Verse 1مالی ایس باغیچے والا داناں مرد سچاواں جسدے باغوں لے پنیری میں بھی بوٹے لاواں
Verse 2ہر ہر جائ کیارے تکّ کے بوٹے راس لواندا جس جائی اوہ لایق ہووے اسے جا سہاندا
Verse 3ایہہ فرماندے آئی اگوں رتّ بسنت پھلاں دی کوئی دن سرد خزاں دے رہندے لگی امید گلاں دی
Verse 4باغ اندر ہریائی ہوسی کڈھسی شاخ انگوری لالا اتے گلاب ملنگے نرگس تے گل سوری
Verse 5جاں شہزادے دیوے تائیں کیتا مار ازائیںملکہ خاتں نوں لے ٹریا چھڈّ دیوے دیاں جائیں
Verse 6لکڑیاں دا ٹلا بدھا بہت پکیرا کرکے رڑھ رڑھ رجیا ناہیں تریا پھیر ندی وچ تر کے
Verse 7لئل جواہر قیمت والے نئمت بے شماری کھانے دانے ٹلے اتے پا لئے ہک واری
Verse 8سبھ اسباب ٹلے تے دھریا پکا محکم کرکے ملکہ سنے ٹلے پر چڑھیا ٹلا ٹریا ترکے
Verse 9اٹھے پہر ندی وچ جاندا ٹلا نال شتابی صیف-ملوک عبادت اندر ذکر سنا وہابی
Verse 10لہراں اندر آیا ٹلا ولّ ولّ دھکے کھاندا کدے پتال اندر لہہ جائے کدے گگن چڑھ جاندا
Verse 11کدے پئے وچ گھمن گھیراں پھردا اندر پھیراں پھیراں وچ گجے ایوں پانی چوٹ لگے جیوں شیراں
Verse 12چست گھراٹ پھرے جیوں تویں پانی ترکھا بھوندا لہراں قہراں دے منہ ٹلا ڈبن اتے ہوندا
Verse 13شہزادے نے جھاگے آہے سفر اجیہے اگے ملکہ سی معصوم شاہزادی ڈر ڈبن دا لگے
Verse 14رات ہنیری ندی چوپھیرے نظر نہ پون کنارے جانے توں ہتھ دھوتے بیٹھے ایہہ مارے کہ مارے
Verse 15اوڑک سفر دوہاں تے آئی مشکل ودھ حسابوں قدرت نال بچاندا جاندا مالک ہر گردابوں
Verse 16سرگردان ندی وچ رڑہدے نہ کجھ پتہ نشانی کدھروں آئے کدھر جانا کدھر خلق جہانی
Verse 17ہک تھیں ہک چڑھندی آوے عاشق نوں دلگیریدن دن پیر اگیرے رکھے واہ عشقَ دی شیری
Verse 18چلھے وچوں لکڑ سڑدی سٹے وچ چرھاں دے کولا ہویا پھیر جلاوے اہرن زرگراں دے
Verse 19عشقے دی ایہہ رسم قدیمی جلیاں نوں نت جالے اگلا زخم نہ مولن دیندا ہور اتوں چا ڈالے
Verse 20ٹلے اتے رڑہدے آہے ملکہ تے شاہزادہ ہک دن کرنا ربّ دا ہویا مشکل بنی زیادہ
Verse 21ظالم واؤ مخالف جھلی جھکھڑ جھولے دیندا بدل پا غباری آیا مارو مار کریندا
Verse 22لتھا ربّ اجیہا یارو کی گلّ کتھّ سناواں کتے جہازاں لانگھ نہ لگدی کانگ چڑھی دریاواں
Verse 23بدل آکھے اجے وسنا توڑے پھیر نہ وساں کیتے شہر اجاڑ بتیرے واہیاں کوہلاں کساں
Verse 24جھکھڑ آکھے زور تمامی لا خلق نوں دساں ہک ہک ندی سمندر ہوئی ندیاں وانگر کساں
Verse 25تارے چھوہے ٹھاٹھ ندی دی امبر تیک اچھلے نیناں ہنجھو مینہہ وسائے مارے موت ادلے
Verse 26نہ کوئی کنڈھی نظریں آوے نہ کوئی ٹاپو بیلا کانگ طوفان غضب دا چڑھیا قہر قیامت میلہ
Verse 27جی-جون ندی دے وچے سپّ سنسار بلائیں کجھ رڑہدے کجھ کھاون آون شہزادے دے تائیں
Verse 28شور ککارا امبر توڑی کی لیہندے کی چڑھدے زور پیا کوہ قاف ندی وچ سر پرنے ہو جھڑدے
Verse 29مڑ مڑ ٹلے تائیں دیون گھمن گھیر کلاوے ٹھاٹھاں مار الار وگاون تاں پھر باہر آوے
Verse 30ہک اندر وچ کانگ غماں دی ندیوں موج ودھیریبدل وانگو ہنجھو وسن آہیں سرد ہنیری
Verse 31خونی لہر عشقَ دی وگی بے کنار ڈونگھیریپھیر کڑاہ فکر دے پیندی ہمت صدق دلیری
Verse 32شوکو-شانک ندی دی سن کی سیمرگاں تن کمبے جت ولّ نسن پانی دسے اڈّ اڈّ کے پر امبے
Verse 33شاہزادے دل ہول پیا تے کمبیا دھول طوفانوں بھار زمیں دا چان نہ ہندا عذر نہ سی فرمانوں
Verse 34مچھی جان تلی پر رکھی تلیئے نعر فکر دی ایسی کانگ چڑھائیوئی ربا میں اج بھاروں مردی
Verse 35ابل ابل نکلے پانی جیونکر تیل کڑاہی تڑفن مچھّ کڑاہیاں اندر جان تلیندی آہی
Verse 36مچھ کچھّ ندی وچ کدھرے بلھن سنسار دسیندے کجھ بے ہوش ہوئے کھا دھکے کجھ موئے کجھ جیندے
Verse 37ٹلے نوں تھرتھلی آئی گگن پتال مریندا الٹا سدھا ہو پھر بچدا جاں ربّ راکھا تھیندا
Verse 38عاشق دا ربّ عشقَ پکاندا دم دم دکھ سہاندا رحمت لطفَ کماندا آپے مڑ مڑ پیا بچاندا
Verse 39صیف-ملوکے دا پیو نالے عاصم شاہ نمانا وانگ نبی یاکوبے روندا درد فراقَ رننجانا
Verse 40اٹھے پہر دوائیں کردا سجدے اندر پے کے ربا خیریں آوے بیٹا نال پری نوں لے کے
Verse 41تیرا نام کریم خدایا کرم کریں ہر جائی مار لیا میں چوٹ پتر دی تدھ بن اوٹ نہ کائی
Verse 42پھیریں وقت میرے تے آیا بخشش تدھ جنابوں اؤتر تھیں پھر سوتر ہوئمّ وافر کرم حسابوں
Verse 43صیف-ملوک میرے گھر دتا بیٹا صورتَ والا دانشمند اکابر چنگا یوسف مثل اجالا
Verse 44اس نوں شیر عشقَ دے کھڑیا جیوں یوسف بگھیاڑاں عاصم تے یاکوبے آپوں اگّ لگائی واڑاں
Verse 45کاہنوں میں شاہ-مہرے دسے کاہنوں اس تعبیراں اس دا کھوہ پیا تے میرا وچ سمندر نیراں
Verse 46ہک گیا اس باراں وچوں رو رو ہویا نابینہ میرا ایہو ہکو آہا سٹّ گیا مسکیناں
Verse 47اس نوں بھی تدھ خیریں کھڑیا لونڈا ہوئِ وکایاپھیر مصر دی شاہی دے کے بابل نال ملایا
Verse 48صیف-ملوک میرے فرزندے صحیح سلامت رکھیں نال مراد دلے دے اس نوں میں بھی ویکھاں اکھیں
Verse 49نامرادی اندر اگے تدھ مراد پچائی پھر بھی آس تیرے در اتے ہور پناہ نہ کائی
Verse 50میرا پتّ حوالے تیرے ہے خالق سبہانامیں بھی آزز اوہ بھی آزز تینوں سبھ خصمانہ
Verse 51حضرت ختم نبیاں کیہا سچی خبر کتابوں سلے اﷲ علیہ وسلم ہوون پاک جنابوں
Verse 52خاص حدیث شریفے اندر آون جدوں کزائیںکوئی دعا نہ چلدی اوتھے نہ اوہ ٹلن بلائیں
Verse 53ماپے کرن دوائیں جسدے ہندا اثر دواؤں یا پھر ردّ بلائیں کردا صدقہ پاک ریاؤں
Verse 54عاصم شاہ آہا نت کردا بیٹے کارن دوائیں اوہ دوائیں جان بچائن صیف-ملوکے تائیں
Verse 55سچے مرد صفائی والے جو کجھ کہن زبانوں مولٰی پاک منیندا اوہو پکی خبر اسمانوں
Verse 56کم نہیں ایہہ امبر کردا سر اس دے بدنائیںسبھ کم کردے مرد اﷲ دے حکم کریندا سائیں
Verse 57نیل ندی فرؤن نہ کھادھا نہ کارون زمیناں موسیٰ دی بد-دعائے کیتا غرق دوہاں بے-دیناں
Verse 58ہمت مرداں دی ہر جائی کردی کم ہزاراں پھلاں بھوراں شمع پتنگاں یار ملائے یاراں
Verse 59ہر مشکل دی کنجی یارو مرداں دے ہتھ آئی مرد دعا کرن جس ویلے مشکل رہے نہ کائی
Verse 60قلم ربانی ہتھ ولی دے لکھے جو من بھاوے مردے نوں ربّ قوت بخشی لکھے لیکھ مٹاوے
Verse 61مرد انیندے مرد تنیندے مرد کریندے لیراں سیون مرد پوشاک بناون شاد کرن دلگیراں
Verse 62مرداں دے ہتھ کارج سارے آپ خداوند سٹے دنیاں باغ ولی وچ مالی بوٹے لاوے پٹے
Verse 63کدھرے پتلا بیج رلاوے کدھرے کرے گھنیرا کدھرے تھوڑا پانی لاوے کدھرے دیئ ودھیرا
Verse 64ڈالی قلم کرے ہک رکھوں جا دوئیے پر جوڑے پیوند لا بناوے میوہ آپے پھیر تروڑے
Verse 65ہر ہر بوٹے پانی پھیرے ہر آڈے ہر بنے ہکناں نوں سر راس کریندا گل ہکناں دے بھنے
Verse 66دنیاں باغ امبر کھوہ وہندا دہوں چن وانگو بیلاں مالی مرد اتے ربّ مالک بھور عاشق وچ سیلاں
Verse 67اتنے بھیت پھرولن جوگی وہل نہ دیئ وکھالی گلّ سنا محمد بخشا صیف-ملوکے والی
Verse 68ملکہ تے شہزادے اتے آیا روز حشر دا باپ اپنے ولّ ہو متوجء شاہ دلیلاں کردا
Verse 69جے ماں باپ میرے سنگ مینوں سچے ربّ ملانا تاں اس ویلے دسسی کوئی ٹاپو جائ ٹکانا
Verse 70ایہو شگن وچارے دل وچ پاندا ایہو فالاں اچنچیت وگی واؤ ایسی پتر رہے نہ ڈالاں
Verse 71سائت جھلّ ہوئی پھر مٹھی صاف ہویا جگّ سارا اچنچیتی نظریں آیا ٹاپو ندی کنارہ
Verse 72ایسی اوہ زمین عجب سی لمبے رکھ ہزاراں گلّ پھل رنگ برنگے پھلے وانگ بہشت بہاراں
Verse 73ہور ہک قسم رکھے دی آہی کی کجھ آکھ سناواں واہ خالق بے انت محمد خلقت انت نہ پاواں
Verse 74جاں خرچنگ-دواری وچوں دن-گلّ رنگ رنگیلا جھاتی پاوے تے سر کڈھے سرخ کرے رنگ پیلا
Verse 75لاجوردی تنبو پاٹے امبر دا جس ویلے صادق سبہّ ستر تھیں اٹھ کے آوے باہر سویلے
Verse 76سوما ارزک وچوں کڈھے جاں سر باہر شتابی ہتھ تقدیر دسے یدّ-بیضہ حکمے نال وہابی
Verse 77چمکن ہار کٹورے والا جھنڈا جاں سر چاوےظل اﷲ فلک دا راجا جس دم تخت سہاوے
Verse 78دہوں چڑھے جگّ روشن ہووے خوب سہاوے بندر رکھ سنہری پیدا ہوون ہور اس بندر اندر
Verse 79جاں اسمانی شاہ تخت توں سطراں اندر جاندا میر وزیر ہوون پھر تازہ ہر ہک خان کہاندا
Verse 80نکی موٹی فوج تمامی ہسن کھیڈن لگے کوئی لیہندے کوئی چڑھدے دکھن کوئی پربت نوں وگے
Verse 81قطب شمالی پکا ہو کے چوکیدار کھلووےسورج ڈبے تارے چڑھدے روز وننجے شب ہووے
Verse 82رات پئے تاں رکھ سنہری چھپ جاون وچ دھرتے دن دوجے پھر ظاہر ہوون سدا ایہو کم ورتے
Verse 83بندر اندر میوے آہے باہر انت شماراں پستا مغز بادام منکا امب الوچ اناراں
Verse 84لٹکن میوے تے رس چووے ہک ہک ڈال نباتوں ٹلے توں شاہزادہ لتھا نالے ملکہ خاتوں
Verse 85محکم کرکے بدھا ٹلا آپ ہوئے سیلانی کھاون میوے شکر گزارن فضل ہویا سبحانی
Verse 86ٹھنڈے مٹھے پانی وگن جو من بھاوے پیندے ہک مہینہ رہے مقامی پھر اداسی تھیندے
Verse 87صیف-ملوک کیہا سن ملکہ کس کم ایتھے بہنا جب لگّ جان سجن دی لوڑے رڑہدے تردے رہنا
Verse 88ملکہ کہندی سن وے ویرا میں پھڑیا سنگ تیرا اگا تیرا پچھا میرا کوچ کرو اج ڈیرہ
Verse 89کوئی دن دا کر خرچ ٹلے تے رکھ لئے کجھ میوے ویکھ محمد رازق کتھے رزق بندے نوں دیوے
Verse 90ہوئے سوار ٹلے تے دوئیے ملکہ تے شاہزادہ لمے وہن پئے پھر عاشق سچا رکھ ارادہ
Verse 91راتیں دہاں ٹردے جاندے گھڑی آرام نہ پاندے نہ سدھ بدھ سنسار جگت دی نہ کوئی دندا واندے
Verse 92پانی اپر جاندا ٹلا بیڑی وانگو ترکے صیف-ملوک چلائیں جاندا آس ربے دی کرکے
Verse 93پنج مہینے ہور کپیندا پندھ گھنیرا آبی واء مراد رہی نت جھلدی ٹریا گیا شتابی
Verse 94آپ شاہزادہ چپا مارے آپے ونجھ لگاندا راتیں دہاں خوف ندی دا پلک ہک اکھ نہ لاندا
Verse 95باجھ ملاحاں ترن نہ بیڑے مرداں باجھ نہ جھیڑےہویا ملاہ اوہ شاہ مصر دا کئی رڑھا کے بیڑے
Verse 96یوسف بردا ہو وکانا خوک حقِ سنانے پٹّ پہاڑ سٹے شہزادے فرہادے ہک جانے
Verse 97پنوں دھوبا نام دھرایا کیچم دے سلطانے چاک کلالاں دا سدوایا عزت بیگ جوانے
Verse 98کام-کنور چھڈّ گھر در ٹریا مر مر کے جند بچی پورن گھر گھر بھیکھ منگیندا پال محبت سچی
Verse 99بینزیرا روگ لگایا قید اندر تن گالے نجم نسا بیبی بن جوگی بن بیلے کوہ بھالے
Verse 100قیس عرب دا راجا آہا بنیا مجنوں جھلا شیراں تے بگھیاڑاں اندر وچ پہاڑ اکلا
Verse 101مجنوں نے ہک عورت ڈٹھی ہک دن نال قضائےمردے دے گل رسا پایا چلی نگر ولّ جائے
Verse 102مردے دا منہ کالا کیتا وال پئے وچ گل دے رچھّ قلندر وانگر دوئیے اگے پچھے چلدے
Verse 103جاں مجنوں دے کولوں لنگھے پچھدا مرد یگانہ کس کارن ایہہ کارن کیتوئی ایہہ مکر بہانہ
Verse 104بڈھی کیہا سمجھ جوانا ایہہ کم پیٹ کراندا میں عورت اس مردے تائیں در در پھرے نچاندا
Verse 105اس نوں میں نچاندی پھرساں ہر بوہے کر پھیرا خلقت ویکھ تئجب ہوسی پیسی خیر ودھیرا
Verse 106جو کجھ حاصل ہوسی سانوں ونڈ دوئیے رل کھاساں ادھا مرد کھڑیگا گھر نوں ادھ میں بھی لے جاساں
Verse 107مجنوں کہندا اس کم لایق میرے جیہا نہ کوئی پا میرے گل رسا مائی کھٹّ زیادہ ہوئی
Verse 108گھر گھر ناچ کراں گا امدے غزلاں بول سناساں لیلاں دے گھر توڑی چلساں کھٹی تدھ کراساں
Verse 109جو کجھ حاصل ہوسی تینوں کجھ نہ دیویں مینوں جو کجھ لبھسی تونہیں کھائیں ہوگ بھنجال نہ تینوں
Verse 110مجنوں نے گل رسا پایا منہ لیا کر کالا اس عورت دے پچھے ٹریا واہ عشقَ دا چالا
Verse 111شہر شریکاں دے گھر ڈھویا مجنوں عشقَ قلندر رسا چھک نچاوے بڈھی ہر ہر ویہڑے اندر
Verse 112غزلاں جوڑے تاڑی مارے ناچ کرے سنگ تالاں ویکھ شریک مزاکھاں کردے بہتے کڈھن گالاں
Verse 113لیلاں دے گھر جا بیچارا خوب سرود سناندا منہ کالا تے گل وچ رسا خوب دھمالاں پاندا
Verse 114ایہو کم عشقَ دے دائم کرے اجیہے کارے کی ہویا جے چپے مارے صیف-ملوک بیچارے
Verse 115جے مجنوں دی گلّ تمامی ہور اگیرے کھڑیئےاس قصے دا رہے نہ چیتا اسے اگے سڑیئے
Verse 116ایہو گلّ محمد بخشا ہے فرمائش بھاری صیف-ملوکے دی پھر اگوں دسّ کہانی ساری
Verse 117مولٰی پاک کرے میں یاری توڑ چڑھے ایہہ قصہ اگوں پھیر نبیڑ لویگا جت ولّ ہوسی حصہ
Verse 118بے ارامی وچ شہزادے مدت بہت گزاریبے حدّ تھکا ماندا ہویا نیندر چڑھی خماری
Verse 119صیف-ملوک ٹلے تے ستا نیندر گھلمل آئی عجب جمال پری دی محرم ملکہ ربّ ملائی
Verse 120ستے نوں کجھ ہوش نہ رہا بہتا سی نندرایاملکہ خاتوں بیٹھی جاگے اگے ویر سوایا
Verse 121پھیر اوہ جھلّ سٹاں دی جائیؤں خبر رکھیندی ساری صیف-ملوکے وانگ ٹلے نوں ٹورے نال ہشیاری
Verse 122ہوروں ہور عاشق نوں آفت نت خداوند دسے صدق صفائی اس دی تکدا متّ کدھروں مڑ نسے
Verse 123صیف-ملوک ستے تے دھائی آفت ہور وڈیری اس تھیں بھی ربّ رکھن والا خاص اسے دی ڈھیری
Verse 124پانی تھیں سر کڈھ وکھایا ہک سنسار وڈیرے ٹلے دے چوپھیرے پھردا مڑ مڑ پاوے گھیرے
Verse 125آن اوہناں ولّ نیت رکھی دشمن سخت مریلے منہ ایڈا وچ مٹدے آہے کتنے ہاتھی پیلے
Verse 126ظالم کالا رنگ برا سی شکل ڈراون والی ویکھن والے ہوش نہ رہندی جس دم دے وکھالی
Verse 127ٹٹے زور دلیر جواناں شیر تکے مر جاوے ٹکڑے کرے جہازاں تائیں جے اک دھکہ لاوے
Verse 128سنگھا وانگ ہنیری گورے دسدا جے منہ اڈے دہشت نال بندے نوں بھائی ترت فرشتہ چھڈے
Verse 129گرم ہواڑھ نرک دی نکلے جاں اوہ وات اگھاڑے جس پاسے ساہ لیندا آہا بو مغز نوں ساڑے
Verse 130ٹلے نوں اوہ کھاون آیا ملکہ نوں ڈر لگا خشک ہوئی رتّ جسے وچوں ہو گیا رنگ بگا
Verse 131جھولے وچ شاہزادہ ستا اس نوں سرت نہ کوئی ملکہ کہندی نہ جگاواں نیند کچی متّ ہوئی
Verse 132میں واری جے مینوں کھاوے جان کراں قربانی اس دا وال نہ ہووے ڈنگا نہ ہووے بے ارمانی
Verse 133جہناں پیار محبت ہندی ایسے صرفے کردے سجن ستا نہیں جگاون آپ ہوون جے مردے
Verse 134خسرو نوں جد بیٹے اپنے زخم چلایا چوری کاری پھٹّ لگا وچ وکھی ہوئی کلیجے موری
Verse 135جان-کندن دی تلخی اندر بہت ہیا ترہایا کوئی نہ پانی دیون جوگا کول اس ویلے آیا
Verse 136شیریں کول اوہدے سی ستی اک دوجے انگ لائے کرے دلیل منگاواں پانی اسے نوں فرمائے
Verse 137پھیر کہے ایہہ ہن ہی ستی ناہیں بھلا جگانا آپ مراں ترہایا توڑے اس نوں کی ہلانا
Verse 138وگیا لہو شیریں دے ہیٹھوں گرم لگا جاگ آئی مٹھی مٹھی کہندی اٹھی شاہ نہ آپ جگائی
Verse 139اج زمانے یار کہاون دعوہ کرن پیاراں اپنی خیر منگن تے مارن نال دغے دے یاراں
Verse 140یاری لاون جان بچاون کرن کمال بے ترسی ہک مرے ہک ہسدا وتے اوہ جانے جے مرسی
Verse 141بھیناں وہڑیں سیس گنداون سوون ویر کھڑا کے ویر ویرے گلّ پچھدا ناہیں مرن لگے نوں جا کے
Verse 142ناری اتوں کرن خواری بھنگ گھتن وچ یاری یار یاراں دی رتوں نہاون موج زمانے ماری
Verse 143جے ہک ہووے امباراں والا صاحب دولت زردادوجا کول مرے جے بھکھا نہیں مروت کردا
Verse 144سکیاں ویراں بھیناں تائیں پیریں کاٹھ پوائے عیب گناہ ڈٹھے بن اکھیں ہتھیں سوٹے لائے
Verse 145ماں پیو جائے ویر پیارے بھیناں آپ کہائے ناریں کنت ازائیں کیتے بھابیاں دیور کھپائے
Verse 146جتھے سپّ اٹھوآں ہووے یا کوئی آفت بھاری سجناں ٹورن آپ نہ جاون واہ اجوکی یاری
Verse 147جے پکی گھر روٹی ہووے دکھ دوئیے نوں لگے ہر تہمت بدنامی دے کے چغلی مارن وگے
Verse 148ویراں بھیناں تے بھرجائیاں سبھناں دی گلّ بھائی ہو-ب-ہُ دسالاں ساری ورتی جس جس جائی
Verse 149پرایا پردہ ظاہر کرنا ناہیں کم فقیراں کھڑی محبت ربّ محمد ویر نہ بھاون ویراں
Verse 150ہکو جیہی نہ کرے الٰہی ہن بھی بھلے بھلیرےچھڈّ اوہناں دی گل محمد قصہ ٹور اگیرے
Verse 151صیف-ملوک جگایا ناہیں ملکہ خاتوں رانی نہ ہتھ پیر ہلاندی آہی نیند مٹھی ایہہ مانی
Verse 152چپّ چپاتی ہنجھو روندی آہی بال اانیشہزادے دے منہ تے ڈھٹھا اتھرواں دا پانی
Verse 153جاگ لگی شہزادے تائیں اٹھ کھلوتا جلدی ملکہ روندی تکّ کے پچھدا خبر دسیں اس گلّ دی
Verse 154ویر تیرے توں گھول گھمایا توں کیوں روویں بھینے دس شتابی کی غم تینوں دکھ تیرے ونڈ لینے
Verse 155ملکہ کہندی ایہہ تکّ ویرا ہے سنسار مریلا اساں دوہاں نوں کھاون آیا ڈھکا آخر ویلا
Verse 156ویکھ سنسار شہزادے جلدی سار کمان ہتھ پکڑی مار ہتھیار دو پار کریساں کرے دلیری تکڑی
Verse 157چلے چاڑھ کمان شتابی شیر جوان سپاہی کندی چھک کڑاکے کڈھے کانی ات ولّ واہی
Verse 158نال اکھیں دے اکھ بھڑا کے سدھا تیر وگایاتیر انداز نہ گھتھا شستوں اکھیں وچ لگایا
Verse 159دسر تیر گیا بھنّ آنا پئی بجگ سنسارے ہو کانا چھڈّ گیا ٹکانا جل وچ چبھی مارے
Verse 160دوجی واری پھر سر کڈھیوسُ آ ٹلے دے کولوں ملکہ تے شاہزادہ دوئیے کمب گئے تن ہولوں
Verse 161دوجا تیر شہزادے جڑیا کرکے پھیر دلیری دوجی اکھ اوہدی وچ لگا سلّ گیا ہک ویری
Verse 162کرکے جھٹّ چلایا تیغا سر سنسار سیاح دے وڈھّ لیا سر اس دا جلدی واہ پڑہتھے شاہ دے
Verse 163مار سنسار شہزادے سٹیا اتنی رتّ وگی سی رتوں ندی ہوئی سبھ رتی مارن موج لگی سی
Verse 164رتوں ندی ہوئی سبھ رتی نظر نہ آوے پانی ٹھاٹھ چڑھی کوئی ہاٹھ قہر دی پھردی پھیر کہانی
Verse 165جو گیلی وچ پھیراں پیندی جان نہ دیندے بنے پیڑ نپیڑ بناون ایویں جیوں کوہلو وچ گنے
Verse 166ٹلے دا ربّ راکھا آہا جاندا آپ بچائیں ہون قبول جنابے اندر عاصم دیاں دوائیں
Verse 167لہراں اندر جاندا ٹلا رات دہاں کر دھائی سے کوہاں دے پینڈے کردا انت حساب نہ کائی
Verse 168لہندا چڑھدا دکھن پربت پتہ نہ ویندا کوئی دنہ-چن ویکھ پچھانن قبلہ روز وقت جد ہوئی
Verse 169راتیں تارہ قطب تکیندے تاں کجھ مالم ہوندا شاہزادہ متوجء ہو کے پڑھن نماز کھلوندا
Verse 170رات دہاں حیرانی اندر جلتھل دسدا پانی نہ بن واس دسے نہ بیلا نہ کوئی جوہ ویرانی
Verse 171کوئی دن ایس مصیبت گزرے کرم کیتا پھر مولے لتھی کانگ ندی توں ساری دور ہوئے سبھ رولے
Verse 172جا لگے ہک ٹاپو اندر نام سماک اس بندر میوے عجب اجائب مٹھے ڈٹھے بندر اندر
Verse 173سیؤ سان حدوانے جڈے لٹکن پئے قطاراں پانی والے گھڑے برابر آہا کد اناراں
Verse 174ایس موافک میوے سارے پکّ ہوئے رنگ سوہنے وسطی واس نہ نیڑے کوئی کس نے آہے کھوہنے
Verse 175ہر ہر جائی نہراں وگن رکھے پانی جائے جیوں کر باغ اندر ہر پکھے مالی آڈاں لائے
Verse 176ہر نہرے تے جھلن شاخاں گھنیاں ٹھنڈھیاں چھاواں سبزے نال سہاوے دھرتی پایا خضر پچھاواں
Verse 177آب-ہیات جیہے وچ چشمے بیزلمات دسیندے وانگ الیاس شاہزادہ ہوریں پی پی تازہ تھیندے
Verse 178رنگارنگ پنکھیرو بولن ہک تھیں ہک چنگیرے پر اس ٹاپو اندر آہے طوطے بہت گھنیرے
Verse 179رنگ اسمانی اکھ گمانی مٹھے بول زبانی چنجھاں پیراں سرخی سوہنی گلّ وچ کالی گانی
Verse 180اچی نیویں تیز اڈاری سبز لباس فرشتے جیوں کر ملک جماعتاں ہوون کردے سیر بہشتے
Verse 181ہکناں دے سر سوہے آہے ہکناں رنگ بسنتی ہک ساوے ہک سوسن رنگے طوطے قسم بے انتی
Verse 182بلبل کوئل خوش گفتاراں خمرے کرن آوازے جوڑے نال بیٹھے مل جوڑے نال محبت تازے
Verse 183ہور پہاڑی پنکھی بولن تھاں تھاں لا کچہری سوہے ساوے چٹے کالے تتری رنگ سنہری
Verse 184تونہیں تونہیں پکارے کوئی کوئی کہے ربّ سچا کوئی پیراں نوں یاد کریندا کوئی بلاوے بچہ
Verse 185اوہدا ذکر کسے دے سینے منہ نہ مول ہلاوے ہر ہر پنکھی ربّ سچے دی حمد ثنائ الاوے
Verse 186آپو اپنی بولی اندر آہے ورد کماندے اسماں صفتاں نال تمامی مٹھے بول سناندے
Verse 187واہ خالق بے-چون پکارن چوں کیتی جس ظاہر رنگارنگ پیدائش اس دی انت حسابوں باہر
Verse 188ہک ہک وچ نگاہ اسے دی روزی نت پچاندا ہر ہر دی اس قسمت لکھی لکھیا پاس نہ جاندا
Verse 189جون ہزار اٹھاراں تائیں دے کے رزق سمبھالے کیا بے کار اسمرتھّ شوہدے کیا کمائیاں والے
Verse 190ہکناں آس اسے دے در تے ہکناں آس کمائیاں ہکناں بہت کمائیاں کرکے آخر آن گنوائیاں
Verse 191ہک عالم ہک فاضل ملاں ہک حافظ ہک کاری ہک قاضی ہک مفتی بہندے سر دھر پگڑی بھاری
Verse 192ہک زاہد ہک صوفی مفتی بندے ہک نمازی ہکناں روزیدار کہایا شیخی بیئندازی
Verse 193شیخ شیوخ مربی مرشد پھیر بنے ہک بھارے ہکناں طلب بہشت ونجن دی ہک دوزخ ڈر مارے
Verse 194ہکناں مدھ محبت والا پیتا پور پیالہ مست بیہُ وتن وچ گلیاں نہ کجھ ہوش سمبھالا
Verse 195ہکناں اوگنہار کہایا پر تقصیر گناہیں گلّ پلہ تے گھاہ منہ وچ متھے داغ سیاہی
Verse 196چور اچکے ٹھگّ استر جوئے باز زناہیسبھناں آس تیرے در سائیاں کرسی کرم الٰہی
Verse 197چوری یاری ٹھگی موٹا بدن حرام کبابوں کر کر طوبہ مڑمڑ بھنن مستی چڑھی شرابوں
Verse 198سبز لباس فقیراں والا سر ٹوپی گل الفیباہر دسے ویس اجالا اندر کالا کلفی
Verse 199ہر صورتَ ولّ مائل ہووے غالب نفس اجیہا ہردم تازہ چا برے دا کدے نہ ہندا بیہا
Verse 200جو جو عیب جگت وچ بھارے سبھے میں در آئے کہڑے کہڑے گن گن دساں انت نہ پایا جائے
Verse 201اؤگنہار کچجی کوہجھی لنڈی-لٹّ نکاری خاوند ملّ خریدی سئیؤ دے کے قیمت بھاری
Verse 202گنجی کانی لوہلی ڈوری تیز زبان چراکیبے پرہیز آمیز کریندی وچ پلیدی پاکی
Verse 203ہے بدنییت پریت نہ پالے کوڑ زبانوں بولی دھنّ خاوند جس ردّ نہ کیتی بد اجیہی گولی
Verse 204خوبی خاوند دی کی دساں شالہ جگ جگ جیوے حوراں پریاں اس پر ڈگن جیوں پتنگے دیوے
Verse 205بھلیاں بھلیاں در پر کھلھیاں نکّ رگڑن وچ تلیاں نوشا پرط نگاہ نہ کردا کجھ پرواہ نہ ولیاں
Verse 206میں نکاری اؤگنہاری کی منہ لے کے جاواں طلب دیدار ہزار کھلوتے کت گن درسن پاواں
Verse 207لیکن آس نہ توڑاں میں بھی پاس اوہناں دے جاندی بڈھی دے ہتھ سوتر اٹی یوسف مل کراندی
Verse 208اس پھر سوتر پکے دی اٹی میں ہتھ تند نہ کچی کچی خواہش میری سائیاں ! طلب اوہدی سی سچی
Verse 209ایہہ نہیں میں کہندی شاہا خدمت ٹہل قبولیں نام اﷲ دے بخش گناہاں سایہ سر تے جھولیں
Verse 210بھنی قسم کیتی گستاخی بہت بے ادبی ہوئی توں درکاریں تاں پھر سائیاں کتے کتے نہ ڈھوئی
Verse 211کتنی واری طوبہ بھنی میں ہاں بے اعتباراپھر تیرے در طوبہ کیتی بخشیں بخشننہارا
Verse 212منہ کالا شرمندہ عاصی کی تیرے در آواں مجرم تھیں چاء محرم کرنا تیرا فضل سچاواں
Verse 213دمڑی لے کروڑاں بخشیں کافر مسلماناں شان نشان تساڈا ودھدا جیوں جیوں گھٹے زمانہ
Verse 214اس دی قسم تسانوں حضرت جو محبوب تمھارا سبھ بے ادبی تے گستاخی بخش مینوں سچیارا
Verse 215مکر فریب بہانے بتے سبھو ولّ چھلّ کوڑے میں کتا توں صاحب داتا پا کرم دے پوڑے
Verse 216کتا بھی بے کار مکسر خدمت کم شکاروں راکھی چوکی باجھوں کھاواں خیر تیرے درباروں
Verse 217در تیرے تے پلیا آزز خیر کرم دا ہلیا ملے صواب جناب سچے تھیں کدے جواب نہ ملیا
Verse 218تدھ جھڑکیا کوئی نہ جھلدا کسے جہان نہ ڈھوئی ہتھ سرے تے رکھیں شاہا بخش بے ادبی ہوئی
Verse 219مدد نال بچائیں حضرت ہر شروں ہر بریوں کتھے قصہ رہا محمد ہن کدھر اٹھ تریوں
Verse 220جام جہان دسالن والا روشن چتّ سجن دا موہوں آکھ نہ آکھ محمد واقف ہے اوہ من دا
Verse 221اٹھے پہر محمد سر تے موت نکارا گھردا دس کہانی پکی جانی نہیں وساہ عمر دا
Verse 222جس ٹاپو دی گلّ پچھے سی پنکھی بولن والی اس بندر وچ حوض وڈا سی صفت بیانوں عالی
Verse 223اس ہوزے دے گردے آہے پنکھی ہور قد آورکالے بکرے وانگ بدن تے جت لمیری وافر
Verse 224لاجوردی رنگ پنجے دا اکھیں بلن مشالاں صورتَ دوجی ہور طرحاں دی کس دی شکل دسالاں
Verse 225اس ہوزے تھیں روٹی ویلے قدرت ہندی ظاہر اک ہزار انگیٹھی اگّ دی نکلے دندیوں باہر
Verse 226ہر ہر اس انگیٹھی اتے اوہ پنکھی آ بہندے وگو تگ چگن اگّ تتی جس ویلے رجّ رہندے
Verse 227اڈّ ہوا وننجن چڑھ سارے آون پھیر دپہراںبہہ کے خوش آواز الاپن جیوں کانونے لہراں
Verse 228داؤدی آواز رسیلی سنگھ صفائی والے مرلی تے شرنائیؤں چنگی بینسریاں تھیں نالے
Verse 229بولن عجب سراں کڈھ اچی کوئی بے تار نہ ہووےتانشین وی سنے جے اوتھے کھا غیرت بہہ رووے
Verse 230جدوں سرود مکاون لگن بولن کہ-کہ کر کے اگّ اوہناں دے مونہوں نکلے سٹن چنجھاں بھرکے
Verse 231پانی وچ پئے اگّ ساری نہ ڈبدی نہ بجھدی اگو اگّ دشے کلّ پانی حوض انگیٹھی سجھدی
Verse 232ملکہ تے شاہزادہ دوئیے ویکھ تئجب ہوندے کئیں تماشے ایہو جیہے تکدے وتن بھوندے
Verse 233سجے کھبے تکدے سندے سیر کرن وچ بندر کئی اجائب دسن جہڑے نہیں قیاساں اندر
Verse 234ہک پاسوں آواز شہزادے آدمیاں دا آیا آسیں پاسیں تکن لگا کی اصرار خدایا
Verse 235ویکھدیاں ہک نظریں آئی قوم شہزادے تائیں سیر کرن دریا کنارے آدم لوک گرائیں
Verse 236صیف-ملوک اوہناں ولّ ٹریا جا سلام پکارے بعد سلاموں نال حلیمی پچھدا گلّ دبارے
Verse 237یارو سچ دسالو مینوں کون تسی کس شہروں کہڑے ملک ولایت رہندے سیر کرو اس بہروں
Verse 238یا کوئی وانگ اساڈے آئے وخت قضیے مارے یا ہو ایس جگہ دے وطنی کی ناؤں دیس تمھارے
Verse 239اوہناں جواناں کیہا اگوں صیف-ملوکے تائیں ایہہ ولایت وطن اساڈا وسدے شہر گرائیں
Verse 240سیر شکار کریندے پھردے خشیئیں ندی کنارے واست ایس ملک دا ناواں روشن وچ سنسارے
Verse 241سراندیپ شہر وچ ٹردا ایس ملک دا پیسہ اوتھے شاہ تخت دا والی شان سکندر جیسا
Verse 242صیف-ملوکے نوں اس خبروں خوشی ہوئی دل بھاری ملکہ والی گلّ اوہناں نوں کھولھ دسالی ساری
Verse 243سن گلاں فرمایا اوہناں ہے ایہہ سچ وہانی شاہ اساڈے دی بھتریجی ملکہ خاتوں رانی
Verse 244پتہ نشانی راہ شہر دا پچھ لئیاں سبھ گلاں وچو وچ ندی دے جانا دسیا اوہناں ولاں
Verse 245آیا پرط شاہزادہ اوتھوں آ ملکہ نوں کہندا ہووے مبارک اﷲ بھاوے بھار تیرا ہن لہندا
Verse 246حالَ حقیقت سبھ سنائی ملکہ خاتوں تائیں دوہاں دے دل خوشیاں ہوئیاں پڑھن الحمد سنائیں
Verse 247پھیر ٹلے چڑھ ٹھلھے آہے واء مراد ہلی سی گردش گئی ستارے سائت آ سئدین رلی سی
Verse 248تردا ٹلا حملے کردا جیوں پنکھی دریائی یا کشمیر اندر ڈل کشتی تردی نال صفائی
Verse 249یا پٹے دے دھاگے اتے موتی سچا تردا یا راہور ترے جیوں تازی طرف تویلے ہردا
Verse 250دوروں تاڑ شکار ہواؤں باز چٹا جیوں آوے تاری صاف اڈاری کردا نہ پر پھیر ہلاوے
Verse 251نہ کوئی خلل خروج ندی دا نہ کوئی دوجی آفت خشیوں پہر دسے پلکارا روز لنگھے جیوں سائت
Verse 252پانی اندر تردے جاندے روز گئے پنجتالیواست شہر اندر جا لگے کرم کیتا ربّ والی
Verse 253ٹلے اتوں اتر آئے ملکہ تے شاہزادہ صیف-ملوک سلام اس شاہ دے ٹریا رکھ ارادہ
Verse 254ملکہ خاتوں کولوں پچھدا ایہہ شاہ چاچا تیرا کی کجھ نام مبارک اس دا دسیں پتہ پکیرا
Verse 255ملکہ کہندی سن وے بھائیا دانشمند دلیراتاج ملوک اس ناواں ہوسی جے ایہہ چاچا میرا
Verse 256صیف-ملوک گیا دربارے پچھدا جا نقیباں کتھے ہے سلطان تساڈا ملنا اساں غریباں
Verse 257درباناں فرمایا اگوں شاہ شکار گیا ہے شام وقت نوں آوگ مڑ کے مطلب تدھ کیا ہے
Verse 258شیف-ملوک کیہا میں ملنا خواہ مخاہ اس شاہ نوں خبر نہیں متّ چرکا آوے ملّ بہاں چل راہ نوں
Verse 259ملکہ نوں چھڈّ ندی کنارے اہلے جائی جھروکے صیف-ملوک اس شاہے پچھے تریا راہی ہو کے
Verse 260جاں کجھ پینڈا گیا اگیرے مرد اگوں ہک آیا سوہنی صورتَ زیب شاہانہ زیور روپ سہایا
Verse 261شوکت شان نشان اچیرا تاج سرے پر شاہی چھتر سنہری اپر جھلدا اگے چلن سپاہی
Verse 262نر گجن جیوں راد گجیندا وجن نالے باجے میر وزیر عمرہ چوگردے نوکر سن رائے راجے
Verse 263نہ کجھ انت شمار سواری خچر ہاتھی گھوڑے شاطر نفر غلام پیادے لشکر سن بیؤڑے
Verse 264تاج ملوک اماری اندر نظر پیا شہزادے لیکن ملن نہ ہویا اس تھیں آہی بھیڑ زیادے
Verse 265پچھے پچھے گیا شاہزادہ ٹردا وانگ غریباں جا کھلا دروازے اتے کردا عرض نقیباں
Verse 266جا دربار حضوری اندر اس دی رپٹ پچائی ایسا شخص ملن نوں لوچے ہے پردیسی کائی
Verse 267سوہنی شکل ستارے والا دانشمند یگانہ چہرے تے چمکارے مارے روپ اقبال شہانہ
Verse 268جھال شکل دی جھلّ نہ سکے کانگ اچھلّ حسن دی نقش نگار شمار نہ آوے ہار بہار چمن دی
Verse 269انگلیاں ہتھ پیر اوازا سبھے وانگ ملوکاں خوب ہتھیار سپاہی لایا خبر نہیں کی کوکاں
Verse 270ہے کوئی راجا دیس کشے دا شاہاں ہار سرشتا یا کوئی نوری لوک بہشتوں آیا نکل فرشتہ
Verse 271بہتا درد رننجانا دسے نالے بہت سیانا کہندا مطلب ہے سرکارے ملن حضورے جانا
Verse 272تاج ملوک شاہے نوں سن کے صفت ثنائ جنے دی لگی چھک اندر وچ بہتی خوبی روپ گھنے دی
Verse 273حکم کیتا دربانے تائیں واست دے سلطانے حاضر کرو حضور میرے وچ اس غریب جوانے
Verse 274صیف-ملوک ازازت پائی وڑیا جا کچہری سبھ مجلس نوں تابش لگی جیوں کر دہوں دوپیہری
Verse 275کرکے شرط ادب دی پوری جا سلامی ہویا جہڑی طرحاں کھلونا آہا اوسے وجہ کھلویا
Verse 276تاج ملوک دلاسے کرکے نیڑے سدّ بہایا کہندا مرد مسافر دسیں دسّ خاں کدھروں آیا
Verse 277شیف-ملوک کیہا سن شاہا سچا سخن نبی دا 'الدنیا غریبن' ایتھوں اوڑک کوچ سبھی دا
Verse 278تاج ملوک پچھے پر کہڑا وطن ولایت تیری کت سببّ ہوئیوں پردیسی پہتوں جائ میری
Verse 279صیف-ملوک جواب سناندا میں ہاں شہر مصر تھیں قصہ میرا بہت لمیرا نکل پیوسُ جیوں گھر تھیں
Verse 280بنی مصیبت بھاری مینوں کئی قضیے جھاگےباراں برس ہوئے میں پھردے تاں پہتوسُ اس جاگھے
Verse 281ندیاں نیر سمندر ٹاپو بیلے جنگل باراں جوہیں تے کوہ قاف بلائیں ڈٹھے عجب ہزاراں
Verse 282صیف-ملوکے دی گلّ سن کی شاہ لگا فرماون سن توں شیر جوان بہادر سخن تیرے من بھاون
Verse 283سراندیپ شہر دا والی ہے ہک بھائی میرا اس گھر دھی پیاری آہی ہوروں حسن گھنیرا
Verse 284باراں برس ہوئے اس چھپیاں چائی کسے بلائی اس دا پتہ نشانی کوئی اج دن تیک نہ آئی
Verse 285نہ دسّ بجھ نہ جن کسے تے عاری ہاں تدبیروں توں بھی بہتیں جائیں پھریا ہیں بھی سگھڑ وزیروں
Verse 286نہ کوئی کھوج نشانی لدھی ایسی آفت چکی اک وی خبر نہیں اج توڑی زندی یا مر مکی
Verse 287تھاں کتھاں ڈٹھے تدھ چندی دیو دیواں دیاں جائیں متّ کوئی مالم ہوئے تینوں پتہ اسانوں پائیں
Verse 288صیف-ملوک پچھے کی آہا نام اوہدا میں پاواں تاج ملوک کیہا ہے اس دا ملکہ خاتوں نانواں
Verse 289شہزادے فرمایا شاہا ہووے مبارک تینوں ملکہ خاتوں چنگی بھلی خبر پکی ایہہ مینوں
Verse 290تاج ملوک کیہا دسّ جلدی ہے اوہ کہڑی جائے تیرے اسیں غلام ہووانگے جے سانوں ہتھ آئے
Verse 291صیف-ملوک کیہا سن شاہا ہے نیڑے اوہ رانی باہر شہروں ندی کنارے ویکھو جا فلانی
Verse 292تاج ملوک ہوئیاں دل خوشیاں سن کے خبر جگر دی تتے تا طبیعت اٹھی سائت صبر نہ کردی
Verse 293سنے وزیراں خدمت غاراں تریا اٹھِ شتابی اس پتے تے ڈھونڈن لگا جا کنارے آبی
Verse 294لشکر فوج رہا سبھ پچھے شاہ نوں چامل چایاہک اکلا بھجدا بھجدا اس جائی پر آیا
Verse 295اگوں ملکہ نظریں آئی تاج ملوکے تائیں اٹھ سلام کریندی چاچے رنی پائِ کہائیں
Verse 296چاچے نے گلّ لائی بیٹی دوئیے ہنجھو روندے شکر الحمد گزارن ربّ دا صدقے صدقے ہوندے
Verse 297تاج ملوک نہ میوے جامے بدن پھنڈایا شادی میر وزیر رلے آ پچھوں ہوئی مبارک بادی
Verse 298ملکہ نوں پوشاک لوائی زیور بعد شہانہ ڈولی پا گھراں نوں چلے پھریا نیک زمانہ
Verse 299خوشیاں دے دروازے کھلے مارے تاک غماں دے ڈولی اتوں مہراں موتی صدقے سٹدے جاندے
Verse 300حرماں اندر خبراں گئیاں کرماں موج اٹھائی استقبال کرو اٹھ سبھے ملکہ خاتوں آئی
Verse 301ہر بیگم ہر گولی بیبی نونہاں دھیاں بھیناں میر وزیر سبھس دیاں حرماں لازم ہویا ویناں
Verse 302استقبال اوہدے نوں ڈولے شہروں باہر آئے زیور زیب شہانہ یارو انت نہ کیتا جائے
Verse 303باہیاں سونے چاندی آہیاں خوب اچھاڑ بناتی کلس کنارے جھلمل کردے سچے موتی ذاتی
Verse 304ڈولی ویکھ اس ڈولے یارو ڈولے چتّ دلیراں تکّ ثابت دل رہے نہ ثابت بھجدی شیری شیراں
Verse 305ماسی پھوپھی چاچی تائی بھیناں سنگت سئیاں رو رو ملکہ دے گل مل کے لے گھراں نوں گئیاں
Verse 306شادی دے شدیانے وجے ملی مبارکبادیگئی گواتی ربّ لیاندی پھر ملکہ شہزادی
Verse 307ہر سوانی بیبی رانی دھانی لے نذرانے زیور بیور نقد تریور گلیئیں رلے شہانے
Verse 308کر عزت اکرام ہزاراں نال تمام آئینے ملکہ خاتوں اندر آندی ٹھنڈ پئی وچ سینے
Verse 309تخت اتے شاہزادی تائیں گھر دے لوک بہالنمڑ مڑ پئی ہیٹھاں سی ڈھہندی جے سو پکڑ اٹھالن
Verse 310پچھن لگے گلّ سفر دی بیبی دس کہانی باراں برس ہوئے تدھ چھپیاں کس کس طرحاں وہانی
Verse 311کی کجھ قید مصیبت جھاگی کیڈک رنج سفر دے کیکر ربّ خلاصی بخشی آئیئیں طرف اس گھر دے
Verse 312اسیں فراقَ تیرے وچ روندے نیناں نیند نہ پائی ربّ مالم کی جانے عالم ظالم روگ جدائی
Verse 313بابل مائی بھیناں بھائی رات دہاں تدھ روندے جو کجھ پتہ اوہناں نوں لبھدا سبھ تصدق ہوندے
Verse 314ککھّ مائی دی تیری جائی دکھ بھرے سکھ بھاگے چٹا پونی رنگ ہویا سو سکّ ہوئی جیوں دھاگے
Verse 315کھاون لاون بھاون ناہیں جاون جگر جنہاں دے ماپے کرن سیاپے دل وچ رہندے تاپے ماندے
Verse 316سئیاں تدھ بن نگھر گئیاں لئیاں منجیاں جھکیاں ہک موئیاں ہک ہوئیاں خفتی ہک جوبن دیئ وکیاں
Verse 317اندر داغ وچھوڑے والے کالے وانگو لالے رنگ پھٹاواں انگ پشاکاں جگر وچوں پر کالے
Verse 318ہسن کھیڈن سوہلے گاون سیس گنداون بھلے جھلیاں ہوئیاں گلیاں اندر چلیاں نیں سر کھلے
Verse 319سرمہ پاون مہندی لاون وٹنا تیل ملاون ٹکا دھڑی دنداسا شیشہ ماسہ کسے نہ بھاون
Verse 320وین کرن دن رین غماں دے چین گیا سبھ سنگوں جس گھر شمع نہیں کد ملکہ مجلس ہوئی پتنگوں
Verse 321تیر تیرے دا چیر کلیجے ویر پھرن جیوں پھٹے تنگ ہیاتوں آکھن واتوں ملکہ-خاتوں پٹے
Verse 322درد فراقَ تیرے جو ملکہ کیتی بھا اساڈے گزر گئی جس ہونا آہا مار سہائی ڈاہڈھے
Verse 323خبر نہیں سر تیرے اتے کیکر کویں وہانی کت سببّ خلاصی ہوئی آ دسیں کھولھ کہانی
Verse 324ملکہ کھولھ سنایا قصہ دفتر پھول غماں دا ربّ سببّ بنایا مینوں شیف-ملوکے آندا
Verse 325ظالم دیو وڈے دی قیدوں اس ویرے چھڑکائی حکم ربے دا ہمت اس دی ہور سببّ نہ کائی
Verse 326جہڑی نال میرے اس کیتی جاندی نہیں مکائی کرنی اس دی مینوں دسدی قیمت کون چکائی
Verse 327سکے بھائی ماں پیو جائے نہیں مینوں اس جیہےجس نے میرے کارن کیتے کارن سخت اویہے
Verse 328وال اوہدے توں گھول گھمائے سے بھائی لکھ بھیناں سر بھی کٹّ تلی تے رکھاں جے اس ہووے لیناں
Verse 329جس قیدوں چھڑکایا اس نے میں نمانی تائیں جنگ نسنگ ہویا سنگ دیوے کیتوسُ مار ازائیں
Verse 330سکیاں بھائیاں والی نظرے رہا میرے ولّ تکدا ساہویں اکھ نہ کرے ہیاؤں اچا بول نہ سکدا
Verse 331جو کجھ خوبی اس نے کیتی ہور نہیں کوئی کردا جے کوئی سقا میرا ہوسی رہسی اس دا بردا
Verse 332اس دا ہک مکاون جوگی نہیں میری کلّ ساری میں پر ہے وڈیائی اس دی حدوں بیشماری
Verse 333صیف-ملوک ایہدا ہے ناواں مصر شہر دا والی ویر اصیل دھرم دا بھائی ہر ہر عیبوں خالی
Verse 334مینوں پھڑ پھڑ تخت بہالو اس بن کیکر بحثاں جاں جاں اوہ دلثاد نہ ہووے میں دکھیاری رہساں
Verse 335تاج ملوک سنی گلّ ساری جو ملکہ فرمائی صیف-ملوک سدایا محلیں بہت کیتی وڈیائی
Verse 336نونہاں دھیاں حرماں تائیں سبھناں نوں فرمایا صیف-ملوکوں منہ نہ کجو جانو ماں پیو جایا
Verse 337نہ کوئی بیبی چھپے اس تھیں نہ کوئی پردہ تانے ایہہ فرزنداں نالوں چنگا ہے اساڈے بھانے
Verse 338ملکہ خاتوں بیٹی ساڈی اس تھیں کہڑی چنگی اس نے اس نوں ویر بنایا دور کیتی دو-رنگی
Verse 339تاج ملوک تخت تے بیٹھا وہڑھا فرش سہایا صیف-ملوک برابر اپنے سجے پاس بہایا
Verse 340کھبے پاشے ملکہ خاتوں بیٹھی ہو خوش حالی شکر ہزار گزارن سارے کرم کیتا ربّ والی
Verse 341سرخ شراب یاقوت پیالے آن ہوئے پھر حاضر ترت باورچی جا ٹکائے کھانے نادر نادر
Verse 342شربت مٹھے پین پیالے ہور شراب پرانے کھان پلاؤ کباب فلودے رنگ رنگاں دے کھانے
Verse 343عشرت عیش ہوئی سبھ حاصل کجھ نہ رہا باقی خوش آواز سرود الاپن سوہنے مطرب ساقی
Verse 344باریں برسیں ڈبا بیڑا مولٰی بنے لایا جی جی خوشی مراداں اندر ہویا چین سوایا
Verse 345صیف-ملوکے وانگ کلی دے باہروں روپ سہاوے پر اندر وچ داغ پری دا دھوتا مول نہ جاوے
Verse 346مونہوں کوک پکار نہ کردا آس ربے ولّ لائیاایسے درد پچاون ہسدے واہ مرداں دا دائیا
Verse 347پیون کھاون سندے گندے خوشی کماون سارے فضلاں دے دروازے کھلے تاک قہر دے مارے
Verse 348کاغذ لکھ دوڑایا قاصد سراندیپ شہر ولّ خیر خوشی دی خبر پچائی ملکہ جی دے گھر ولّ
Verse 349صیف-ملوک شہزادے اتے تاج ملوک ترٹھا کرے توازء باہر حدوں کرد اہسانے کٹھا
Verse 350راتیں دہاں خوشیاں کردے ہردم دل پرچاونصیف-ملوک شہزادے اتوں صدقے ہو ہو جاون
Verse 351شمع جلوان پین پیالے مجلس لان پیارے عطر امبیر گلاب صندل دے بہت کرن چھٹکارے
Verse 352عود وجود جلائے آتش بود نابود بنائے دود اپنا دے سوز دوئیے دا دل خوشنود کرائے
Verse 353تار ستار ستار بجائے واہ ستار چتارے کھولھ دتے ربّ باب کرم دے چنگ رباب پکارے
Verse 354سارنگیاں سارنگ الاپن ایسا رنگ بنایا طبل-پور-خشبوئی خوشی تھیں خالی پیٹ پھلایا
Verse 355تارے رات خوشی دی تاڑی مارے خوب پٹاکے چٹکی چٹکے چائی کہندی چھڈو ہور لٹاکے
Verse 356ہر ہک دے دل خوشیاں موجاں غم نہ آہا ماسہ صیف-ملوکے دا دل گھائل باہروں کوڑا ہاسہ
Verse 357پین شراب شتاب پیالے کردے نکل کبابوں دس راتیں دس روز گزارے خوشیاں باہر حسابوں
Verse 358محلاں اندر دیئ شہزادے مانن عیشاں موجاں آ دربار تخت پر بہندے کرن سلامی فوجاں
Verse 359رہے شراب کباب ربابیں دس دن تے دسّ لیلاں بعد اس تھیں نت رہندے آہے وچ خوشی دیاں سیلاں
Verse 360جاں کوئی روز گزشتہ ہوئے کردے عیش جوانی تاج ملوک خوشی کر ہک دن کرن لگا مہمانی
Verse 361سبھ فوجاں کروایاں موجاں ایداں خدمتگاراںصیف-ملوکے نوں پھر دیندا دولت مال ہزاراں
Verse 362لکھ خزانے بھرے دہانے زیور ہور شہانے کئیں پوشاکاں سچیاں پاکاں زین اسباب ترانے
Verse 363کوتل ہور پنجاہ دتے سن نال اسباب سنہری پزی کلغی جھلمل کردی جیوں کر دن دوپیہری
Verse 364ساخت تنی لگام رکاباں قلعے رسے سارے سونے موتی نال جڑاؤ کوتل خوب سنگارے
Verse 365وہتر ہور ولیوے والے گوٹ خچر اٹھ گھوڑے جامے بہت دتے زر کاری زیناں کلغی توڑے
Verse 366ہاتھی کئی اماری والے بہتے خونی جنگی چھوکریاں تے گولے دتے رومی ختنی زنگی
Verse 367ہندی آن اداواں والے پتلے لکّ جہناں دے بولی خوب طبیعت ہولی لٹک ترن ول کھاندے
Verse 368سینے تنگ تے انگ پکیرے ساولے سن رنگ سوہنے مور چکور تے ٹور کھگاں دی چور دلاں نوں موہنے
Verse 369چینی لونڈے روپاں والے مکھ سوہے گل لالے بدن صفائی چین نہ کائی چمکن چین پیالے
Verse 370نفر خطائی نہ خط آئی دسن پاک ختائیؤںذرا خطائی کسے نہ جائی راس سجن ہر جائیؤں
Verse 371نقش جنگل دے میوے دلدے حسن بسنت بہاراں رنگا رنگ پھلاں دی صورتَ کردے قید ہزاراں
Verse 372نرگس نین سیاح کشمیری بن پیتے متوارے مرگ نیناں دیاں شاخاں جڑ کے شیر جنہاں پھڑ مارے
Verse 373رومی شوخ چلاک لڈکے جو ہتھ آون چرکے اگے آئے بھی چھٹّ جاون روم کھلوندے پھر کے
Verse 374صیف-ملوکے تائیں دتے خدمتگار اجیہے تنبو خیمے ہور قناتاں انت حساب نہ رہے
Verse 375لئل جواہر مانک موتی دولت مال خزانہ بخشے صیف-ملوکے تائیں جو ہتھیار شہانہ
Verse 376تاج ملوک اوہنوں دن راتیں رکھدا کول بہائیں ہر تدبیر صلاحَ عقل دی اس نوں کہے دسائیں
Verse 377صیف-ملوکے نوں رکھ کولے رہندا دل پرچاندا قصے عشقَ محبت والے آہا نت سناندا
Verse 378خاترِ جمع تسلی دے کے شاد رکھے دل اس دا جاں شاید چتّ آوے اس نوں کرد غماں دی کسدا
Verse 379دل سی سیخے لگا بیرا بھجدا وانگ کباباں سرد آہیں تے سینہ تتا اکھیں بھریاں ڈاباں
Verse 380پرتے پاسے اساس چلاوے رہے اداس نماناں بے-غم ہو نہ ہسے کھیڈے نت دسے کملاناں
Verse 381لاغر انگ ہویا رنگ پیلا تنگ رہے دن راتیں ہردم شاید یاد کریندا جاں کوئی لاوے باتیں
Verse 382کہندا ہائے ہائے بھائی میرا بہت پیارا جانی جانی نال برابر آہا لا گیا چھک کانی
Verse 383جے اس کھوہ دریا وگاواں کہے میرے وچ چلدا جان کرے قربان میرے توں دوست روز اول دا
Verse 384جے اس نوں وچ اگی سٹاں سائت ڈھلّ نہ لاوے خواہش میری کارن جلدی اپنی جان جلاوے
Verse 385حکم میرے تھیں مکھ نہ موڑے توڑے سر دھڑ منگاں ہتھیں بدھیں رہے کھلوتا بھاویں سکن ٹنگاں
Verse 386ہک دوجے تھیں جدا نہ ہندے دو جسے ہک جندے اٹھے پہر وراگے ملدے گل لگّ بندے بندے
Verse 387پایا ربّ وچھوڑا سانوں جان جگر نوں جھورا نہ کجھ خبر نہ سکھ سنیہا دکھ نہیں ایہہ تھوڑا
Verse 388کی کجھ رنج مصیبت ہوسی یار میرے سر آئی میری اس نوں اس دی مینوں ہرگز خبر نہ کائی
Verse 389خبر نہیں ہن وچ ہیاتی سانوں ربّ ملا سی یا اس داغ وچھوڑے اندر سکدیاں جند جاسی
Verse 390کانگ طوفان سمندر اندر شاید یار رڑھایا ربّ ملاوے تاہیں ملیئے لبھدا نہیں لڑایا
Verse 391مگر-مچھ ہزار بلائیں سپّ سنسار ندی دے کیوں کر بچیا ہوسی اندر مشکل بیہدی دے
Verse 392پھیر کہے اوہ رکھن والا مینوں جس بچایا جے اس نوں بھی رکھیا ہووس نہیں تئجب آیا
Verse 393نوح نبی دا وچ توفانے بیڑا ٹانگ لگائیوسُیونس پیٹ مچھی دے اندر امن ایمان بچائیوسُ
Verse 394ابراہیم خلیل چکھا تے اگّ کوہاں وچ گھتیرکھن والا راکھا ہویا سیک نہ لگا رتی
Verse 395ربّ سچے نوں سبھ توفیقاں جس رکھے سو رہندا توڑے سے گزاں دے پانی رہے سرے توں وہندا
Verse 396یا ربّ سائیاں بھائی میرا شاید نام پیارا جے ہک وار ملاویں خیریں تیرا فضل نیارا
Verse 397اوہ بھی کوئی دہاڑا ہوسی جس دن شاید ملسی جھلسی واء مراداں والی کلی امید دی کھلسی
Verse 398ویکھانگا دیدار پیارے شاید اتے صنم دا یا ایویں مر جاساں سکدا کی بھرواسا دم دا
Verse 399گھوڑے جوڑے دولت مایہ راج حکومت شاہی سنگ بنا کوئی رنگ نہ لاوے تنگ کرے گل پھاہی
Verse 400پیدا ہویا قضیے جوگا میں دکھیارا جمدا کس دہاڑے نظریں پوسی ساتھی رخ صنم دا
Verse 401ظالم عشقَ پری دا سینے تیز المبو بالے دوجا گھا وچھوڑے والا شاید جانی ڈالے
Verse 402جے اوہ یار پیارا بھائی کول میرے اج ہوندا دکھ قضیے ویکھ سجن دے ہنجھو بھر بھر روندا
Verse 403جاں ہن ربّ کشائش کیتی میں پہتا اس جائی عشرت عیش سکھاندی تاہیں جاں رل بہندے بھائی
Verse 404مولٰی پاک وچھوڑا پایا کون اساں ہن میلے پھیر اسے در کوک محمد کرم کرے اس ویلے
Verse 405میں اج موجاں عیشاں اندر عشقے باجھ نہ جھورا پر ایہہ راج حکومت خوشیاں لذت دین نہ بھورا
Verse 406خبر نہیں اوہ شاید جانی یار پیارا بھائی کس مصیبت بھاری اندر ہوسی کہڑی جائی
Verse 407ہے شاید ! ربّ خیریں مہریں سانوں جھب ملائے جس جائی ہیں اوتھے تیرا سکھیں وقت لنگھائے
Verse 408برا وراگ تیرے میں تایا مدت بہت وہانی درد فراقَ وساری مینوں اپنی دکھ کہانی
Verse 409جو کجھ سر میرے تے ورتے سفر قضیے بھارے پر ہن غم فراقَ تیرے دے سبھو ہور وسارے
Verse 410دولت مایہ سبھ کجھ لدھا کمی نہ رہیا کائی پیراں ہیٹھ شہزادے پھردے خدمت کرے لوکائی
Verse 411پر مینوں کجھ بھاوے ناہیں دن دن ہاں دکھیارا رو رو عرض کراں ربّ میلے شاید یار پیارا
Verse 412اسے طرحاں شہزادے اتھے کوئی دن بیٹھ گزارے لوکاں بھانے موجاں مانے دل اس دے دکھ بھارے
Verse 413میر وزیر تمامی لشکر تاج ملوکے سندا صیف-ملوک اگے ہر ہر سی ہتھیں بدھیں بندہ
Verse 414سبھنا بہت پیارا لگے ہر کوئی عاشق اس دا جو تکے سو اٹھ نہ سکے ہر ہک دا دل مسدا
Verse 415علم عقل تے ادب ہنر سی جو دنیاں تے خوبی صیف-ملوک اندر ربّ پائی صورتَ سی مہبوبی
Verse 416نالے جسدی عزت ہووے بادشاہاں دے اگے سبھ کوئی اس دی خاتر کردا ہر ہک دے منہ لگے
Verse 417واست دے سبھ وسن والے شہری لوک گرائیں بہت عزیز پیارا جانن صیف-ملوکے تھانئیں
Verse 418گلوں کریں گلان محمد آن چڑھیں جد گھوڑے شاعر تے دریا دوہاں دے وہن نہ ربّ تروڑے
Verse 419الکسا جو قاصد آہا سراندیپ وگایا راتیں دنے اڈیکن اس نوں ایہہ آیا کہ آیا
Verse 420قاصد جا اخبار پچائی سراندیپ شہر وچ ملکہ-خاتوں دا پیو آیا شہنشاہ نگر وچ
Verse 421اجائب-ال-ملوکب اوہدا سی بادشاہاں وچ ناواں شوکت شان اوہدے دی یارو کی کجھ گلّ سناواں
Verse 422رستم سام سکندر ثانی دولت سی بہرامیکی خسرو جمشید فریدوں کردے ویکھ غلامی
Verse 423عزت مال ملک دا سائیں قید کیتا تقدیراں بیٹی دے غم مار گوایا بیٹھا وانگ زہیراں
Verse 424ہک جائی دی پئی جدائی ایہہ افسوس نہ جائی دوجا ننگ ناموس نہ رہا دھی جوان کھڑائی
Verse 425سو پتر پردیسیں جاون لے کے دیس نکالا ماؤ پیو نوں مہنا ناہیں نہ وٹا منہ کالا
Verse 426جے ہک دھی چھپاوے کدھرے چور کزائیں والا بھلیاں دی پتّ رہندی ناہیں کہندا لوک ادھالا
Verse 427نموجھون غماں وچ بہندا ملکہ دا پیو دائم رات دہاں غم ناک شرم تھیں کدے نہ ہندا قایم
Verse 428ملکہ-خاتوں دا غم اوہناں کھا گیا دل مکے ماپیاں دے رنگ پیلے ہوئے تیلے وانگر سکے
Verse 429اٹھے پہر غماں وچ رہندے سکھ دا ساہ نہ لیندے دم دم نال چلاون آہیں ہنجھو نالے وہندے
Verse 430سکے کھیت خوشی دے اتے اچنچیت اسمانوں کھریوں رحمت دا مینہہ وٹھا فضل ہویا رہمانوں
Verse 431جیوں کر ڈبی جنج بڈھی دی حضرت پیر ترائی تویں ملکہ-خاتوں والی خبر اوہناں گھر آئی
Verse 432قاصد جا اخبار پہنچائی جو جو اکھیں ڈٹھی نالے کھولھ رکھی شاہ اگے ویر سکے دی چٹھی
Verse 433چٹھی واچ ہویا شاہ راضی دفعہ کیتے ربّ جھورے محلاں حرماں اندر سارے سکھ سنیہے ٹورے
Verse 434گھر گھر اندر شادی ہوئی سراندیپ شہر وچ ماپے بھین بھرا قبیلے آئے خوشی لہر وچ
Verse 435استقبال اوہدے نوں چلے ملکہ دا پیو مائی نالے میر وزیر اکابر سارے ساک اشنائی
Verse 436واسط ولّ روانہ ہوئے قاصد گیا اگیرے تاج ملوک تائیں جا کہندا سن شہنشاہ میرے
Verse 437ایہہ تک آیا بھائی تیرا لشکر نال ہزاراں حرم قبیلے نال تمامی انت نہ ناتیداراں
Verse 438صیف-ملوک شہزادے تائیں استقبال کریندے سراندیپ شہر دے سارے آون صدقے دیندے
Verse 439تاج ملوک شاہزادہ تریا اگوں ملن اوہناں نوں صیف-ملوک سخی تے ملکہ کھڑیا نال دوہاں نوں
Verse 440ہور وڈے عمرہ اکابر عزت والے سارے ملنے کارن چلے اگیرے جاگے بھاگ نیارے
Verse 441دوہاں ولاں تھیں تردے آئے آن ملے ہک جائی خشیئیں ملنے دی گلّ ساری جاندی نہیں سنائی
Verse 442ہک دوجے گلّ لا لا ملدے شاہ امیر تمامیسراندیپ شہر دا والی لئے مبارک کامی
Verse 443ملکہ نوں گلّ لاکے رنے مائی باپ ودھیرےمائی کہندی گھول گھمائی سر چمے ہتھ پھیرے
Verse 444خیش قبیلہ بھیناں بھائی قوم رلی سی ساری ملکہ اتے صدقے جاون مل مل وارو واری
Verse 445شکر بجا لیاون ربّ دا کہندے حمد سنائیں گئی گواتی جس ملائی واہ اساڈا سائیں
Verse 446صیف-ملوک شہزادے اگے ہوئے پھیر سلامی شاہ امیر کبیر تمامی کر کے رسم غلامی
Verse 447وارو وار ملن سر کردے سر کردے قربانی لکھ ہزاراں کرن نساراں دیناراں زرکانی
Verse 448ملکہ-خاتوں دا پیو ملیا صیف-ملوکے تائیں گلّ لاوے تے منہ سر چمے لکھ لکھ دئے دوائیں
Verse 449ملکہ-خاتوں دا پیو مائی چر چر ملے وراگے خشیوں دونے ہو ہو جاون ستے طالع جاگے
Verse 450ایسے وکے شہزادے اتے انت نہ کیتا جاوے سراندیپ شہر دے سارے پھڑ پھڑ لین کلاوے
Verse 451کر عزت تعظیم ہزاراں جاہ جلال گھنیرا تاج ملوکے دے گھر آیا سبھ اکٹھا ڈیرہ
Verse 452عشرت عیش فراغت اندر ہو بیٹھے مشغولی بھین بھرا عمرہ اکابر کٹھی قوم سمولی
Verse 453تاج ملوک کہانی ساری صیف-ملوکے والی الفوں یہ توڑی تے نالے زبروں زیر دسالی
Verse 454جزم اوہدی کر نقطہ نقطہ پیش قضیے شداں پائی فتح غنیماں اپر زم عاصم دیاں مداں
Verse 455عشقَ بدیع-جمال پری دا شاہ-مہرے دی خوبی اول آخر تیک سنایا غلبہ تے مغلوبی
Verse 456ملکہ نال مروت اس دی پاکی غیر دلیلوں نالے دے گواہی ملکہ مرد شریف اسیلوں
Verse 457علم حیا پرہیز صفائی قوت صدق دلیری سے مرداں تھیں وڈا دائیا سے شیراں تھیں شیری
Verse 458سے دیواں پر غالب سے جناں تے یاور سے ماراں سنساراں اتے ہے تحقیق زوراور
Verse 459اس دیواں نوں مار گوایا دیواں میں گواہی سے دیواں پر بھارا راکس کٹھا ایس سپاہی
Verse 460ایسا دیو مریلا اس نے مار گوایا جلدی سے دیواں پر جسدی آہی زور دہائی چلدی
Verse 461آفت ہور سنسار وڈیرا مار ندی وچ پایا لہوئے جسدے نال تمامی دریا ٹھاٹھیں آیا
Verse 462میں دو برس ہوئے سنگ اسدے وچ اجاڑاں نیراں رتی میل نہ ڈٹھی اس وچ وانگر سکیاں ویراں
Verse 463ماں پیو خیش قبیلے تائیں ملکہ نے گلّ دسی سبھ شابا 'اہسنت' پکارن واہ شاہزادہ جسی
Verse 464ایسا صدق محبت والا صاحب درد علم دا عالی ہمت مرد وفائی گھٹّ زمیں پر جمدا
Verse 465عجب طریقہ محکم اس دا دنیاں وچ نیارا ایسی سیرت ایسی صورتَ واہ واہ سرجنہارا
Verse 466آفرین پکارن سارے اشکے اشکے شابادونویں شاہ دلاسہ کردے حدوں بے حسابہ
Verse 467دھنّ بابل توں بیٹا جسدا دنیاں اندر نادر عاشق صادق عالم متکی سگھڑ دلیر بہادر
Verse 468ملکہ-خاتوں دا پیو اس نوں دم دم نال ودھائے کہندا بیٹا صیف-ملوکا جو تدھ کرم کمائے
Verse 469ساڈے تھیں مکّ آوے کیکر ایہہ تیری بھلیائیبنداں-زادیں اپنی ملکہ توں قیدوں چھڑکائی
Verse 470نیکی مہر مروت تیری جیکر چاہیا مولٰی میں بھی کجھ مکاساں بیٹا نال طریقے اولا
Verse 471کیتی تیری کتے نہ جاسی اجر دئیگا سائیں جو کجھ وسّ اساڈا ہوسی لاساں اوتھے تائیں
Verse 472ایہہ گلاں کر ہوئے باندے کیتی پھیر تیاری سراندیپ شہر نوں چلی بنی تنی اسواری
Verse 473ملکہ-خاتوں تے شاہزادہ صیف-ملوک بدیسی اوہ بھی نالے چاڑھ لیو نے ربّ مراداں دیسی
Verse 474سراندیپ شہر دے نیڑے جاں منزل پر آئے ملکہ-خاتوں دے پیو اگے قاصد ترت وگائے
Verse 475دتا حکم وزیراں تائیں جائیں خوب سہاؤہر کوچے بازار بغیچے بنت بنا بناؤ
Verse 476ہر سفے ہر محل چوبارے جا دربار شہانے جھاڑو دے چھٹکار کراؤ کریو زیب یگانے
Verse 477کنجر اتے کلونت مراسی بھاٹ سبھو ہور سازی سوہنے ہور شہر دے سارے بانک بناون تازی
Verse 478فوجاں لشکر پیادے سارے کرن تیار اجیماںصیف-ملوک شہزادے اگے مل کے کرن تازیماں
Verse 479ہور بازی گر بھگتیئے سارے رنگارنگ تماشے ہور اجائب چیزاں نالے دانے بیتہاشے
Verse 480عالم فاضل ملاں قاضی مفتی کاری سارے استقبال کرن آ اگے صیف-ملوک پیارے
Verse 481جیوں کر حکم شہانہ آہا سبھ بجا لیاندا ہر نغمہ ہر ساز ہر سوہنا شہروں باہر آندا
Verse 482ہاتھی لا سندھور بنائے کتنے اوٹھ شنگارےتازی زین مرصع کرکے کوتل آن کھلھارے
Verse 483گڈاں بہلاں پینس ہودج پالکیاں تے خاصے ہور چھپائے اچھاڑ بناتی چھتر سنہری-پاسیری
Verse 484کھڑکھڑیاں سی کھڑھیاں اگے جا کر ہوئیاں کھڑھیاںکھچّ الاری نیچے جیوں کر ساون ہاٹھاں چڑھیاں
Verse 485میلکاٹ تے بگھی رتھ سی سیج-کڑے تے یکے استر-گاڈی تے بز-گاڈی ہور کئی کم پکے
Verse 486فوجاں لشکر رنگ برنگی سبھ سوار پیادے میر وزیر شہزادے کیتے خوب سوداگر زادے
Verse 487سوہنے سندر بانکے سارے لا لباس شنگارےمارن اکھ رکھن وچ پڑدے تکّ تکّ ڈھہن ستارے
Verse 488زیور حسن اوہناں دے کولوں جھلک لگی اسماناں گاون ساز بجاون سازی نغمہ ناچ ترانہ
Verse 489ہور زوراور کشتی والے لتھے ملّ اکھاڑے ڈنڈ صرور تے کردے پکڑاں ہک دوئیے تھیں چاڑھے
Verse 490کلا جنگ ہک کرے شتابی خفا-تنگ ہک کردا ہک چائے ہک اگے آنے دم پھرے ہک مردا
Verse 491دھوبی پٹڑا کر ہک سٹے ہک بنگڑی کر بھنے ہک گردن تے کرے سواری دوجا نہوندر بھنے
Verse 492تیر انداز سوار بہادر نیزہ باز سپاہی کرن قواعد آپو اپنی جمع ہوئی سبھ شاہی
Verse 493صیف-ملوک شہزادے کارن ہیا تیار الیماں کی حساب سناواں یارو سے اسباب ازیماں
Verse 494صیف-ملوک اگے ونجھ ہوئے حاضر سبھ تماشے ملے سلامی میر شہزادے افسر بیتہاشے
Verse 495ملکہ تے شہزادے اتے صدقے کرن نساراں چھم چھم برسن سچے موتی جیوں کر مینہہ بہاراں
Verse 496ایسے طرحاں نساراں کردے ٹردے نال بہاراں ملکہ تے شہزادے اگے مجرے ہون ہزاراں
Verse 497تخت اتے شاہزادہ بیٹھا خلقت چائیں جاندی نغمے ناچ اگے سے مجرے چمکے سونا چاندی
Verse 498سراندیپ شہر دے سوہنے ہک تھیں ہک سوایا صفاں بنا کھلوتے آہے جدوں شاہزادہ آیا
Verse 499آب گئی بے تاب دسیندے ہوئے شتاب سلامی جیوں کر مصر شہر وچ یوسف کجے حسن تمامی
Verse 500جیوں کنانی مصر شہر دے سوہنے خاک کیتے سن اس مصری نے سراندیپی کند پچھاک کیتے سن
Verse 501ملکہ-خاتوں جس وچ آہی اس کچاوے اگے ناچ تماشے تے سر صدقے وہل نہیں ہتھ لگے
Verse 502شوکت شان اجیہی کردے آن شہر وچ پہتےانت حساب شماروں باہر دیئ سر صدقے بہتے
Verse 503سراندیپ شہر دا والی نال لئیں شہزادے عالی تخت اپنے تے آیا دل وچ خوشی زیادے
Verse 504اپنے تخت اتے اس پھڑکے صیف-ملوک بہایا بدھے ہتھ کھلوتا آپوں خدمتگار کہایا
Verse 505ہک ہزار چنا منگائے کوتل گھوڑے تازی صم جالی دمب پوزی بندیاں زینت زر دی تازی
Verse 506یوز ہزار شکار-ازمودے چیتے چتے والے ہور ہزار شکاری کتے مارن مرگ سکھالے
Verse 507تنبو خیمے سرخ قناتاں مل جنہاں دے بھارے ستر ستر شطر لدے رپے زر دے سارے
Verse 508ستّ صندوق زمرد موتی لئل جواہر ہیرے چالی ہور صندوق پوشاکاں رخت قماش ذخیرے
Verse 509ایہہ سبھ چیزاں شہزادے نوں دتیاں کر نذرانہ جو جو چیز پسندی آئی سارا ڈھونڈ خزانہ
Verse 510میخ اسباب ہتھیار فولادی جو لایق سلطاناں ادھو ادھ دتا ونڈ سارا بادشاہی سمیانا
Verse 511ادھو ادھ دلوں ہو راضی باجھوں عذر بہانے صیف-ملوکے نوں ونڈ دتے ملک سپاہ خزانے
Verse 512سراندیپ شہر دا والی دے کے دان زیادے بدھیں ہتھیں عذر منیندا کہندا سن شہزادے
Verse 513جو تدھ ملکہ پچھے جھلی رنج مصیبت دونی حق تیرا اوہ مکدا ناہیں گوہڑے وچوں پونی
Verse 514کرکے کرم سخاوت بیٹا بخشیں وادھا سارا اگوں بھی میں نوکر تیرا نہ کجھ عذر نہ چارہ
Verse 515جس جائی توں پانی ڈولھیں اوتھے رتّ ڈلیساں جس پاسے توں قدم اٹھاویں ادھر سیس جھکیساں
Verse 516جتنا وسّ لگیگا میرا لاساں دلوں ایمانوں جے مطلب ہتھ آوے تیرا فرق نہ کرساں جانوں
Verse 517صیف-ملوک تخت توں اٹھ کے کرن لگا تسلیماں دیئ جواب اس گلّ اوہدی دا وانگ اصیل حلیماں
Verse 518جیوں کر رسم رسوم شہانی کرکے ادب آداباں صیف-ملوکے راضی کیتا شاہ نوں نال جواباں
Verse 519تاں پھر ملکہ دا پیو ہتھوں شہزادے تے وکیا بخشی جائ الہدی جتھے رہے سکھلا ٹکیا
Verse 520ماڑی خاص شہانی جو سی اپنے بیٹھن والی اوتھے فرش سنہری کیتے مانجے وانگر تھالی
Verse 521وچ سونے دا تخت وچھایا لئل جواہر جڑیا مجلس کارن نرم غلیچے انت نہ آوے اڑیا
Verse 522ماڑی دی تعریف نہ ہووے کی گلّ کراں زبانوں دھرتی اتے آہی یارو مثل بنی اسمانوں
Verse 523چھت جڑت کیتی استاداں ہر ہر تھاں ہزاراں بوٹے تے پھلّ کھیل رنگاں دے باغ بہشت بہاراں
Verse 524شیشے لاون جھلک چوطرفے موتی لٹکن چھجے نقش نگار صفائی صفیاں ویہڑے رونق رجے
Verse 525صیف-ملوکے دا اس جائی خوب سہایا ڈیرہ لدھا شاہی راج حکومت اگلیوں کجھ ودھیرا
Verse 526سراندیپ نگر دا والی کول اوہدے نت آوے بہت خوشامد خاتر کردا کھیڈیں چتّ بہلاوے
Verse 527چوپٹ گجنفے تے شترنجوں ہسّ ہسّ کردے بازی بد رنگوں ربّ رنگ بنایا برکھا ہوئی تازی
Verse 528پہلے ہتھ اٹھاراں ڈٹھے چھپّ گئے ترے کانے پنجے چھکے دوئییں پونئیے سبھ آون منِ بھانے
Verse 529ستّ ستّ واراں پین ستاراں داء رکھے جد اس دا شہزادے نوں شہِ نہ آوے ناں جگّ فٹ کے کسدا
Verse 530ترے پھیرے داء کھاوے پاسہ چھ ترے پنج دو بھائی نالے پنجیں چوہیں اوتھے بند نہ پوندی کائی
Verse 531چھ دوئیے چھ چار انانوے پوں باراں تے تیراں کچے بھی ہو جاون پکے جگ میلن کھڈّ تیراں
Verse 532پنجے چھکے جے لاچاروں داء رکھن ترے پنجے بدھے باجھ لیاون ساراں سٹّ کے دانے گنجے
Verse 533عاشق نرگوں پے پے نکلے کتنی کتنی واراں رنگوں چا بدرنگ بنائے چھڈّ نکلے گھر باراں
Verse 534سنگ قبیلے رنگ اپنے تھیں ماری وا اٹھ گردا ہر خانے ہر پاسے گردے دھکے کھاندا پھردا
Verse 535کدھرے ہندا قید نمانا کدھرے وتّ مریندا جاں ربّ سچا کرے محمد پکّ کے واصل تھیندا
Verse 536کدے شاہزادہ کرے مطالعہ دفتر علم کلاموں کدے کچہری لا عدالت کردا خاصوں آموں
Verse 537کدے اکلا بیٹھ سکھلا کردا عیش اندر دے گاندھی شیشے بھر بھر لاون ہر ہر قسم عطر دے
Verse 538ساقی وانگ شراب پیالے مکھ روشن گل لالے ہتھ صراحی نور سباہی کاسے پور پیالے
Verse 539عیش شرابوں نکل کبابوں تار کھنکار ربابوں ساقی مطرب ہر ہک ٹوٹا خرشیدوں ماہتابوں
Verse 540چھوکریاں وچ خدمت حاضر لونڈے ہور بے-ریشےسبھو سن ان-بدھے موتی صاف بدن جیوں شیشے
Verse 541کول رہے سلطان ملک دا سائت مول نہ وسے صبر آرام نہ آوس جاں جاں صیف-ملوک نہ دسے
Verse 542جاں شاہزادہ ہووے اداسی آپ غزل کوئی گاوے سننے والے رہن نہ ثابت ہوش تماماں جاوے
Verse 543جدوں نشے دی مستی اندر آپ سرود الاپے دانے لوک ہوون دیوانے رو رو کرن سیاپے
Verse 544جاں پھر یاد پوے اس شاید نام اوہدا لے روندا آہیں ڈھاہیں مار شاہزادہ نیلا پیلا ہوندا
Verse 545ہو بے تاب پلنگ پر ڈھہندا طاقت رہے نہ جسے تیغ فراقَ سجن دی کولوں پل پل اندر کسے
Verse 546شاہ ملک دا تے ہور سارے میر وزیر سیانے ہون تئجب ویکھ محبت صدق صفحہ یرانے
Verse 547شابش آفرین ہزاراں ہر کوئی کہے شہزادے ایسے مرد انصافاں والے ہوسن نہیں زیادے
Verse 548ہک پری دی مورت تکّ کے گھر در شاہی چھڈی چوداں برس سرے پر جھلی رنج مصیبت وڈی
Verse 549اس گلوں بھی مڑدا ناہیں چلا اگیرے جاندا پھر ملکہ نے ویر بلایا اس نوں بھی گھر آندا
Verse 550پھر جو یار پیارا بھائی شاید نام کوئی ہے اس بن گھڑی آرام نہ اس نوں ہردم یاد سوئی ہے
Verse 551ہر ہر پاسے صدقوں پکا اہل وفا یغاناگھٹّ ودھ پیدا کرسی یارو ایسے پتّ زمانہ
Verse 552ملکہ-خاتوں تے بھین اس دی بدرا-خاتوں رانی بدیع-جمال سہیلی جسدی شاہ-پری منِ بھانی
Verse 553دوئیے بھیناں مڑ مڑ آون نالے ماؤ اوہناں دی صیف-ملوکے کول لیاون جو شے اس سکھاندی
Verse 554کھانے دانے ہور پوشاکاں شربت رنگ برنگی اس عزیز اگے آ رکھن چیز دسے جو چنگی
Verse 555عشرت عیش سبھو کجھ لدھا یار نہ اکھیں ڈٹھا جاں جاں یار نہ ملے محمد کجھ نہ لگدا مٹھا
Verse 556عاشق نوں ایہہ مال خزانے تخت حکومت شاہی دلبر باجھوں ایویں دسدے جیوں چوراں گل پھاہی
Verse 557ہک دن ہو اداس شاہزادہ کہندا ملکہ تائیں کد اقرار ہووےگا پورا جاندی عمر ازائیں
Verse 558جنہاں دے دل حب سجن دی سو کیوں بہن نچلے جچر فراقَ ہووے تقدیروں اچرک وسّ نہ چلے
Verse 559جاں پھر دس سجن دی پوندی بدھے رہن نہ ٹھلےاس شاہی تھیں اس دے کوچے بھلے مینوں دھرکلے
Verse 560جس دل حب پیار سجن دا ہردم ملیا لوڑے کیتے قول اساڈے ملکہ شاید تساں تروڑے
Verse 561یا میں تھیں گستاخی ڈٹھی یا تسیں کسے ہوڑےضائع عمر ملے بن جاندی جگ جیون دن تھوڑے
Verse 562یا ہن یار ملاؤ مینوں قول مونہیں دا پالو یا کوئی طرف ولایت اس دی رستہ پندھ دسالو
Verse 563تخت ولایت دولت عزت گھر میرے بھی آہی سبھ کچھ چھوڑ پری نوں ویکھن ہویاں سمندر راہی
Verse 564پھیر تساں اس بادشاہی وچ کیتا قید دھننانےمیں دلبر بن سولی اتے عیش تساڈے بھانے
Verse 565موجاں مانن نہ میں آیا تخت تساڈے بہہ کے پری ملے تاں بہتر نہیں تاں کی لینا بہہ رہِ کے
Verse 566رخصت کرو اتے ولّ مینوں جت ولّ دس سجن دی پردیساں سر دیساں کدھرے وانگو کوہ شکن دی
Verse 567صدقہ کر جو سیس سجن دیاں قدماں وچ نہ لایا بھارا بھار نکما دھڑ تے ایویں رکھیا چایا
Verse 568یا مرساں یا ترساں کدھرے کرساں سر قربانی یا میلو یا لوڑو ملکہ جاندی مفت جوانی
Verse 569ملکہ-خاتوں آکھ سناندی منت کرے پھڑ پیراں کہندی کرو تحمل بھائی جیوں دھیراں تؤں خیراں
Verse 570کیتو ای صبر تحمل اگے چوداں برس لمیرےہور ہن چوداں دن کر جگرا آئے بھلے دن تیرے
Verse 571صبر پیالہ زہر نوالا اول مشکل بھارا اوڑک نفع اجیہا کردا جیوں تریاق پیارا
Verse 572کوڑا منہ مسبر کردا بریاں ہنن ہریڑاںپر جاں سنگھوں ہیٹھ لنگھائیے دفعہ ہوون کئی پیڑاں
Verse 573کوڑا کھاون سو گن پاون مٹھا کھاون والے خون غلیظ ہووے تن روگی تھوڑے رہن سکھالے
Verse 574چوداں روز صبر کر بھائی جھلیں درد جدائی بیٹھا پی شراب صبر دا کفّ غماں دی جائی
Verse 575'التانی من-او-رہمانا' تاول نہیں کریدی دم دم خبر اسانوں آوے عجب جمال پری دی
Verse 576نور ظہور پری دے کولوں ہوسی دور ہنیرا سراندیپ ملک وچ سارے چانن ہوگ ودھیرا
Verse 577ہوسی باغ اساڈے اندر آ پریاں دا ڈیرہ مشتاقاں دے بھاگ سوائے جدوں کریگی پھیرا
Verse 578گھر در ساڈے ہوگ بہشتوں رونق روپ سوایا اوہ بھی نوروں نور ہوئےگا جس کس درسن پایا
Verse 579جس دیدار نہ ویکھن ہویا نال افسوس جلیگا عشقے باجھ نہ ڈٹھا جاسی عاشق جھال جھلیگا
Verse 580توں ہیں عاشق خاصہ اس دا آئؤں چھوڑ ولایت اس پچھے تدھ سر تے جھلی سختی بینہائت
Verse 581میں بھی قسم خدا دی کرکے کیتی شرط پکیریعجب-جمال پری دے اگے عرض کرانگی تیری
Verse 582ماں میری تے بدرا-خاتوں اوہ بھی کہاون حباں جے خیری ہن کیتا مولٰی میلہ نال سبباں
Verse 583نال بدیع-جمال پری دے صیف-ملوکے تائیں کٹھی اسیں ضیافت کرساں آکھن چائیں چائیں
Verse 584باپ میرا بھی قسماں کردا جاں وسّ لگا میرا صیف-ملوک دھرم دا بیٹا کرساں فکر بتیرا
Verse 585اسیں سبھو اس غلے اتے آپو اپنی جائی شامل ہو کھلوتے آپے چنتا نہ کر بھائی
Verse 586دیسی ربّ مراداں تینوں شکّ نہیں اک ذرہ نال بدیع-جمال پری دے ہوگ وصال مکررا
Verse 587سن گلاں شہزادے تائیں ہوئی کجھ تسلی لے دوائیں اتے سنائیں ملکہ گھر نوں چلی
Verse 588آ ساقی بھر دے پیالہ آیا وقت خوشی دا نیڑے آ مقامی ہویا پچھلا یار پوشیدہ
Verse 589مدھ پیواں مستانہ تھیواں رل کے سنگ سواراں شہر جنگل تھیں باہر نکل کے ڈھونڈ لیاواں یاراں
Point at or tap a word to see its meaning. With a keyboard, Tab reaches the words and the arrow keys move between them.