتوئی
Verse 400ایہہ دیواں دے جائ ٹکانے دیو آدم دے ویری پھڑ کھڑیا یا مار گوایا اوکھا ہوسی خیری
Verse 401اس ویلے پھر چالی پریاں بھلیاں بھلیاں گھلیاں باغ-ارم تھیں چا لیاؤ شہزادے نوں کھلیاں
Verse 402چائیں چائیں چاون چلیاں گاون چامل چائیاں ستے متے نوں چا جگاون اسیں آئیاں اسیں آئیاں
Verse 403جاں آئیاں تاں آن سہائیاں تیرے کوچے گلیاں بنیا ! کم تیرا ہن بنیا اسیں لیاون چلیاں
Verse 404ہر ہر سالی چمبے ڈالی چھٹیاں جھولن آئی کلی چمبے دی پھلّ رویلی ہر ہر چھٹی بنائی
Verse 405اٹھ وے لالا ستیا متیا سالڑیاں رل آئیاں ویکھن بنی بنے نوں ویکھن والڑیاں چل آئیاں
Verse 406سرمہ مہندی تے تل وٹنا عطر پھلیل لیائیاں پھلّ گلاب پروتے سہرا گند رویل لیائیاں
Verse 407اٹھ وے بنیا ! جاگ سویلے بنھ سرے پر چیرا والیں تیل پھلیل ملائیں اکھیں سرمہ ویرا
Verse 408لا مہندی مل وٹنا جوبن گوہڑا رنگ رنگایا بنھ سہرا تکّ شیشہ لالا چڑھدا روپ سوایا
Verse 409اسیں آئیاں اسیں آئیاں لالا چامل تیرے چائیاں جاگیں جاگیں جاگیں بنیا ! دیساں اسیں ودھائیاں
Verse 410لال بنے نوں لوڑن آئیاں اٹھ ٹر نال سئیاں دے منہ دکھلائیاں لے پیارے ویکھ جمال سئیاں دے
Verse 411اسیں آئیاں اسیں آئیاں لالا تدھ کیسر چھنکاونایویں سوہلے گاون پریاں خشیئیں خشیئیں آون
Verse 412باغ-ارم دے چشمے اتے لاڑا لوڑن آئیاں ڈھونڈن پتے نشانی ہر ہر پاسے اتے دھائیاں
Verse 413سائبان لگے سن اوویں بستر تے گاؤ-تکیئے کتے نہیں شاہزادہ دسدا کہڑا رستہ تکیئے
Verse 414لوڑ رہیاں سبھ باغ-ارم وچ صیف-ملوک نہ لدھا منہ کملانے مڑ کے ٹریاں چین نہ رہا ادھا
Verse 415نالے روون نالے گاون ساجن گھر اٹھ چلے گھڑی سویلے کیوں نہ آئیاں تاہیں ٹرے اکلے
Verse 416جس نوں لوڑن آئیاں آہیاں اوہ نہیں ہتھ لگا بھٹھّ اساڈا آون جاون بھٹھّ کوڑا اسرگا
Verse 417گرم اڈیک شاہے نوں ہوسی صیف-ملوک لیائیاں کی جواب کریساں اگے خالی ہتھیں آئیاں
Verse 418غالب چا تکن دا آہا صیف-ملوکے تائیں الٹے بھاگ نہ نظریں آیا ڈھونڈ رہیاں سبھ جائیں
Verse 419جے اس سانوں ملنا ناہاں کس شامت نوں آئیاں دل بجھے مڑ پچھے چلیاں آ کے پچھوتائیاں
Verse 420شان گمان کریندیاں آئیاں لا شنگار پوشاکاں میلے ویس کیتے مڑ آئیاں منہ سکے غمناکاں
Verse 421کوئی کدھرے کوئی کدھرے آوے کوئی پچھے کوئی اگے جیوں کر میل ویاہوں مڑیا آپو اپنی وگے
Verse 422تھکیاں ٹٹیاں آ گھر ڈھٹھیاں نہ امیدی پاروں جیوں کر مرد شکاری آون خالی ہتھ شکاروں
Verse 423آئِ بد خبر جواب دتو نے نہیں اوتھے شاہزادہ سن شاہپال سیانے تائیں لگا غم زیادہ
Verse 424چہل ہزار پری نوں جلدی حکم کیتا شاہپالےہر جائی ہر تھاں کتھاویں ہر کوئی اس نوں بھالے
Verse 425نالے آہو-خاتف سن کے باغ-ارم ولّ بھجیا ہائے ہائے اپنی ہتھیں مینوں پیر کہاڑا وجیا
Verse 426جس بستر تے چھوڑ گیا سی جا ڈٹھوسُ اوہ ڈیرہ صیف-ملوک نہ نظریں آئیوسُ خالی تھاں ہنیرا
Verse 427جان پئیوسُ متّ ادھر ادھر بول گیا یا جھاڑے اہلے باندے کول دراڈا ہر ہر پاسے تاڑے
Verse 428کدی نچلا بیٹھ اڈیکے متّ باہروں پھر آوے ویکھے راہ چوترف کھلوتا نال آواز بلاوے
Verse 429ڈھونڈ اڈیک رہا ہر پاسوں صیف-ملوک نہ آیا آہو-خاتف لوڑن ڈھونڈن سر گرداں ہوئِ دھایا
Verse 430آہو-خاتف روندا پٹدا لوڑ رہا سے کوہاں ہو بے تاب ڈھٹھا پھر اوڑک ڈھونڈ تھکا سبھ جوہاں
Verse 431پریاں دور نگاہاں دھریاں لوڑن سجو ساہیاں جت پاسوں کوئی آوے جاوے پچھن پاندھی راہیاں
Verse 432ہر جوہے ہر باغ مقامِ لوڑ کرن ہر پاسے ویکھن کھوج شہزادے والا ڈھونڈن لاہ وسواسے
Verse 433جتھے توڑی طاقت آہی بھجّ چکیاں اوہ پریاں کجھ نشانی پتہ نہ لگا پھر پھر ہٹیاں ہریاں
Verse 434جاں قلزم دے رستے پئیاں پری ملی اک راہوں اس کولوں ایہہ پچھن لگیاں آئییں توں اگاہوں
Verse 435اک شاہزادہ آدم زادہ کدھرے ڈٹھا ہوئی باغ-ارم تھیں اساں کھڑایا پتہ نہ لگدا کوئی
Verse 436اگوں اس پری نے کیہا دسّ تسانوں پاواں ڈٹھا میں فلانے ویلے آدم اک سچاواں
Verse 437چہلاں پریاں چائیں چائیں قلزم پاسے کھڑیا اتنی خبر مینوں بھی اگے پتہ نہیں کجھ اڑیا
Verse 438ایہو خبر لئی تے مڑیاں پریاں نال چلاکی شاہپالے نوں جا سنائی بجھ لگی غمناکی
Verse 439مائی نال خفا ہو لڑدا کی کیتی نادانیکھری پچھے ہے کہن سیانے اوڑک متّ زنانی
Verse 440اوہ پردیسی آدم زادہ لڑکا اک اکلا دیواں دے گھر سٹ کے آئییں عقل کیتو ای بھلا
Verse 441میں اگے سن بیٹھا گلاں دیو قلزم دے سارے اس آدم نوں پھرن ڈھونڈیندے بن کے ویری بھارے
Verse 442چھ ہزار پری نت پھردی اس آدم دی لوڑے جس بہرام شاہزادہ کٹھا باپ اوہدا کد چھوڑے
Verse 443جے اوہ ہاشم نوں ہتھ لگا مار نیاں وچ دیسی بیٹے دا غم ڈاڈھا اس نوں بدلہ کدوں چھڈیسی
Verse 444جنہاں قلزم پاسے کھڑیا دشمن ہوسن اسدے ہائے ہائے اوہ نہ مردا توڑے اسیں اوہدے تھاں مردے
Verse 445ہن کوئی کرو صلاحَ سیانی ڈھلی گلّ نہ چھوڑو صیف-ملوک کویں مڑ آوے جھبّ مسلاہت جوڑو
Verse 446مجلس اندر گگا ہویا محلیں گئیاں آوازا اگے شاہ-پری دے دل وچ فکر آہا نت تازہ
Verse 447دادی مہر-افروزے تائیں جلدی کول بلائیوسُکیسا شور کچہری اٹھیا دل میرا گھبرائیوسُ
Verse 448جیؤ میرا سن گوگا اوتھے بے آرام ہویا ہے سچو سچ دسال شتابی کی کمام ہویا ہے
Verse 449ایہناں گلاں دا سن کے رولا نہیں تحمل رہا دس حقیقت کی کجھ گزری پہتا کی سنیہا
Verse 450مہر-افروزے سچ نہ دسیا اول رہی بھلاندی شاہ-پری دا چتّ نہ ٹھہرے چھڈّ خیال نہ جاندی
Verse 451جدوں بدیع-جمالے مڑ مڑ مہر-افروز اکائی کہیوسُ دھیے کی میں دساں چیز اک وڈی کھڑائی
Verse 452باغ-ارم وچ چھڈیا آہا صیف-ملوک شاہزادہ ہن اوہ گمّ ہویا نہیں لبھدا کیتی لوڑ زیادہ
Verse 453قلزم پاسے کھڑیا دیواں پیندی دس ہوائی گیا گواتا ربّ ملائے ہور علاج نہ کائی
Verse 454وچ سمندر جھڑیا موتی کیکر مڑ ہتھ آوے شیشہ وٹیاں اندر ڈھٹھا ثابت ربّ بچاوے
Verse 455سن ایہہ گلّ بدیع-جمالے پاڑ گوایا جھگا شرم حیا کھلوون کیکر جھلّ عشقَ دا لگا
Verse 456پٹیاں پٹّ زمیں پر سٹیاں چکیں باہاں کٹیاں کٹیاں ایڈ مہماں اس نے بھلیاں کھٹیاں وٹیاں
Verse 457پنجے مار چھلے سبھ چہرہ پا سرے پر سجی کپڑے سجے دیدے سجے رو رو اجے نہ رجی
Verse 458دھونسے مار چڑھے غم لشکر نٹھے صبر سہارے آہیں ڈھاہیں نال نہ رجدی ننگ ناموس اتارے
Verse 459پھلاں کارن جھول کھلاری اگوں پئے انگارے آیا گھروں سہاگ کھڑایا بھاگ تتی دے ہارے
Verse 460لگی سانگ بندوق کلیجے بانہہ سرے پر کوکے یاد کرے فریاداں کر کے دلبر صیف-ملوکے
Verse 461تتی جلدی بلدی کھوہری کھاؤں کھاؤں کر کے دادی تائیں آکھن لگی بولی ہاں میں مر کے
Verse 462جاتا میں غمخار تسانوں ماں پیو بھین بھراؤںمہر محبت تیری جاتی وافر ہر ہر تھاؤں
Verse 463مرضی دان مجازی میرے دی لاڈ میرے سیں جھلدی چاہ مراد دلے دی ساری بن منگے نت گھلدی
Verse 464ڈردی نے میں ماں پیو اگے ویدن کہیا نہ دل دا دردی سمجھ تسانوں دسیا متّ شہہ ہووے ملدا
Verse 465اپنے اتے جاتا آہا مشفق بہت جہانوں جانوں ودھ ایمان پیاری سونپی تد تسانوں
Verse 466سنگ سئیاں تے ماسی پھپھی ماپے ساک قبیلہ سبھ تھیں سجن ویکھ تسانوں لڑ پھڑیا کر حیلہ
Verse 467مینوں خبر نہ آہی دادی حرص بھلاؤ تیری نال دغے دے گمّ کریسیں وسط پیاری میری
Verse 468جان میری اس بندے اندر جو تدھ کتے کھپایا گجھا ویر کیتوئی تیرا میں سی کی گوایا
Verse 469جیہی امید بھلے دی آہی تیرے اتے مینوں ایسا برا کیتو ای رجّ کے کیکر پچسی تینوں
Verse 470مینوں ایہہ معلوم نہ آہا کوڑ دلاسہ تیرا بہت اعتبار تیرے پر آہا ساہ وساہ گھنیرا
Verse 471تدھ میرے سنگ ایسی کیتی جیسی کوئی نہ کردا ویری ویری نال اجیہی کردا ربّ تھیں ڈردا
Verse 472جے میری زندگانی لوڑیں جھبّ اس نوں کر پیدا نہیں تے کھا کٹاری مرساں مینوں ورم اسے دا
Verse 473جسے جامے میرے اندر اوہو جند پیاری جندو باجھ محمد بخشا جسا ہے کس کاری
Verse 474اس بن جیون گھڑی نہ میرا آئی باجھوں مرساں نام ناموس تساڈے کولوں صرفہ مول نہ کرساں
Verse 475ایہہ تکّ جان لباں پر میری تکدی کھلی جوابےجاں توں صاف جواب سنایا دھرسی پیر رکابے
Verse 476ایہہ گل آکھ ڈھٹھی سر پرنے غش پری نوں آئی مردے وانگ ہویا سبھ جسا حالَ نہ رہیوسُ کائی
Verse 477نیلی پیلی ہوئی نمانی تختے وانگر دیہی سئیاں چا پلنگ تے رکھی کموں گئی اجیہی
Verse 478پکڑ ہلاون اتے بلاون گلّ کراون سئیاں نال اوہناں دے گلّ نہ کردی جے سو آکھن پئیاں
Verse 479اکھیں تاڑے لگیاں ویکھن رستہ یار سجن دا عاشق اتے شہید محمد نہ محتاج کفن دا
Verse 480مونہوں چپّ چپاتی دسے حالَ کرے فریاداں کہندی سڑے نصیب تتی دے کون دئے اج داداں
Verse 481نیک ستارہ میرا سئیؤ بری نحوست پھڑیا تارہ برج اقبال میرے دا منہ دا ہو کے جھڑیا
Verse 482ڈاڈھا ظلم میرے سر آیا اچنچیت اکاسوںخبر نہیں کی پاپ کمایا گئے بھلے دن راسوں
Verse 483ہائے افسوس کیتا کیوں رخصت سراندیپ شہر تھیں مہیئیں کڈھ نچھکا کیتا لشکر تے گھر زر تھیں
Verse 484سراندیپ اندر جے رہندا ملدی پا مہینہ اج پتے بن لوڑن جاواں کہڑے دیس زمیناں
Verse 485اپنی ہتھیں پیر کہاڑا مار لیا میں تتی شربت صاف وصل دے اندر زہر پڑی میں گھتی
Verse 486آپ پیارا وداع کیتا تاں پیڑاں سر سہیاں مفت نیامت اگوں چائی کد پچے میں جہیاں
Verse 487ہائے افسوس زیان اجیہا نہیں پچایا جاندا صیف-ملوک ملے ہن کتھوں گمّ کیتا جس آندا
Verse 488کیسی نال میرے تدھ کیتی اے ویری اسماناں بھورے کتدی ہسدی وتدی خوشیاں نال گماناں
Verse 489عیشاں لاڈ کریندی تتی اچنچیت ایانی بری مصیبت اندر پائیؤ جیوں کر تل وچ گھانی
Verse 490خبر نہیں کی ہک تیرے وچ برا بندی تھیں ہویا تاں توں کھولھ غماں دا بوہا قہر میرے سر ڈھویا
Verse 491اول یار وکھائیوئی مینوں اندر باغ بہاراں خس میرا دل دتوئی اس نوں لگے فکر ہزاراں
Verse 492سکھیا جان ہوئی دکھیاری عشقَ جدوں گھٹ آیا پھلّ نہ جھلدی بال ایانی تدھ ایہہ بھار سہایا
Verse 493جھنڈ اوہدی دے کنڈل اندر کر اول دل قیدی لاء وچھوڑا دل دا چوڑا رکھیوئی پھیر امیدی
Verse 494اوڑک خس لیوئی جانی مار میرے تن کانی رجّ نہ ڈٹھا مکھ نہ کیتے سخن کلام زبانی
Verse 495شارستانے سارے اندر نشر ہوئی میں لٹی گھر گھر قصے ستھّ کچہری جگّ بدنامی کھٹی
Verse 496کھٹی ہوئیوسُ ماں پیو ولوں لاج کلے دی لاہی میں ناری نے ناری ہو کے خاکوں ملی سیاہی
Verse 497ہار پھلاں دے ہار گلے وچ پائی سی بدنامی دل آرام نہ دتوئی پھر بھی دن دن بے آرامی
Verse 498شہرت اتے ملامت جھلی نام دھرایا جھلی جھلی نہ تدھ عرض بندی دی آس مراد نہ گھلی
Verse 499سینے داغ لگائیوئی الٹا ہتھوں ساڑن لگا دم دم قہر میرے پور ورتے مشکل سجھدا اگا
Verse 500کچرک تیک وچھوڑے اندر میری جان جلیسیں بہت انصاف دتوئی اگے ہور اجے کی دیسیں
Verse 501جیکر یار ملانا نہیؤں وار میری جند تائیں دلبر دا سر-صدقہ کر کے کر خاں مار ازائیں
Verse 502بخش بندی بہں آزز ہوئیاں منّ سوال ربانانہیں تاں ہو اداسی ٹریگا سکدا ساس نمانا
Verse 503ہائِ ہائِ ربا آفت بجلی سر پئی تاں جاتی صیف-ملوکے باجھ اسانوں ہوئی حرام ہیاتی
Verse 504میں ہتیاری کتھے لوڑاں دل دی وسط کھڑاتیقبرے وچ تکیساں رستے مار چوطرفے جھاتی
Verse 505ہنجھو تیل ہڈاں دا بالن وانگ چکھا نت سڑساں روز حشر دے خلقت اندر ڈھونڈ متے لڑ پھڑساں
Verse 506دسن این لہو دے چشمے نین رتو بھر پھسدے موتی گلیاں ہار پروون پلک پلک نہ دسدے
Verse 507حالَ بدیع-جمال پری دا جاں ایہہ ڈٹھا دادی جلدی جلدی شاہپالے ولّ جا ہوئی فریادی
Verse 508مہر-افروزے دے دل اندر درد المبا بلیا صبر قرار آرام تحمل ککھاں وانگر جلیا
Verse 509شاہپالے نوں آکھن لگی اے سرتاج جنا دے پریاں دیو تیرے سبھ چاکر در توں سیس نہ چاندے
Verse 510شان تیرا ربّ اچا کیتا توں سلطان ملک دا پریاں دیو سجن تے دشمن در تیرے آ جھکدا
Verse 511شوکت عزت دولت تیری ایسی ربّ ودھائی توں سلیماں نبی تھیں پچھوں ہوئیوں اس دی جائی
Verse 512شرف اقبال تیرے دا تارہ رہے ہمیش چمکدا کوئی ہزیمت پیش نہ آوے رہیں مراداں تکدا
Verse 513ہن کجھ سائت الٹی ڈٹھی نمھا پیا ستارہ پٹھا پھیر زمانہ پھریا کرن لگا کوئی کارا
Verse 514متھے وٹّ تیرے پر پائیوسُ مہروں خالی ہو کے داڑھی پگّ تیری ولّ تکدا دشمن مثل کھلو کے
Verse 515بھارا اک قضیہ بنیا جس تھیں پتّ نہ رہسی بدنامی تے خجل خواری خلقت بریاں کہسی
Verse 516ناری منہ انگاری جیہا ہوسی کالا کولا کر کجھ جتن بچن دا بیٹا دیئی پناہاں مولٰی
Verse 517جگّ دی شہرت تے منہ کالکھ شالہ پیش نہ آوے بے-غیرت نامرداں اندر نہ کوئی ناواں لاوے
Verse 518بھی شرمندہ خوار نہ ہوویں ربّ سچے دے در تھیں نہ انیائیں نام دھرائیں ڈر خاں روز حشر تھیں
Verse 519بادشاہاں نوں پچھ ہوویگی مظلوماں دے ہالوں کہسی ربّ وڈیائیا تینوں دے عزت اکبالوں
Verse 520توں ڈاڈھا ایہہ لسے کیتے تیرا شان ودھایاکیوں تدھ عدل انصاف نہ کیتا باتل حق رلایا
Verse 521ظالم دا تدھ زور نہ بھنیا دے سزا قہر دی لسے دا اپرالا چھڈیوئی کر کے عجب نامردی
Verse 522نفس کتے دیاں عیشاں اندر غافل رہؤں نیاؤںمظلوماں دی خبر نہ لئیا ہلیوں نہ اس جاؤں
Verse 523ایسے کارن سونپی تینوں چوکیداری جگّ دی چور خنامی مارن دھاڑے ہوڑیں جاں واہ لگدی
Verse 524اجڑوں گرگ نہ موڑے راکھی بھلی ایالی سگ دی اس مہموں ڈریوں بندیا کٹّ مہم نرک دی
Verse 525راج تیرے وچ دھاڑا ہویا ایڈ انرتھ نہ پچسی جے تدھ ایہہ عدالت ڈوبی راج تیرا کد بچسی
Verse 526شاہپالے فرمایا سن کی دے بیان شتابی کیسا کوئی فسادی کولا لگا کرن خرابی
Verse 527رتو رت ہوئی توں ایسی عیب ڈٹھوئی کہڑا کراں تدارک جے توں دسیں ظلم کریندا جہڑا
Verse 528مہر-افروز کیہا شاہپالے فیض تیرا ہر اک تے صیف-ملوک شاہزادہ دوروں آیا ساڈی سکّ تے
Verse 529صفت اوہدی سن بیٹھوں ساری صدق محبت پکی اک سلام تساڈے کارن سے اس سختی تکی
Verse 530غم علم بتیرے جھلیؤسُ فضل کرم دی آسے کرم ہویا تاں پہتا ثابت باغ-ارم دے پاسے
Verse 531نہ اس اجے سلام تیرے دی ہوئی سعادت حاصل نہ اوہ درسن ویکھ تساڈا ہویا حضوری واصل
Verse 532آس مراد نہ پگی اس دی ہویا آزاد نہ دردوں ہو برباد گئی سبھ کیتی یاد کریں اس مردوں
Verse 533موتی کھڑیا چائ بیچارا آیا ہتھ غنیماں تدھ بن کون کرے اس پچھے بہہ بھاری پار مہیماں
Verse 534مظلوماں دا ہتھ نہ پکڑے جیکر عدل شہانہ روز حشر دے شاہ پچھیسن کرسیں کی بہانہ
Verse 535کوئی بہانہ ٹرسی ناہیں نہ کوئی گلّ ہوویگیگلّ اگی دے سنگل پوسن دوزخ چل ہوویگی
Verse 536شاہپالے فرمایا مائی حکم نہ موڑ سکیدا پر ایہہ سخن نہیں دل لگدا جاں وچ عقل تکیدا
Verse 537بے وفا کمینہ بندہ بھریا نال خطائیاں ایڈ کرو اپرالا اس دا صفتاں تے وڈیائیاں
Verse 538ہاشم شاہ اساڈا بھائی بانہہ ہے کول وسندا بنی ہائِ تے ہے ہمسایہ نال میرے نہیں مندا
Verse 539اساں دوہاں وچ جنگ مچاویں ایہہ کی لایق تینوں فرزنداں دا دکھ نہ مٹدا جانے لگدا جینوں
Verse 540اس آدم نے بیٹا اس دا ہتھیں کٹھا پھڑکے ایہہ بھی اوہناں ہووےگا کٹھا چمّ نہ رکھیا کھڑکے
Verse 541کاہنوں ایویں فوج کہاواں ضائع کراں خزانے بے عقلاں وچ گنیاں مائی کرن ملامت دانے
Verse 542آدم ذات اکلے پچھے کل اپنی نوں ماراں اس دنگیوں کی حاصل مائی وانگ سپاں کل ماراں
Verse 543مہر-افروز کیہا سن بیٹا نہ کر عذر بہانے ویکھ مہماں آہلک کرنا ناہیں کم شہانے
Verse 544جو تدھ عقل قیافے دسے سچ سبھو ایہہ باتاں پر اس آدم زادے اندر حدوں ودھ سفاتاں
Verse 545جس دن دا جگّ پیدا ہویا آدم جنّ اپائے صورتَ سیرت ہنر کسے وچ اس جتنے کد پائے
Verse 546جے توں صورتَ اسدی تکدوں کھوئی ادب خلیمیتاں معلوم تسانوں ہندی اس دی درِ-یتیمی
Verse 547بے بہا کھرا ہے گوہر آدمیاں دی کھانوں کوشش بہت کرو اس پچھے ڈرو نہ قوت لانوں
Verse 548دوجا برا اوہناں ایہہ کیتا پھڑ کھڑیا گھر نالوں دہشت خوف اتار دتو نے ایس تیرے اکبالوں
Verse 549توڑے اوہ برا کر آیا آ وڑیا گھر تیرے وسّ لگدے کد دیندا کوئی چور ادھال لٹیرے
Verse 550گھر آیا ماں جایا جانن لاجونت وڈیرے بانہہ پچھے سر دین بہادر لڑکے مرن اگیرے
Verse 551اسفند باش قلعے وچ اس نے دیوَ کٹھا سی ظاہر اوتھے کسے نہیں ہتھ پایا نکل پڑے وچ باہر
Verse 552مار دیوے نوں ملکہ آندی کر آیا تدبیراں اک اکلا وچ اجاڑاں پھر گیا جیوں شیراں
Verse 553کیتی اپنی دا تد اس نوں فکر آہا ہر ویلے بنھ ہتھیار زوراور بہندا کر کے آہر سویلے
Verse 554اس ویلے گل پیا نہ کوئی تیغ اوہدی تھیں ڈرکے سراندیپ رہا کوئی مدت خون اوہناں دا کر کے
Verse 555سراندیپ شہر دا راجا ودھ ہویا تدھ نالوں اوتھے ہتھ نہ پایا دیواں ڈر اس دے اکبالوں
Verse 556صیف-ملوک ستا سی ایتھے ہو اساں تے گیرا نال دغے دے پھڑیا اوہناں لے گئے بنھ ہتھیرا
Verse 557دتا ہوگ وساہ اوہناں نے لے کے نام تساڈا نام تیرے پر مارن ہوسی مفت غلام تساڈا
Verse 558ایہہ نمردی تیری تکّ کے کون کہیگا چنگا دشمن دے دل بھؤ نہ رہسی ہر کوئی چاسی دنگا
Verse 559ہاں شتاب کرو اٹھ چڑھتل چوٹ لگاؤ بھیرےمتّ اوہ صیف-ملوک پیارا سٹن مار اگیرے
Verse 560حد تیری تھیں پھڑ کھڑیو نے کر چنتا اس گلّ دی متّ ڈردے شبخون تیرے تھیں مار گواون جلدی
Verse 561اس ویلے مڑ پیش نہ جاسی لکھ ہاڑھا سو حیلہ نال افسوس حیران ہووےگا پان جیہا رنگ پیلا
Verse 562فرزنداں دے دکھ نہ مٹدے آکھیں آپ زبانوں سنیا جدوں بدیع-جمالے کرسی کوچ جہانوں
Verse 563کنّ آواز پئیؤسُ جس ویلے صیف-ملوک نہ مڑدا مر ویسی جے جیؤڑا اس دا اگے انت حسڑ دا
Verse 564یوسف ثانی لئیؤسُ کانی ہے فریاد کریندی اس دے عشقَ زلیخا کیتی دم دم یاد کریندی
Verse 565حالَ بدیع-جمال پری دا سارا کھولھ سنایا بیٹی تیری دا شاہپالا ساس لباں پر آیا
Verse 566کنّ بلیل پویگی اس نوں جاں بد خبر سجن دی تلخ غموں جند شیریں دیسی وانگر کوہ شکن دی
Verse 567ایہو نیک صلاحَ تسانوں کرو شتاب تیاری صیف-ملوک مڑاؤ خیریں کر کے ہمت یاری
Verse 568ترکھے کم شیطانی ہندے کہن حکیم سیانے ڈھلّ مناسب اوتھے جتھے کجھ زیان نہ آنے
Verse 569جاں اٹھ اگّ گھراں نوں لگے جلدی جل نہ پائیےجلدے مال متعہ تمامی آپوں بھی جل جائیے
Verse 570ایہو گلاں کردے آہے مائی پتّ فکر وچ آیا کوئی سنیہا لے کے آن کھلوتا در وچ
Verse 571شاہپالے ولّ ہو سلامی کر کے صفت دوائیں کہندا حکم ہووے جند بخشو تاں میں عرض سنائیں
Verse 572شاہ شاہپال اشارت کیتی دسّ تیرا کم کیہا کہیوسُ میں بدیع-جمالے گھلیا دے سنیہا
Verse 573پھپھی ولّ روانہ کیتوسُ مینوں اندر خانے سرو-بانو نوں دے سنیہا گلّ اوہدی شاہ مانے
Verse 574آن لدھے ایہہ بیبی ہوریں وچ حضور شہانے جے آکھن تاں دیاں سنیہا نہیں تاں چلن خانے
Verse 575سرو-بانو نے کیہا اگوں میں معلوم سنیہا دس اتھے کوئی غیر نہ سندا اکو ٹبر ایہا
Verse 576ایلچی کیہا سنیہا ایہو ظاہر آکھ سناواں کیہا بدیع-جمال پری نے رو رو کے ولّ ماواں
Verse 577حیف مینوں جے اوہ شاہزادہ زندہ پرط نہ آیا مرساں کھائِ کٹاری میں بھی ظاہر آکھ سنایا
Verse 578اس بندے نے میرے پچھے جھلے ایڈ کشالےاکھیں ڈٹھے باجھ پیارے قول روحاں دے پالے
Verse 579میرے پچھے جان وننجائیؤسُ جے کٹھا پھڑ دیواں ایسے مرد وفائی پچھے میں کیوں جند نہ دیواں
Verse 580سن بیٹی دے گرم سنیہے فکر پیا شاہپالےبھین گھلی جا خوب تسلی دے بدیع-جمالے
Verse 581سرو-بانو کر پھیر شتابی شاہ-پری ولّ آئی دین لگی دلبریاں بہہ کے سن بھائی دی جائی
Verse 582اس بندے نوں دتی مولٰی ایسی قابل کاری ہوگ خلاص دیواں تھیں آپے نال عقل دی یاری
Verse 583دوجا خوف دیواں نوں مارے شاہپالے دے زوروں شیراں نال دلیری سوخی کد ہو سکدی گوروں
Verse 584نہ کر خفگی تنگی کوئی ربّ چھڈاون ہارا ایہہ آیا کہ آیا دھیے صیف-ملوک پیارا
Verse 585نالے آپ خداوند کیہا سچی خبر کتابوں رنج کسے دے کراں نہ ضایع اپنے عدل حسابوں
Verse 586نیکو-کاراں دے رنج مولٰی جان نہ دیندا ایویں دھیے رکھ تسلی اس تے مرگ شاہزادہ کیویں
Verse 587پندرا برس ہوئے اس شہدے حرص تیری وچ پھردے بازی لائِ محبت والی جوئے کھیڈے سر دے
Verse 588صحیح سلامت راج کریندے چائی پنڈ ملامت ہر ہر روز گزارے اس نے وانگر روز قیامت
Verse 589ہن جے آن تیرے گھر پہتا آس پگی جو آہی کیکر رنج کریگا ضائع سچا قول الٰہی
Verse 590ہک کسے دا بھنے ناہیں ربّ عدالت کردا خاطر جمع تسلی رکھیں صیف-ملوک نہ مردا
Verse 591باپ تیرے دی ہنے کراساں لشکر سنے تیاری قلزم دی سبھ دھرتی تائیں مار کرے تہہ باری
Verse 592ہاشم شاہ نوں مار گنواسی سخت تمبیہاں دے کے یا اوہ آئِ اگیرے ملسی شہزادے نوں لے کے
Verse 593باپ تیرا جد کہریں آوے سبھ قلزم پٹّ سٹسی پریاں دیوَ نہ چھڈے کوئی سبھناں دے سر کٹسی
Verse 594صیف-ملوک ہووےگا قیدی کیونکر مار سکنگے آپے آپ کرنگے حاضر جان ایہہ زور تکنگے
Verse 595سرو-بانو ایہہ گلاں کر کے دتی ذرا تسلی امبر اتے گلاب ملایا منہ پر پکھی جھلی
Verse 596رتی ہوش پری نوں آئی اٹھی تلیاں مل کے مست خمار اداس نمانی نین پون ڈھل ڈھل کے
Verse 597آہیں ڈھاہیں واہو داہی ساہ گھٹن ہڈکورےپٹ پٹ داغ لگے منہ متھے نیل پئے رنگ گورے
Verse 598پسینے نال ہوئی سی میلی خاکوں بھری پشاکیپئے ترٹے وال متھے دے جسے بہت ہلاکی
Verse 599وچو وچ کلیجہ گلیا لہو ہنجھو بھردی گل لالے دی لالی ہوئیا کیسر والی زردی
Verse 600بھوچھن چٹے چھاپے لگے اتھرواں دے داغوں جوبن رتن محمد بخشا بھور گیا اڈّ باغوں
Verse 601ہسن کھیڈن نال سئیاں دے گلّ کرن رہِ چکی آون سئیاں گلّ کراون بولن تھیں ہن مکی
Verse 602چھکی یار مہار دلے دی وا بری ایہہ ڈھکی روون دھوونِ کم محمد غم ماری سڑ سکی
Verse 603حالو حالَ کرے ہر ویلے ویکھ خیال صنم دا جتھوں یار کھڑایا بھالے گردا باغ-ارم دا
Verse 604باغ تماسے مول نہ بھاون لگی بھاہ چمن نوں روحِ باجھ محمد بخشا کس کم لائیے تن نوں
Verse 605تکّ پاٹے پیراہن گل دے پاڑ گواوے جھگا ویکھ سڑے گل لالے والا داغ کلیجے لگا
Verse 606بیٹھ سرھاندی جاں پھر ویکھے نرگس دی بیماری لائِ گل رووے درد وچھوڑے کیتے اسیں ازاری
Verse 607سرو آزاد حیران کھلوتا پیر زمیں وچ گڈے اچا ہو ہو رستہ ویکھے متّ سوہنا سر کڈھے
Verse 608ہو حیران کھلوتی اوتھے تکدی چا چا اڈیاں وانگ سرو سر سہندی تابش دھپّ جلاوے ہڈیاں
Verse 609بیداں تاپ ہجر دا چڑھیا کمب کمب لیٹن دھرتی جاوے پری فراکوں گرمی سخت اوہناں پر ورتی
Verse 610آوے درد سجن دا اس نوں کمب زمیں پر جھڑدی تھل اندر جیوں جل دی مچھی چال اوہو سی پھڑدی
Verse 611وال مونہیں پر پٹ کے سٹّ کے مٹی وچ رلائے پٹکے کھا زمیں پر پٹکے پٹ پٹ پٹّ امبائے
Verse 612ہر چمن دے ڈالوں کردے ہنجھو موتی کلیاں جس راہ ٹردی سٹدی جاندی سے لڑیاں انملیاں
Verse 613وچ بازاراں گلیاں وتے کھلے وال دیوانی اندر تتا مندا چتا سر گھٹا منہ پانی
Verse 614کرے ولاپ ملاپ سجن دے اچی سدّ سناوے دوہڑے بیعت الاوے غزلاں ست سراں کر گاوے
Verse 615حالَ بدیع-جمال پری دا جو ویکھے سو سڑدا جوبن شان گمان محمد نسّ گء لاہ پڑدا
Verse 616عشقے آن کیتا گھر خالی نفعیوں پھیر بہاری نقش سجن دا ثابت ہویا بیٹھی دھوڑ غباری
Verse 617درد غماں دے بھامبڑ بھڑکے اگّ لگی جیوں باری ظاہر ہوئی محمد بخشا جگّ پر دھوآں دھاری
Verse 618چھپدے کد دلاں دے سودے ہوندی خبر دلالاں باندا ہویا بھید ملک تے تکّ تکّ بریاں چالاں
Verse 619ملکاں وچ کہانی ہوئی گھر گھر گلاں ٹریاں جے سو بھید چھپایا لوڑن عشقَ دسے کر کھریاں
Verse 620جھولی پا انگار محمد کوئی پچا نہ سکے عشقاں مشکاں تے دریاواں کون چھپاوے ڈکے
Verse 621کر کے صبر پچایا لوڑے پری دوا غماں دی جت ولّ واء پرے دی جاوے دھماں گھتدی جاندی
Verse 622عشقے اندر صبر نہ رچدا سورج میل نہ لگدی سکا روں نہیں کر سکدا پردہ پوشی اگّ دی
Verse 623نیناں وچ کئی غم غمزے غمزے کم گمازیکیوں کر چھپی رہے محمد بانس چڑھے دی بازی
Verse 624زلف اندر سے سنگل کنڈھے کردے قید دلاں نوں پیر عشقَ وچ پائِ محمد کون بچے خفکانوں
Verse 625نویں پریت اسیلاں والی مل کے یار وچھناںآپ مہمیں ٹور کھڑایا چتّ پری دا بھناں
Verse 626جے سو پھولن غم دے پھولاں ورقاں داغ لگاواں دردمنداں دے درد نہ مکدے جے لکھ گاون گاواں
Verse 627پھڑ ہتھیار محمد بخشا بن کے مرد سپاہی چڑھ نالے شاہپال شاہے دے ہو قلزم ولّ راہی
Verse 628انگلیاں کر وانگ کماناں سدھا تیر قلم دا کاغذ دے میدانے اتے سایہ ڈال علم دا
Verse 629چڑھ گھوڑے لکّ بنھ شتابی پہن سفر دی بردی چل دربار شہانے چل کے دسّ دلیری مردی
Verse 630وانگ وزیراں دے صلاحاں کر کے جیبھ ملائم شاہپالے نوں ہاشم شاہ دے جنگ اتے کر قایم
Verse 631اول لکھ رقہ متّ سلہوں ہو جاون چھٹکارے نہیں تاں تیغ زبان تیری دی گگنے تے چمکارے
Verse 632سخن بندوکے داروں دیوے ساز سیاہی والا کانی نال پرو قطاراں رن کراں سبھ کالا
Verse 633باڑ اندر کر کھاڑ چوطرفی صف پر صف لٹاواں دشمن دی ماں بھین محمد مکھی ہار ٹپاواں
Verse 634صفدر مدد کرے ہر ویلے جو شہنشاہ شاہاں زور اوہناں دے نال محمد دیو دشمن نوں گاہاں
Verse 635سرو-بانو تے مہر-افروزے چنتا چکھا جلائیاں نال فکر دے اٹھ شتابی شاہپالے ولّ آئیاں
Verse 636گوشے سدّ کے آکھن لگیاں سن شاہا کنّ دھرکے ایہو کم وڈا تدھ آیا نہ ہٹ رہنا ڈر کے
Verse 637صیف-ملوک نوں نکا سکا ہولا ککھّ نہ جانیں اس پچھے سر دینا لازم این فرض کر مانیں
Verse 638ہاسی ٹھٹھا جان نہ مولے اس دا ضایع ہونا جے اج آہلک ڈھلّ کرینگا پوگ عمر دا رونا
Verse 639باپ اوہدا سلطان مصر دا عالیشان کہاوےچار اک سے تخت دا سائیں اس ولّ سیس نواوے
Verse 640ایہو اکو بیٹا اس نوں کر کر عجز دوائیں منتاں منّ منّ لدھا آہا کرم کیتا ربّ سائیں
Verse 641ہک اوہدے وچ ایویں آہی لکھی قلم ربانی بیٹی تیری دی تک مورت چائیوسُ سرگردانی
Verse 642پندراں برس ہوئ جد ایویں سفر مصیبت سہندے ندیاں اندر رڑھدا رہا تیکر چڑھدے لیہندے
Verse 643محنت سختی جھاگ مصیبت قہر کلور بلائیں شہر تیرے دے در پر پہتا کھڑیا پکڑ ازائیں
Verse 644ایہہ ہن نہیں مناسب تینوں ڈھلّ کریں اک پل دی صیف-ملوک رہے وچ قیدے ایہہ تیری واہ چلدی
Verse 645اوہ ہے مرد کرامات والا جے آپوں چھٹّ آیا کی جوانا مردی تیری کی جانیگا پایا
Verse 646توں سلیمان نبی دی جائی دیو پریاں دا راجا زور تیرا کی یاد کریگا چھٹیا بیمہتاجا
Verse 647آدمیاں دے راجے تینوں کی آکھنگے سارے حیف اوہدی سلطانی یارو جس ایسے پڑ ہارے
Verse 648اک آدم گھر اس دے پہتا کر کر ایڈ کشالےاوہ بھی دیواں پھڑ کھڑیا کیتوسُ نہ اپرالے
Verse 649جے مہمان تیرا اوہ بنیاں سدا رہیں گا لازم کی جانیگا کڑماں چاری باپ اوہدا شاہ عاصم
Verse 650نالے نرم اقبال تساڈے جانیگا ہر کوئی گھروں جوائی قید کرائیوسُ اس تھیں کجھ نہ ہوئی
Verse 651بے ابروئی تے نامردی ہور نہیں اس جیسی قلزم دا شاہ کون نکارا کرے دلیری ایسی
Verse 652در تیرے توں پکڑ منگائے خاص جوائی تیرا کر کے قید ازاب دسالے ہائِ ہائِ قہر ہنیرا
Verse 653صیف-ملوک مہمان اساڈا کوڑ نہیں اس گلّ وچ ایہہ نکاح روحاں دا مولٰی کیتا روز اضل وچ
Verse 654اٹھ شتابی لشکر لے کے کر قلزم ولّ دھائی صیف-ملوک لیاویں زندہ تاں تیری رہِ آئی
Verse 655شہزادے وچ ہوسن صفتاں بیبی آکھ سنائیاں نالے واست سراندیپوں شاہاں لکھ پچائیاں
Verse 656شاہپالے نوں سن سن صفتاں پئی محبت اسدی کویں اکھیں نظریں آوے دل سکدا جند کھسدی
Verse 657شہزادے دے سچے عشقے اثر اوتھے ونجھ کیتا قدرت دے ہتھ نال الٰہی پھڑ سوئی دل سیتا
Verse 658سرو-بانو تے مہر-افروزے دتے تاء گلاں دے آتش بھڑک لگی شاہپالے جیوں بھڑکار جھلاں دے
Verse 659ایسی لمب غصے دی اٹھی سڑن لگا سر سینہ بھجّ گئیاں سبھ ہور صلاحاں گرم ہویا جد کینہ
Verse 660جمبش جسے جوش مغز وچ چکیں باہاں چبدا منشی سدّ لکھائیوسُ رقہ بھریا قہر غضب دا
Verse 661منشی تیز نویس شتابی پہتا وچ حضورےضری-رقم جیہا خوش کاتب حرف اوہدا تکّ جھورے
Verse 662کاغذ اتے کالی کانی کیتی اوس روانی لکھے سخن کھرے جو دسے شاہ شاہپال زبانی
Verse 663لکھیا خط اجائب پتلی سوہنی صاف نوشتوں حرفاں دی پھلواڑ بنائی باغ بہار بہشتوں
Verse 664ہر ہر سخن میانوں باہر فولادی تلواراں سخنوں سخت زبان محمد کردی ماراں ماراں
Verse 665خط تیار ہویا جس ویلے لگی مہر شہانیاوہو آہو خط لے ٹریا جس تن رڑکے کانی
Verse 666سے کوہاں دا پینڈا کر کے قلزم اندر آیا ہاشم دے دربارے جا کی ایلچی سیس نوایا
Verse 667ادب سلام بجا لیاندا جیوں کر ایلچی کردے تھیلی کھولھ رکھی لے منشی پڑھ پڑھ کمبن ڈردے
Verse 668آ ساقی بھر دہ پیالہ اوہ جمشیدے والا کالی راتیں چانن لگے واہ خرشیدے والا
Verse 669ایسا مدھ جدھے چمکاروں ایہہ شب کاگوں کالی بن کے خاص اکیکی تارہ گگن چڑھے پھلہالی
Point at or tap a word to see its meaning. With a keyboard, Tab reaches the words and the arrow keys move between them.